Hanyima yakwila kañelu Gabireli namuleji kansi wamumbanda Mariya nindi wakavwala mwana weyala wakatumbayi nindi Yesu nawa wakayula neyi Mwanta haya nyaaka, Mariya namwihuli nindi: “Chumichi chakamwekana ñahi, chineli ami hinnakukaama neyalaku?”—Luka 1:34.

Gabireli namwakuli nindi: “Spiritu yajila yakenza hadi eyi nawa ñovu yaMukakubadika Chikupu yakakubuta. Hamuloña wachumichi, owu wakavwalika akamutena nawu wajila, Mwana kaNzambi.”—Luka 1:35.

Hakwila amukwashi Mariya kwiteja nsañu yinakumulejayi, Gabireli nabombelihu nindi: “Tiyaña! Elizabeta ntaña yeyi elukawu nawu hinshinta, niyena nabaabi mwana weyala muwushinakaji nawa kanu dikakweji kamu 6; muloña kwosi chuma chahoshañayi Nzambi chabulaña kushikijayiku.”—Luka 1:36, 37.

Mariya neteji munahoshiyi Gabireli, neyi chitukumona muñakwilu yindi, nahoshi nindi. “Talaña, ami nduñu yaYehova wamumbanda! Lekaku chimwekani kudi ami kwesekeja nachiwunahoshi.”—Luka 1:38.

Gabireli chinayiyi, Mariya nadiloñeshi kuya nakumuhempula Elizabeta, washakamaña nanfumwindi Zekariya, kukapidi kaYudeya kwakwihi naYerusalema. Kufuma kwitala daMariya kukanduka kuya kuNazareta, hadi chintampu chakwenda mafuku asatu hela awana.

Nkumininaku Mariya nashiki kwitala daZekariya. Hanakwiñilayi mukachi, namwimushi ntaña yindi Elizabeta. Hohenohu, Elizabeta nenzali naspiritu yajila nawa namuleji Mariya nindi: “Eyi wakiswilewa hakachi kawambanda nawa mwana iwukavwala wakiswilewa! Indi ami nekali ñahi naniku kukooleka chakwila mama yaMwanta wami enzi kudi ami? Muloña tiyaña! chinatiya hohu kwimusha kweyi, mukeki wudi mwivumu dami watuntoka namuzañalu.”—Luka 1:42-44.

Kuhiñahu Mariya namwakuli namuzañalu nindi: “Wumi wami wunamutuumbakeshi Yehova, nawa muchima wami wunakuzañalala nankashi naNzambi Chamwinu chami, muloña namushinshiki nduñu yindi wamumbanda wakehelamu. Muloña tiyaña, kufuma dalelu makiñu ejima akantena nawu nidi namuzañalu, muloña Mukañovu nankoñeli nyidimu yamaneni.” Tunamoni netu hela chakwila namulemeshi, Mariya nahani kalemesha kejima kudi Nzambi. Nahoshi nindi: “Ijina dindi dajila, luwi lwindi lwekalaña hadi antu amutiyaña woma kufuma kwikiñu dimu nakushika kwikiñu dikwawu.”—Luka 1:46-50.

Mumazu awuprofwetu onenewa, Mariya natwalekihu nakumushimeka Nzambi nindi: “Napalañeshi antu adivwimbaña munyichima yawu nayuma yafwilañawu. Nafumishi akañovu hamatanda nawa natoheshi adikehesha; antu adi nanzala nayikutishi chikupu nayuma yayiwahi, nawa antu adi namaheta nayihañi makasakasa. Namukwashi kambuñindi Isarela, nakwanuka luwi lwindi, neyi chahosheliyi nawankakulula jetu, Abarahama nianyanindi, haya nyaaka.”—Luka 1:51-55.

Kwakwihi natukweji tusatu, Mariya nashakami naElizabeta, hadaha nakumukwashaku tunyidimu muniyi nyilungu yakukumishaku hakwila Elizabeta apaapi. Chinawahi nankashi chineli awa ambanda ayedi ashinshika, anemiti nawukwashi waNzambi, anekali hamu haniyi mpinji muchihandilu chawu!

Nawa talenu kalemesha kamwinkeleñawu Yesu nihachidiñayi kanda avwaliki. Elizabeta wamuteneni nindi “Mwanta wami,” nawa mukeki wudi mwivumu dindi ‘watuntokeleña namuzañalu’ chashikili Mariya. Chumichi chinambukiku chikupu nachikamumonañawu Mariya nimwanindi wakavwalika kudi antu, neyi chitukumona.