Yesu niantu anakuyayi nawu anashiki muYeriku, iluña dakwendahu ifuku damukuma kufuma kuYerusalema. Munjila yikwawu, Yeriku yekala nanyisumba yiyedi, musumba wawukulu hadi mayilu yimu namusumba wawuha wawaRoma. Yesu nimazaza chinashikiwu muniyi nyisumba nawa hakufuma muwumi nakuya muwukwawu, amputamesu ayedi akakulombalomba anatiyi lushindu. Wumu hakachi kawu diyi Baratimewu

Chinatiyiwu nawu Yesu nakuhita, Baratimewu nibwambu dindi anatachiki kubilela nawu: “Mwanta, Mwana kaDavidi, tutiyili luwi!” (Matewu 20:30) Antu amakwawu adi hezaza anatachiki kuyizuwila nawu amweni, ilaña muwuyedi wawu aswejelaku nikubilela. Chinatiyiyi chumichi, Yesu nemani. Nayileji antu adiyi nawu nindi atambiki owu anakumubilela. Anayi kudi akakulombalomba nawa anayileji nawu: “Kutiya woma nehi! Nyamukaku; nakukutambika.” (Maku 10:49) Iku natiyi kuwaha, iyala mputamesu nanati chakuvwala chindi chahewulu, nanyamuki nakubilikita, nawa nayi kudi Yesu.

Yesu namwihuli nindi: “Chumanyi chimunakukeña niyilili?” Amayala amputamesu, wejima wawu anakuli nawu: “Mwanta, toneshaku mesu etu.” (Matewu 20:32, 33) Chinayitiyiliyi wushona, Yesu nakwati hamesu awu, nawa naleji wumu hakachi kawu nindi: “Yaña. Chikuhwelelu cheyi chinakukoleshi.” (Maku 10:52) Amputamesu akakulombalomba anatachiki kumona, nawa chakadi nikujina wejima wawu anatachiki kumulemesha Nzambi. Antu chinamoniwu yuma yinamwekani, niwena anatachiki kumushimeka Nzambi. Awa amayala adiña amputamesu ichi anatachiki kumulondela Yesu.

Chinakuhitayi Yesu muYeriku, mazaza awantu amavulu anatachiki kumulondela. Wejima wawu anakukeña kumumona muntu wunatoneshi amayala amputamesu. Antu anakumukwatakata Yesu kutubadi twejima, nawa amakwawu anakukañanya nikumumona. Zakewu niyena nakañanyi kumumona. Himukulumpi wawakakutambula nyisonku muYeriku. Chineli wamwihi, nakañanyi kumona yuma yinakumwekana. Dichi Zakewu nayi kumbidi lufuchi nawa nakandami kumutondu wasikamo (hela, mukuyu wamalubeni) wudi munjila yinakuyilayi Yesu. Chinakandamiyi, Zakewu namoni yuma yejima yinakumwekana. Yesu chinashikiyi kukamwihi nawa namumoni Zakewu nakandami kumutondu, namuleji nindi: “Zakewu, sulukaku swayi-swayi, muloña dalelu nukushakama mwitala deyi.” (Luka 19:5) Zakewu nasuluki nawa nayi lufuchi kwitala dindi kulonda atambwili mwenyi walema.

Antu chinamoniwu yuma yinakumwekana, anatachiki kuhosha-hosha. Anamoni nawu chaloña wanyi Yesu kwikala mwenyi kwitala damuntu amonañawu nawu himukanshidi. Zakewu waheta kuhitila mukutambula mali awupwapoku hampinji yatambulañayi nyisonku.

Yesu chineñiliyi mwitala daZakewu, antu anakudidilashana nawu: “Nayi nakwikala mwenyi mwitala  damuntu mukanshidi.” Hela chochu, Yesu namoni nindi Zakewu nateli kubalumuka mumuchima. Nawa mwamweni Yesu natwambi wanyi. Zakewu nemani nawa namuleji nindi: “Talaña! Chibalu chayuma yami, inakwinka atuzweñi, nawa chuma chejima chinatambwili kudi muntu munjila yawupwapoki, nukumufuntishila mapampa awana ayuma.”—Luka 19:7, 8.

Zakewu namwekeshi chikupu nindi nabalumuki mumuchima nachuma chineliyi! Watela nachindi mumukanda windi wakusonkesha mali atambwiliyi kudi aYudeya ashiyashana, nawa nasanyiki nindi wukuyifuntishila mapampa awana. Chumichi chinabadiki nichahosha Nshimbi yaNzambi. (Kwidika 22:1; ALevi 6:2-5) Kubombelahu, Zakewu nashiiki nindi wukuhana chibalu chayuma yindi kudi atuzweñi.

Yesu natiyi kuwaha nachinabalumukiyi Zakewu mumuchima hatooka nawa namuleji nindi: “Dalelu wamwinu wunenzi mudinu itala, chineli niyena himwana kaAbarahama. Muloña Mwana kamuntu wenjili nakukeñakeña nikwamwina antu ajimbala.”—Luka 19:9, 10.

Hanashimbuli wanyi, Yesu washili muchima hadi antu ‘ajimbala’ nachakutalilahu chamwana wajimbeli. (Luka 15:11-24) Ichi dinu nahani chakutalilahu chacheñi chamuntu wudi tuhu neyi wajimbeli dichi namwekani. Anlomboli jakwitiya niantu ayilondelaña atela anamutiyi kutama Yesu nawa anakumutwika muloña hakusha maana muntu wudi neyi Zakewu. Hela chochu, Yesu natwalekihu kukeñakeña anyana kaAbarahama ajimbala.