Yesu hachidi muSamariya hela muÑaliliyaku. AFwarisi anakumwihula mpinji yakenza Wanta, wahembelelañawu kwakekala kwimba nakuzañalala. Hela chochu, Yesu nahoshi nindi: “Wanta waNzambi hiwunakwinza munjila yinelukiwu antu ejimaku; hela antu hiyakahosha nawu, ‘Talenu hanu!’ hela, ‘Hanaku!’ Muloña tiyenu! Wanta waNzambi wudi mukachi kenu.”—Luka 17: 20, 21.

Amakwawu anakunkululi nawu Yesu nakuhosha nindi Wanta wayuulaña munyichima yawambuña aNzambi. Hela chochu, dichichekala wanyi, muloña Wanta wekala wanyi munyichima yawa Fwarisi anakuhosha naYesu. Ilaña wudi mukachi kawu muloña Mwanta waWanta waNzambi atondawu Yesu wudi mukachi kawu.—Matewu 2121:5.

Chakadi nikujina hanyima yakwila aFwarisi anayi, Yesu nayilumbulwili atumbanji twindi nsañu yikwawu hakwinza kwaWanta. Kutalisha hakwikalahu kwindi muWanta, chatachi nayisoñamishi nindi: “Mafuku akenza himwakafwilaña kumona ifuku dimu hanowu mafuku aMwana kamuntu, ilaña himwakadimonaku.” (Luka 17:22) Yesu nakumwekesha nindi kuyuula kwaMwana kamuntu muWanta kwakekalaku kumbidi. Henohu iyi mpinji kanda yishiki, atumbanji amakwawu akahembelelaña chikupu, ilaña atela kutwalekahu kuhembelela sampu mpinji yatoñolayi Nzambi yaMwana kamuntu yinashiki.

Yesu natwalekihu nindi: “Antu akayilejaña enu nawu, ‘Talenu hana!’ hela, ‘Talenu hanu!’ Bayi mwakaya hela kuyilondelaku. Neyi chakenaña nzaji kukabadi kamu kewulu nakushika kukabadi kakwawu kewulu, dichakekalayi niMwana kamuntu mwifuku dindi.” (Luka 17:23, 24) Yumanyi yatela kwila atumbanji twaYesu kulonda akabuli kulondela amesiya akutwamba? Yesu nahoshi nindi kwinza kwaMesiya walala kwakekala neyi nzaji yamonañawu kwakulehi. Chinjikijilu chakwinza kwindi muWanta akachimona kudi antu anakumonaku.

Kuhiñahu, Yesu nesekeji yuma yelileñawu antu kunyima niyuma chiyakekala kumbidi nindi: “Neyi chichadiña mumafuku aNowa, dichichakekala nimumafuku aMwana kamuntu . . . Chochimu nawa, neyi chichadiña mumafuku aLoti: adiileña, anwineña, alandileña, alandishileña, atumbileña mbutu, atuñileña. Ilaña hefuku dafuminiyi Loti muSodoma, kwanokeli nvula yakesi nisawufa nawa ayijilumwini wejima wawu. Dichichakekala nihanodu ifuku neyi Mwana kamuntu anamusololi.”—Luka 17:26-30.

Yesu nakuhosha wanyi nindi antu mumafuku aNowa niaLoti ayijilumwini muloña wakwila adiileña, anwineña, kulanda, kulandisha kutumba nikutuña. Nowa niLoti niyisaka yawu elilihu yuma yimu haniyi yuma. Ilaña antu anashali elileña yumiyi chakadi kusha muchima kunkeñelu  yaNzambi nawa adiwileña mumpinji yadiña nakushakamamu. Dichi, Yesu nakuyikonkomwena atumbanji twindi kusha muchima kunkeñelu yaNzambi nikuyila chikupu. Nakuyileja njila yakupulukilamu, dikwila nawu njila yakuhandilamu neyi Nzambi naleti kujilumuka kumbidi.

Atumbanji atela kutondolwela kuluwankana nayuma yidi mukaayi, ‘yuma yakunyima.’ Yesu nahoshi nindi: “Hanodu ifuku, muntu wakekala hewulu detala ilaña yuma yindi yidi mwitala, bayi akasuluka nakuyisendaku, chochimu nawa, nimuntu wakekala mwiha, bayi akafunta nakusenda yuma yakashiyayi kunyimaku. Anukenu ñoda Loti.” (Luka 17:31, 32) Wabalumukili chishimi chamuñwa.

Kutwalekahu nansañu yinakuyilejayi chakekala yuma neyi Mwana kamuntu natachiki kuyuula neyi Mwanta, Yesu nayileji atumbanji twindi nindi: “Hawuna wufuku, antu ayedi akekala hakadidi kamu; wumu akamusenda, ilaña mukwawu akamushiya.” (Luka 17:34) Amakwawu akayamwina amakwawu akayishiya, akajimbesha wumi wawu.

Atumbanji anehuli nawu: “Mwanta, kudihi kwenoku?” Yena nayakuli nindi: “Kunafwili chuma, kwenoku dikukuhwila niambuulu.” (Luka 17:37) Eña antu amakwawu akamwenaña hahalehi neyi ambuulu. Awa atumbanji akapompa kudi Kristu walala, Mwana kamuntu. Haniyi mpinji yakumbidi, Yesu wakayinka atumbanji chalala chakamwina ejima akamukuhwelela.