Amayala anafumi kuMusela. Hiyakakuhoña natutumbwa, amayala elukaña chendaña tutumbwa, ashimunaña nawu anateli kwiluka mwatalisha yuma yamwekanaña muyihandilu yawantu. (Isaya 47:13) Hampinji yadiñawu kumukala wawu kumusela amona kwakulehi “katumbwa” nawa akalondela, bayi kuBetelemiku, ilaña kuYerusalema.

Akakuhoña natutumbwa chinashikiwu, anehuli nawu: “Mwanta wawaYudeya wunavwaliki wudi kudihi? Muloña twamweni katumbwa kindi hitwadiña kuMusela, dichi tunenzi nakudifukula kudi yena.”—Matewu 2:1, 2.

Mwanta Herodi wakuYerusalema nachitiyi nawa nahili chikupu. Natambiki akulumpi jawatupristu niakulumpi jakwitiya jawaYudeya nawa nayihuli kwakavwalikila Kristu. Anakuli kushindamena haNsona nawu: “Betelemi.” (Matewu 2:5; Mika 5:2) Dichi Herodi nayileji kumbadi akakuhoña natutumbwa kwinza kudi yena nawa nayileji nindi: “Yenu mwakamukeñakeñi chikupu mwana wanyanya nawa neyi munamuwani, mwakafunti nakunleja kulonda ninami nakayi nakudifukula kudi yena.” (Matewu 2:8) Hela chochu, Herodi nakukeña kwiluka kudi mwana kulonda amujahi!

Hanyima yakwila akakuhoña natutumbwa ananyamuki, chuma chakuhayamisha chinamwekani. “Katumbwa” kamweniwu hampinji yadiñawu kumusela kanayi kumbidi yawu. Chakadi nikujina, aka hikatumbwa kakeni kitwelukaku, ilaña kanekaliku kulonda kayilomboli. Akakuhoña natutumbwa anakalondeli sampu nichikanemani hetala munakushakama Yosefu niMariya hamu nimwanawu.

Akakuhoña natutumbwa chineñiliwu mwitala, anamuwani Mariya namwana wanyanya, Yesu. Dichi awa amayala anamufukamini. Nawa anamwinki yawana yawuru, manaña evumba dadiwahi nimora. Kuhiñahu, chinakukeña kufuntawu kudi Herodi, anayisoñamishi muchilota kudi Nzambi kubula kufunta kudi yena. Dichi anayi kumukala wawu kuzatisha njila yacheñi.

Munakutoñojoka nenu hinyi waleteli “katumbwa” kayilombweli awa antu? Anukenu, hikashikeneni kuyitwala kudi Yesu muBetelemiku. Ilaña kayilombweli kuYerusalema, kwawaniniwu Mwanta Herodi, wakeñeleña kumujaha Yesu. Nawa mwamweni kachi wamujahili neyi Nzambi wabulili kuyisoñamisha akakuhoña natutumbwa kubula kumuleja Herodi kwadiña Yesu. Chakadi nikujina, kadiña kachilumbu chaNzambi, Satana, wakeñeleña kumujaha Yesu nawa wazatishili iyi njila kulonda ashikiji chuma chafwilileñayi.