Yesu nayileji atumbanji twindi chakutalilahu chakulombaña mpinji yejima chakadi kuleka. (Luka 11:5-13) Hadaha ichi wudi muSamariya hela muÑaliliya, nawa nakukonkomwena hakulomba chakadi kuzeya. Nakonkomweni chumichi nachakutalilahu:

“Mumusumba wumu mwadiña nsompeshi wabulileña kumutiya Nzambi woma nawa halemesheleña muntuku. Munowu musumba mwadiña cheñi mumbanda ntuluwa wayileña kudi yena nakuhosha nindi, ‘Nkwashi niyiñi namuloña kudi mukwetu wunanholokeli kuchota chanyiloña.’ Hatachi wakaanineña, ilaña chimwahitili mpinji wadihoshesheli nindi, ‘Hela chakwila hinamutiyaña Nzambi woma hela kulemesha muntuku, nukumukwasha iwu ntuluwa ayiñi namuloña kulonda aleki kwinza nakunkabisha, muloña natwalekihu kunkabisha.’”—Luka 18:2-5.

Kwinza hakuzatisha iyi nsañu Yesu nahoshi nindi: “Tiyenu chahosheliyi nsompeshi hela chakwila hadiña waloñaku! Mwamweni, komana Nzambi hakayiñisha namuloña antu jindi atondewa amudililaña mwaana niwufuku, hela chakwila wuchidi wadiwunjika nawenaku?” (Luka 18:6, 7) Yesu nakumwekesha Tata yindi wekala ñahi?

Yesu natalishi wanyi mukwila nindi Yehova Nzambi wudi neyi ona nsompeshi wabula kuloña. Nakukeña kuhosha nindi: Neyi nsompeshi wabula kuloña nateli kukwasha muntu wunakulomba chakadi kuleka, chakadi nikujina Nzambi wukukwashana. Waloña nawa wamuwahi dichi wukuyakula antu atwalekañahu kumulomba. Tunamoni chumichi mumazu anahoshiyi cheñi Yesu, nindi: “Inakuyileja nami, [Nzambi] wakanyakala kuyiyiñisha namuloña.”—Luka 18:8.

Antu adiwulawu niatuzweñi kakavulu ayisompelaña mwaheña ilaña antu akweti wuswa niaheta avula kuyiyiñisha. Ilaña dichekala Nzambi wanyi. Neyi mpinji yinashiki, wukababesha antu atama nawa ambuñindi wakayinka wumi wahaya nyaaka.

Hinyi wukweti chikuhwelelu neyi chamumbanda ntuluwa? Antu añahi akuhwelela chikupu nawu Nzambi “wakanyakala kuyiyiñisha namuloña”? Yesu nalumbululeña chitwatela kutwalekelahu kulomba. Kuhiñahu, Yesu nakonkomweni nindi antu atela kukuhwelela nawu kulomba kwawu akukwakula, nayihuli nindi: “Neyi Mwana kamuntu nashiki, komana wakawana ichi chikuhwelelu hanu hamaseki?” (Luka 18:8) Chuma chinakuhoshayi chidi chakwila nawu neyi Kristu nenzi wukawana antu antesha hohu diwu adi nachikuhwelelu chamuchidiwu.

Antu amakwawu anakumutiyilila Yesu adimonaña nawu akweti chikuhwelelu chikupu. Adikuhwelela nawa adimonaña kuloña, chakwila adiwulaña akwawu. Yesu naleji antu amuchidiwu ichi chakutalilahu nindi:

“Amayala ayedi ayili nakulomba mutembeli, wumu wadiña kaFwarisi, mukwawu wadiña mukakutambula nyisonku. KaFwarisi wemeni nakutachika kulomba mumuchima windi nindi, ‘Eyi Nzambi, nakusakilili muloña hinidi neyi antu ejimaku, adi neyi atupondu, abula kuloña, akawujila, hela neyi iwu mukakutambula nyisonku. Nashakamaña kayedi mumulungu chakadi kuda; nahanaña yamwikumi yayuma yejima yinekalaña nayu.’”—Luka 18:10-12.

 AFwarisi ayiluka nawu adimwekeshaña kudi antu amavulu nawu aloña. Elaña mwenimu kulonda azañaleshi antu. Ajiñajiñaña nanzala haChimu nihaChiwana, mafuku hekalaña antu amavulu kuyisankanu, kulonda ayimoni kudi antu amavulu. Ahanaña niyamwikumi yatunyitondu twanyanya. (Luka 11:42) Tukweji twantesha tunahitihu, amwekesheli chayidiwulawu antu nachahosheliwu nawu: “Idi izaza dabula kwiluka Nshimbi [kwesekeja nayitoñojoka yawaFwarisi] hiyantu ashiñewa.”—Yowanu 7:49.

Yesu natwalekihu nachakutalilahu chindi: “Ilaña mukakutambula nyisonku wemeneni hahalehi chanti, hakeñeleña nikufumbula mesu indi nakutalisha mwiwuluku, ilaña weteleña hantulu nakuhosha nindi, ‘Eyi Nzambi, ntiyili luwi, ami mukanshidi.’” Eña, iwu mukakutambula nyisonku nadizozi nawa neluki yiluwa yindi. Yesu nakunkululi nindi: “Inakuyileja nami, iwu iyala wayili kwitala dindi waloña chikupu kubadika ona kaFwarisi. Muloña muntu wejima waditoheshaña, akamusawula, ilaña muntu wejima wadizozaña, akamutohesha.”—Luka 18:13, 14.

Dichi Yesu nashimuni hatooka nindi muntu watela kwikala wadizoza. Iku kufumba kunateli kuyikwasha atumbanji twindi akulila mwiluña mwekala aFwarisi adimonaña kuloña nawa alemesha yifulu. Nawa iku kufumba kwalema kudi akakumulondela Yesu ejima.