Mariya wudi nevumu datukweji tuwana. Neyi chimunakwanuka, mutukweji twakusambila twemitiliyi wayili nakuhempula ntaña yindi Elizabeta kutupidi twamuYudeya kukabeta kakuchidiilu. Ilaña ichi Mariya nafunti dehi kumukala wawu kuNazareta. Iku kunenziyi, antu ejima akwiluka nawu wudi nevumu. Toñojokenu chumichi chichinamwakamishi!

Chinaleteshi asweji kwakama, chidi chakwila nawu Mariya amwota kudi mukakusoña wejina daYosefu wamunidi iluña. Nawa Mariya weluka nindi kwesekeja naNshimbi jaNzambi jayinkeliyi aIsarela, mumbanda otawu kudi iyala wumu ilaña akaama neyala wacheñi atela kumwasa malola nakumujaha. (Kuhituluka 22:23, 24) Hela chakwila Mariya hakaaminihu neyala wacheñiku, hadaha nakameni chatela kulumbululayi nsañu yevumu dindi kudi Yosefu nichuma chikumwekana.

Munahiti dehi tukweji tusatu kufuma hayiliyi Mariya, dichi tunakuhweleli netu Yosefu nakufwila chikupu kumumona. Chinadiwaniwu, Mariya namuleji Yosefu chuma chinamumwekeni, nadinkiku nakumulumbulwila nindi idi ivumu wadimitili naspiritu yajila yaNzambi. Hela chochu, neyi chimuneluki, iyi hinsañu yakala nankashi kudi Yosefu kwiteja nikukuhwelela.

Yosefu wamwiluka Mariya nindi himumbanda wamuwahi nawa antu amwiluka nawu wekala nayilwilu yayiwahi. Nawa wamukeña nankashi. Hela chochu, hichikweti muloña nachinakulumbululayiku, Yosefu wuchidi kumona nindi amwimitishili kudi iyala wacheñi. Yosefu hanakukeña nindi Mariya amwasi malola nakumujaha hela kumutiyisha nsonyi hamesu awantu amavuluku; dichi, nafuukulihu kumuseñela kumbadi. Munana mafuku, antu anadooti ayimweneña neyi adisumbula, nawa ateleleli kudiseña hakwila kudoota kwawu kumani.

 Chimunahiti mpinji, iku Yosefu wuchidi kutoñojoka haniyi nsañu, nayi nakukaama. Kañelu kaYehova namwekani kudi yena muchilota nakumuleja nindi: “Bayi wutiya woma kumusenda ñodeyi Mariya kwitalaku, muloña nemiti idi ivumu naspiritu yajila. Wakavwala mwana weyala, nawa eyi wakamutuumba neyi Yesu, muloña diyi wakaamwina antu jindi kunshidi jawu.”—Matewu 1:20, 21)

Yosefu chinahindukiyi, natiyi kuwaha muloña natiyishishi iyi nsañu! Hanalabajali kwila munamulejiwu kudi kañeluku. Namusendi Mariya kwitala dindi. Chumichi chinamwekeshi hatooka nawu aYosefu naMariya ichi anadisumbuli. Hela chochu, Yosefu hanakubulakanahu naMariya hampinji yidiyi nachisenda chaYesuku.

Chimunahiti tukweji, aYosefu naMariya, wudi kwakwihi nakupaapa, atela kudiloñesha kulonda afumi mumukala wawu muNazareta. Anakukeña kuya kudihi henohu Mariya wudi kwakwihi nakupaapa?