Yesu nakukulila muNazareta, musumba wanyanya, wabula kulema. Iwu musumba wudi kukabeta kakuchimunswa, kukapidi ketuña kamwiluña mwatenañawu nawu muÑaliliya, kumujiika wejiya deneni datenañawu nawu Kaluñalwiji kaÑaliliya.

Hadaha chinashikijiyi yaaka yiyedi, Yesu anamuleti kunidi iluña kufuma kuEjipitu kudi Yosefu naMariya. Chinamwekani neyi haniyi mpinji, diyi mwana akwetiwu hohu. Hela chochu, mukuhita kwampinji amanakwindi akuwanamu anavwaliki, Yakoba, Yosefu, Shimona niYudasi. Yosefu naMariya anavwali cheñi anyana awambanda, ahela jaYesu akuwanamu. Ichi, Yesu nekali nawanyiki jindi 6 awamayala niawambanda.

Kafwampi, Yesu wudi cheñi nawantaña amakwawu. Tweluka dehi nsañu yaElizabeta nimwanindi, Yowanu. Washakamaña kwakulehi, kukabeta kakuchimunswa muYudeya. Salomi diyi wunakushakama kwakwihi naÑaliliya, muhela aMariya nawa mama yaYesu wakansi. Nfumwa Salomi diyi Zebedewu. Anyanawu ayedi awamayala aYakoba naYowanu, chinamwekani neyi diwu asonyi jaYesu awakulumpi. Tuneluki wanyi neyi chakwila Yesu wahemaña nanawa atwansi awamayala mpinji yinakukulawu ilaña nkumininaku anekali amabwambu jaYesu ahamuchima, nawa ichi hiyapostolu aYesu.

Yosefu nakuzata nañovu kulonda yakwasheña chisaka chindi chinakutohelaku. Himukakusoña. Yosefu nakumukulisha Yesu neyi mwanindi wakudivwela, dichi Yesu anakumutena nawu “mwana kamukakusoña.”  (Matewu 13:55) Yosefu namudizishi Yesu niyena mudimu wakusoña, nawa neluki. Chimwahitili mpinji antu atachikili kumutena Yesu nawu: “Mukakusoña.”—Maku 6:3.

Chihandilu chachisaka chaYosefu chinashindameni hakudifukula kudi Yehova. Hakwila alondeleña Nshimbi yaNzambi, aYosefu naMariya akukwashaña anyanawu kuspiritu ‘hampinji yinashakamiwu mwitala dawu, hampinji yinakwendawu munjila hampinji, yinakamiwu niampinji yinakuhindukawu.’ (Kuhituluka 6:6-9) MuNazareta mwekala Sinagogi. Chakadi nikujina, Yosefu dikwatwalañayi chisaka chindi nakudifukula. Nkumininaku ahosheli nawu: “Neyi chochelileñayi hefuku daSabata,” Yesu wayili kusinagogi. (Luka 4:16) Chisaka cheñi mpinji yejima chatiyileña kuwaha kuya kutembeli yaYehova kuYerusalema.