Chakadi nikujina mwatiyaña kuwaha kutiya nsañu yayiwahi. Nawa kudi nsañu yayiwahi yimwatela kutiya enu niantaña jenu.

Iyi nsañu yayiwahi yekala muBayibolu, mukanda asonekeliwu yaaka yayivulu yinahitihu kudi Nleñi wayuma yejima, Yehova Nzambi. Muniwu mukanda, tukuhanjeka hanyikanda yiwana yamuBayibolu mwekala nsañu yayiwahi yatusonekelawu ejima wetu. Ayilukilaña kumajina awantu azatishiliyi Nzambi kuyisoneka, Matewu, Maku, Luka niYowanu.

Antu amavulu atenaña iyi nyikanda yiwana nawu Nyikanda yaNsañu Yayiwahi. Yejima yiwana yashimuna nsañu yayiwahi yaYesu, yakwila nawu, yena diyi njila yazatishayi Nzambi kuleta wamwinu nawa diyi Mwanta waWanta waNzambi wamwiwulu nawa Yesu wakaleta nkisu yahaya nyaaka kudi antu amukuhwelelaña.—Maku 10:17, 30; 13:13.

Hadaha mwatoñojokaña nenu muloñadi Nzambi choneneniyi nsañu yachihandilu chaYesu niyuma yatañishileñayi kuyisoneka munyikanda yiwana?

Kudi yuma yayiwahi yaletesha nsañu yahosheliyi Yesu niyeliliyi ayisoneki kudi antu awana. Tushimuni chakutalilahu, fwikijenu antu awana anemani kwakwihi nantañishi waya mpuhu. Iyala wunemani kumbidi yantañishi himukakutambula nyisonku. Kuchidilu chindi kudi ndotolu. Iyala wunakutiyilila kuchikasa chachimunswa himukakukwata inshi nawa hibwambu dantañishi chikupu. Nawa iyala wamuchiwana, wunemani kunyima, himukakutala nawa hikansi hadi awa ejima. Amayala ejima awana ashinshika nawa anakutiyilila munjila yambuka. Neyi ejima wawu asoneka nsañu yinakuhoshayi ntañishi niyuma yinakwilayi, iyi nsañu yiwana yikwikala yashiyashana chantesha. Neyi tutaña nsañu yejima yiwana, nakwanuka netu ayisonekeli kudi antu amweneña yuma chambuka, chikutukwasha kwiluka yuma yahosheleñayi ntañishi niyelileñayi. Chumichi chinakumwekesha chichinateli kutukwasha kwikala nanyikanda yiwana yachihandilu chaNtañishi Muneni, Yesu.

Kutwalekahu nachakutalilahu, ona mukakutambula nyisonku nakukeña kuleja antu akweti chitachi  chawaYudeya, dichi nakuñululi yuma yatañishileñayi hela yuma yeliliyi munjila yikukwasha antu anakusonekelayi. Ndotolu nashimuni chokileñayi antu akata niayifwayi, dichi nashiyihu nsañu yasoneka mukakutambula nyisonku hela nayishimuni mundonda yambukaku. Ibwambu dindi chikupu nakonkomweni hachatiyileñayi ntañishi niyilwilu yindi. Nsañu yeyala wakansi yayihi, yakushimuna hohu yikuma. Hela chochu, nsañu yanawa amayala yalala. Chumichi chikutukwasha kwiluka chichawahila kwikala nanyikanda yiwana yahosha hachihandilu chaYesu chichatukwashaña kwiluka yuma yeliliyi, yatañishiliyi niyilwilu yindi.

Antu ahoshaña nawu Nsañu Yayiwahi ‘hiNsañu yaMatewu’ hela ‘Nsañu yaYowanu.’ Diimu wanyi, muloña mukanda wejima wukweti “nsañu yayiwahi yaYesu Kristu.” (Maku 1:1) Hela chochu, munjila yikwawu, tukweti nsañu yayiwahi, yahosha hadi Yesu, munyikanda yiwana.

Atudizi amavulu Ezu daNzambi anasekeji nsañu niyuma yekala muMatewu, Maku, Luka niYowanu. Mu 170 C.E., nsoneki wakuSiriya Tatian niyena welili chochimu. Wamweni nindi iyi nsañu yekala munyikanda yiwana yoloka nawa yakwonena, nawa wasonekeli mukanda waDiatessaron, mukanda wesekeja nsañu yachihandilu chaYesu nimudimu wakushimwina.

Mukanda waYesu—Diyi Njila, Chalala, Wumi niwena dichiwuneli, ilaña munjila yasweja kwoloka nawa yayiwahi. Chinekali mwenimu muloña tuneluki chikupu kushikijewa kwawuprofwetu wawuvulu waYesu niyakutalilahu yindi. Chumichi chinololi yuma yahosheliyi niyeliliyi, kushilahu nindonda mwamwekeneni yuma. Akakuvumbujola niwena anatukwashi kwilukilaku yuma yikwawu nichamweneñawu ansoneki yuma. Hela chochu, bayi neyi tukukeña hohu yuma nawu chiña tuhu yejima yikali mundondaku. Ilaña mukanda waYesu—Diyi Njila, Chalala, Wumi wunalumbululi iyi nsañu munjila yayiwahi nawa mundonda.

Chimukutañaña nikudiluñisha iwu mukanda, anukeñuña nsañu yalema yinayisonekeliwu enu niantaña jenu. Anukenu nenu Yesu Kristu yomweni wamulejeli kapostolu Tomasi nindi: “Ami yami njila, chalala niwumi. Kwosi muntu wukwinza kudi Tata, chiña ahitila mudi ami.”—Yowanu 14:6.

Mukanda waYesu—Diyi Njila, Chalala, Wumi wukuyikwasha enu kwiluka Yesu chekalayi “njila.” Kuhitila hohu mudi yena dimu tunateli kumusolomokela Yehova Nzambi mukulomba. Kubombelahu, Yesu diyi njila yetu yakukundaminamu cheñi kudi Nzambi. (Yowanu 16:23; ARoma 5:8) Dichi, kuhitila hohu mudi Yesu dimu tunateli kwikalila nawubwambu wetejewa naNzambi.

Yesu diyi “chalala.” Wahosheleña chalala nawa welileña yuma yahosheleñayi; chadiña tuhu neyi chalala chenjili mudi Yesu. Washikijili wuprofwetu wawuvulu, wenjili nakwikala “‘eña’ muloña wayena.” (2 AKorinda 1:20; Yowanu 1:14) Wuprofwetu wamuchidiwu watukwashaña kwiluka mudimu wazatañayi Yesu hakushikija nkeñelu yaNzambi.—Chimwekeshu 19:10.

Nawa Yesu Kristu diyi “wumi.” Kuhitila mwifutu damuloña, kuhana wumi windi wawanina nimashi indi, watukwashili etu kulonda twikali ‘nawumi walala,’ dikwila nawu, “wahaya nyaaka.” (1 Timotewu 6:12, 19; AEfwesesa 1:7; 1 Yowanu 1:7) Wakekala cheñi “wumi” kudi yihita yawantu afwa dehi ilaña akasañulawu nakuchiñeja kwakushakama muParadisa haya nyaaka.—Yowanu 5:28, 29.

Wejima wetu twatela kusakililaña hamudimu wukwetiyi Yesu wakushikija nkeñelu yaNzambi. Mwani diluñishenu kudiza nsañu yaYesu—“njila, chalala niwumi.”