Yesu niatumbanji twindi chinamanishiwu lwendu lwawu lwakuya kukabeta kakuchidilu muPereya nakuya neyi kuYerusalema, anazambukili mwishinadi daKaloña Yodani kwakwihi naYeriku. Antu amakwawu anakuyawu nawu hamu, anakuya kuChipandakenu cha 33 C.E.

Yesu wudi hambidi yawatumbanji twindi, nakukeña kushika swayi mumusumba kuChipandakenu. Ilaña atumbanji anakutiya woma. Hanashimbuli wanyi, hafwiliyi Lazaru nawa Yesu wadiña kwakwihi nakuya kuYudeya kufuma kuPereya, Tomasi wayilejeli akwawu nindi: “Ninetu nawa tuyenu kulonda twakafwili hamu nindi.” (Yowanu 11:16, 47-53) Dichi kuya kuYerusalema hikusha wumi hakatoña, nawa tunateli kuyitoñojokelaku atumbanji chinakuletesha atiyeña woma.

Hakuyikwasha hayuma yikukeña kumwekana kumbidi, Yesu nayitwali atumbanji twindi hambadi nakuyileja nindi: “Tunakukanduka nakuya kuYerusalema nawa Mwana kamuntu akumuhana mumakasa awakulumpi jawatupristu niansoneki. Akumusompesha nawu amujahi nawa akumuhana kudi antu akunyuza kulonda amusupishi nakumuvupola nikumujahila hamutondu; nawa hefuku damuchisatu akamusañula.”—Matewu 20:18, 19.

Aka dikamuchisatu kanayilejiyi Yesu atumbanji twindi hakufwa kwindi nihakusañuka. (Matewu 16:21; 17:22, 23) Hela chochu, haniyi mpinji nayileji nindi akumujahila hamutondu. Anatiyi chinahoshiyi, ilaña anatiyishishi wanyi munatalishiyi. Hadaha anakutoñojoka hakufuntisha wanta wawaIsarela hamaseki, kulonda adiluñisheña kulema nimpuhu muwanta wahamaseki naKristu.

Mama yakapostolu Yakoba naYowanu, atela atenañawu nawu Salomi, niyena wudi hakachi kawantu anakuya. Yesu wayitumbili awa apostolu indi nindi “Anyana kaKudidima,” chakadi nikujina muloña wakuzuwa kwawu. (Maku 3:17; Luka 9:54) Hadi mpinji yayilehi, awa ayedi afwilaña kwikala  akulumpi muWanta waKristu. Nimama yawu weluka chumichi. Dichi namuwani Yesu nakuyilombelaku kulonda akayitoñihu. Yesu namwakuli nindi: “Wunakukeñadi?’’ Namwakuli nindi: “Hoshaku neyi awa anyanami ayedi awamayala akashakama muWanta weyi, wumu kuchikasa cheyi chachidiilu, mukwawu kuchikasa cheyi chachimunswa.”—Matewu 20:20, 21.

Chakadi nikujina, aYakoba naYowanu diwu anakulomba chumichi. Hanyima yakushimuna nsonyi nikusawuka kukumonayi, Yesu nayileji nindi: “Muneluki wanyi chuma chimunakulomba. Munateli kunwa mukaapu munukunwa katataka?” Wena anamwakuli nawu: “Tunateli.” (Matewu 20:22) Hohamu kanda eluki chikupu munatalishi chumichi.

Hela chochu Yesu nayileji nindi: “Mwamweni mukunwa kaapu kami, ilaña kushakama kuchikasa chami chachidiilu nikuchikasa chami chachimunswa hiyami natela kuhanaku, ilaña Tata diyi wahanaña kudi ana aloñeshelayi dehi.”—Matewu 20:23.

Apostolu amakwawu 10 chinelukiwu chuma chinalombiwu aYakoba naYowanu, anahili chikupu. Kwila tuhu aYakoba naYowanu diwu ahosheleña nankashi habobweleñawu cheñi nawu wabadika hinyi hakachi kawu nehi? (Luka 9:46-48) Kwiji mwani, ilaña chinalombiwu chinamwekeshi hatooka nawu atumbanji 12 anazatishi wanyi kufumba kwaYesu kwakudimona kwikala wakehelamu. Achidi kutwalekahu kukeña kwiluka mukulumpi hakachi kawu.

Yesu nakukeña kumanisha iku kukala kunamwekani nawa nikukala kunateli kufumamu. Nayitambiki wejima wawu 12 hamu nawa nayifumbi mukukeña, nindi: “Enu mweluka nenu antu elukawu nawu anakuyuula nyuza, akabishaña antu jawu, nawa antu jawu alema azatishaña wuswa wawu chatama hadi wena. Enu dichimwatela kwila wanyi; ilaña muntu wejima wunakukeña kwikala mukulumpi hakachi kenu, watela kwikala mukakuyikalakela, nawa muntu wejima wunakukeña kwikala watachi hakachi kenu, watela kwikala nduñu yawantu ejima.”—Maku 10:42-44.

Yesu naleti chakutalilahu chatela kwimbujolawu, chakutalilahu chindi. Nalumbululi nindi: “Mwana kamuntu, henjili nindi amukalakeliku, ilaña wenjili nakukalakela antu nikuhana wumi windi kwikala ifutu danyiloña dakukuula nachu antu amavulu.” (Matewu 20:28) Hadi yaaka kwakwihi nayisatu, Yesu wadiña nakukalakela antu amakwawu. Nawa katataka eli chuma chochimu chakwila afwili muchidi wamuntu. Atumbanji atela kwikala nayitoñojoka yoyimu neyi yaKristu yakukeña kukalakela antu amakwawu kubadika kuyikalakela wena, eña, kwikala wakehelamu kubadika kufwila wukulumpi.