Yesu nadiña nakutañisha nikuuka antu muYudeya nimuYerusalema. Kuhiñahu nazambuki Kaloña Yodani nakushimwina mumusumba himusumba munkambi yaPereya. Hela chochu, katataka afunti muYerusalema.

Iku Yesu wudi muPereya, iyala wumu namwihuli nindi: “Mwanta, komana antu antesha hohu diwu akamwinawu?” Iwu iyala watela watiyahu dehi akulumpi jakwitiya anakuhosha neyi chakwila antu amavulu akayamwina tahindi antesha. Yesu nahimpi nsañu kufuma kudi antu añahi akamwinahu nakuhosha hachuma chatela kwilayi muntu kulonda akamwamwini. Nahoshi nindi: “Zatenu nañovu chikupu mwiñilili muchiisu chanyanya.” Eña, kuzata nañovu chikupu, kusulwila, kunakukeñeka. Muloñadi? Yesu nalumbululi nindi: “Amavulu akafwilaña kwiñila, ilaña hiyakatweshaku.”—Luka 13:23, 24.

Hakuhosha hakuzata nañovu, Yesu nahoshi nindi: “Neyi mwini itala neñili dehi nawa yakiya kuchiisu, mwakemana hanji nakudondomwena kuchiisu nenu, ‘Mwanta, twenzunwiniku.’ . . . Ilaña yena wakayileja nindi, ‘Neluki kumunafumini wanyi. Fumenu kudi ami, enu ejima mwakoñaña yuma yabula kuloña!’”—Luka 13:25-27.

Chumichi chinakumwekesha muntu wunalabi, wenza hampinji yinakeñiyi, nawa nawani chiisu anachishinki nikuchenzela. Watela kwinza swayi, hela chakwila wakeñaña wanyi. Dichichidi nikudi antu amavulu adiluñishaña hampinji yayitañishañayi Yesu. Akañenyi kuzatisha iku kukoleka kulonda alemeshi kudifukula kwalala muchihandilu chawu. Antu amavulu kwamutemesheliwu Yesu anelimu wanyi, muloña amavulu aneteji wanyi njila yahanayi Nzambi yawamwinu. Yesu nahoshi nindi ‘akadisumona kumazewu’ neyi anayinatili hanji. Hela chochu, “antu akenza kufuma kumusela nikumujika nikukabeta kakuchimunswa nikukabeta kakuchidiilu” eña kufuma kunyuza yejima, “akashakama kaheña kumesa muWanta waNzambi.”—Luka 13:28, 29.

Yesu nalumbululi nindi: “Kudi antu anakumininiku [adi neyi abula kwikala aYudeya nawa adatoleliwu] akekala akusambila, nawa kudi antu anasambiliku [aYudeya adisambileña nawu anyana kaAbarahama] akekala akukumininaku.” (Luka 13:30) Chineli anekali “akukumininaku” chinatalishi mukwila nawu antu amuchidawa abulaña kusakilila akeñila wanyi muWanta waNzambi.

AFwarisi amakwawu anenzi kudi Yesu nakumuleja nawu: “Fumaku hanu wuyeña, muloña Herodi [Antipasi] nakukeña kukujaha.” Hadaha Mwanta Herodi yomweni diyi waleteli aka kafuta kulonda Yesu atemuki mwiluña. Herodi hadaha watiyileña woma nindi keña ajahi cheñi kaprofwetu mukwawu neyi chajahiliyi Yowanu Mpapatishi. Ilaña Yesu nayileji aFwarisi nindi: “Yenu  mwakamuleji owu mumbu nenu, ‘Tiyaña! Inakufumisha andemoni nikuuka antu dalelu nikumadiki, nawa hefuku damuchisatu dihinakamanisha.’” (Luka 13:31, 32) Chamuteneniyi Herodi nindi “mumbu,” Yesu hadaha wateneneña chababalawu anyumbu. Hela chochu, Yesu hiyakumutiyisha woma hela kumukanjikija kufuma mwiluña kudi Herodi hela muntu mukwawuku. Wukuzata mudimu wamwinkeliwu kudi Tata yindi, kwesekeja nachatanjikayi Nzambi bayi muntuku.

Yesu natwalekihu naweñi windi wakuya kuYerusalema muloña wahosheli nindi, “hichatelela kaprofwetu kumujahila hanji yaYerusalemaku.” (Luka 13:33) Kwosi wuprofwetu wahosha nawu Mesiya wakafwila muniwu musumbaku, hanu muloñadi Yesu chinakuhoshelayi jakumujahila kweniku? Muloña Yerusalema dimusumba weneni mudi mamembala 71 amuchota chaSanihedirini nawa dikwatwalañawu antu atenañawu nawu atuprofwetu akutwamba. Kubombelahu, dikwalambwilañawu nyilambu yawanyama. Dichi, Yesu neluki nindi chatelela wanyi kumujahila kwacheñi.

Yesu nadili nindi: “Yerusalema, Yerusalema, mukakujaha atuprofwetu nawa mukakwasa malola antu anamutemesheliwu! Owu mapampa kuvula inakeñeleña kukuñwija anyaneyi hamu neyi chakuñwijañayi chaadi anyanindi mumpuula jindi! Ilaña enu himwakeñeleñaku. Talenu! Itala denu anayishilidu.” (Luka 13:34, 35) Iwu musumba wunamukaani Mwana kaNzambi nawa watela kumona kukala.

Henohu Yesu kanda ashiki muYerusalema nlomboli wawaFwarisi namutambiki kuya nakuda kwitala dindi haSabata. Awa anatambikiwu anakumushinshika kulonda amoni Yesu chikumwilayi iwu iyala wakata musoñu wandondu (musoñu wakupweeka menji munyendu nimumadatilu). Yesu nayihuli aFwarisi niantu eluka nshimbi nindi: “Komana nshimbi yeteja kuuka haSabata tahindi nehi?”—Luka 14:3.

Kwosi muntu wunakuli. Yesu namuuki iwu iyala nawa nayihuli nindi: “Hinyi hakachi kenu wukwila neyi mwanindi weyala hela chizamba chindi chañombi aholokela mwishima, wukubula kushikena kumuzambulamu hefuku daSabata?” (Luka 14:5) Cheñi, kwosi niwumu wunakuli.