Himumpinji yachishika. Ichi dinu yinashikili dehi mpinji, yachisaka chaYosefu, kushilahu niamabwambu jawu niantaña jawu, yakuya kuYerusalema kwayañawu hachaaka-hachaaka. Ayaña kweniku nakuda Chipandakenu, neyi chahosha Nshimbi. (Kuhituluka 16:16) Kufuma kuNazareta nakuya kuYerusalema hadi makilomita kwakwihi na 120. Antu ejima anakudiloñesha kuya halwendu nawa anazañalali. Yesu, wudi nayaaka 12, nakutalila chikupu iyi mpinji yachawija nikwikala nakukoleka kwakwikala cheñi kwakwihi natembeli.

Kudi Yesu nichisaka chindi, Chipandakenu chefuku dimu hohu wanyi. Ifuku dalondelañahu hanyima yaChipandakenu didu ifuku datachikaña Chawija chaMankendi Akadi Iluñi chamafuku 7. (Maku 14:1) Ichi chawija nichena achililaña mumpinji yaChipandakenu. Elaña neyi afuma kumukala wawu kuNazareta, ashakamaña muYerusalema nawa afunta kumukala wawu nawa mwahitaña kwakwihi nanyilungu yiyedi. Ilaña achinu chaaka, muloña wachuma chinamwekani kudi Yesu, anashimbuliku chanti. Kukala anenzi nakukwiluka mpinji yinakufuntawu kuYerusalema.

Hampinji yinakufuntawu, Yosefu naMariya anakutoñojoka nawu Yesu wudi hamukanka wawantaña niamabwambu anakwendela kukabeta kakuchimunswa. Hela chochu, heluña danateekeliwu nawufuku, anamumoni wanyi. Dichi anayi nakumukeñakeña hakachi kawamabwambu jawu, ilaña hosiyi. Mwanawu anamuwani wanyi! Dichi Yosefu naMariya anafunti kuYerusalema nakumukeñakeña.

Anamukeñakeñi ifuku damukuma ilaña anamuwani wanyi. Nihefuku damuchiyedi anamuwani wanyi. Nkumininaku, hefuku damuchisatu, anamuwani mwanawu mutembeli, mudi tupeka twatuvulu. Anamoni Yesu nashakami hakachi kawantañishi aYudeya. Nakutiyilila nakwihula malwihu nawa nayihayamishi nayuma yelukayi.

Mariya namwihuli nindi: “Eyi mwana, wunatukabishilidi? Ami nitata yeyi tunakukeñakeñi chikupu.”—Luka 2:48.

Yesu nahayami hakwiluka nindi eluka wanyi kwadiñayi. Nayihuli nindi: “Mwankeñelañadi? Komana himweluka nenu natela kwikala mwitala daTata yamiku?”—Luka 2:49.

Chineli anekali hamu, Yesu nafunti kumukala wawu kuNazareta hamu naYosefu niMariya nawa natwalekihu kuyovwahila. Natwalekihu kukula namaana nimuchiminu. Hela chakwila wuchidi kansi, anakumutiya kuwaha kudi Nzambi niantu. Mwamweni, kufuma kuwansi windi, Yesu namwekeshi chakutalilahu chachiwahi kuhitila mukukeña yuma yakuspiritu nikwovwahila anvwali jindi.