Yosefu namuhindwishi Mariya kulonda amuleji nsañu. Kañelu KaYehova namwekani muchilota nawa namuleji nindi: “Nyamukaku, sendaku mwana wanyanya nimama yindi wutemukili kuEjipitu nawa wakashakamiku sampu nakuleji mwakwilila, muloña Herodi keña atachiki kumukeñakeña mwana wanyanya kulonda amujahi.”—Matewu 2:13.

Hohenohu, Yosefu, Mariya nimwanawu anatemuki nawufuku. Anatemuki mukunyakashana, muloña Herodi neluki nindi akakuhoña natutumbwa anamudimbi. Wayilejeli kufunta kudi yena nakushimuna mujimbu. Ilaña, anafumi mwituña chakadi kumuleja. Herodi nazuwi nankashi. Chineli nakukeñesha kumujaha Yesu, nahani lushimbi nindi anyana ejima adi muBetelemi nimunyikala yikwawu yanyeñumuka akweti yaaka yiyedi nakufunta mwishina atela kuyijaha. Nashimuni mwenimu kushindamena hayuma yamulejeliwu kudi akakuhoña natutumbwa afumini Kumusela.

Kujaha anyana anyanya ejima chadiña chuma chatama chikupu! Tuneluki wanyi kuvula kwanyana ajahiliwu ilaña makumbu nikutumpa kwawamama jawantu kunashikiji wuprofwetu wamuBayibolu washimwiniyi Yeremiya, kaprofwetu kaNzambi.—Yeremiya 31:15.

Ilaña haniyi mpinji, Yosefu nichisaka chindi anatemukili kuEjipitu nawa anatwalekihu kushakama kwenakuna. Kuhiñahu nawufuku wumu kañelu kaYehova namwekani cheñi kudi Yosefu muchilota. Kañelu namuleji nindi: “Nyamukaku, sendaku mwana wanyanya nimama yindi wuyi mwituña daIsarela, muloña antu akeñeleña wumi wamwana wanyanya afwa dehi.” (Matewu 2:20) Dichi Yosefu neluki nindi chisaka chindi chatela kufunta kumukala wawu. Chumichi chinashikiji wuprofwetu wukwawu wamuBayibolu, Mwana kaNzambi weyala anamutambiki kufuma muEjipitu.—Hoseya 11:1.

 Chinamwekani neyi Yosefu nakukeña nindi chisaka chindi chishakami muYudeya, hadaha kwakwihi namusumba waBetelemi, kwashakamineñawu henohu kanda atemukili kuEjipitu. Ilaña neluki nindi mwana kaHerodi watama Akelawusi diyi wunekali mwanta muYudeya. Muchilota chikwawu, Nzambi namusoñamishi Yosefu. Dichi Yosefu nichisaka chindi anayi kukabeta kakuchimunswa nakushakama mumusumba waNazareta wakuÑaliliya, kwakulehi namusumba waYudeya. Yesu nakulili muniwu musumba nawa ichi chinashikiji cheñi wuprofwetu wukwawu, wahosha nawu, “Akamutena nawu wakuNazareta.”—Matewu 2:23.