Munahiti dehi yaaka 17 kufuma hadiñayi Yesu nayaaka 12 ehwileñayi antañishi malwihu mutembeli. Ichi himpinji yachishika muchaaka cha 29 C.E. Antu amavulu anakuhosha hadi ntaña yaYesu Yowanu, owu wunakushimwina mwituña dejima kumujika waKaloña Yodani.

Yowanu hiiyala wamuwahi nankashi mummwekenu nimunhoshelu. Yakuvwala yindi yakutuña namavuji angameli, nawa wavwalaña mushipi wachitembi mumbunda yindi. Wadaña tubola, dikwila nawu muchidi wampasu niwuchi. Nsañwinyi yinakushimwinayi? “Balumukenu munyichima, muloña Wanta wamwiwulu wunaswini dehi kwakwihi.”—Matewu 3:2.

Nsañu yinakushimwinayi Yowanu yinayitiyishi antu kuwaha anenzi nakumutiyilila. Amavulu aneluki nawu atela kubalumuka munyichima, dikwila nawu kuhimpa yilwilu yawu, nakuleka yuma yatama. Antu anakwinza kudi yena anakufuma ‘muYerusalema, muYudeya mwejima nimumatuña ejima ananyeñumuki Yodani.’ (Matewu 3:5) Antu amavulu anakwinza kudi Yowanu anakubalumuka munyichima. Wayipapatishaña, wayijimikaña mumenji amuYodani. Muloñadi?

Wayipapatishaña nakumwekesha nawu anabalumuki chikupu munyichima, nakuleka nshidi jawu jakufumpa chitiyañenu chaNshimbi jaNzambi. (Yilwilu 19:4) Hela chochu, bayi neyi ejima anashikihu kupapatishewaku. Akulumpi jakudifukula amakwawu, aFwarisi niaSadusi, chanenziwu kudi yena, Yowanu nayiteni nindi “anyana katubandayuula.” Soñenu nyikaabu yinakumwekesha nawu munabalumuki munyichima. Bayi mutoñojoka nakuhosha nenu, ‘Tukweti tata yetu Abarahamaku.’ Muloña inakuyileja nami Nzambi nateli kumufumishila Abarahama anyana munawa malola. Chizembi chidi dehi kunyiji yanyitondu. Dichi, mutondu wejima wabulaña kusoña nyikaabu yayiwahi atela kuwutema nakuwunatila mukesi.”—Matewu 3:7-10.

Chineli Yowanu anakumutiyilila nankashi, wudi nansañu yalema nawa nakupapatisha antu amavulu, atupristu niAlevi anayitemeshi kuya nakumwihula nawu: “Yeyinyi?”

Yowanu nashimuni nindi: “Hiyami Kristuku.”

Anamwihuli nawu: “Hanu dinu yeyinyi? Yeyi Elija?”

Nayakuli nindi: “Yami wanyi.”

Anamwihuli nawu, “Yeyi Kaprofwetu tahindi?” nakumwekesha nawu diyi Kaprofwetu Muneni wateneniyi Mosi nindi wakenza.—Kuhituluka 18:15, 18.

Yowanu nakuli nindi: “Inehi.”

Anamwihwishi nawu: “Yeyinyi dinu? Tuleji kulonda twakayileji owu atutemesha. Eyi aweni waditenaña neyi yeyinyi?” Yowanu nahoshi nindi: “Yami izu danowu wunakubidika mwisaña nindi, ‘Ololenu njila yaYehova,’ neyi chahosheliyi kaprofwetu Isaya.”—Yowanu 1:19-23.

Anakukeña kwiluka “Hanu dinu, muloñadi chiwapapatishilaña neyi hiyeyi Kristu hela Elija hela Kaprofwetuku?” Nayakuli nindi: “Ami napapatishaña mumenji. Mukachi kenu munemani muntu imwabula kwiluka, owu wunakwinza hanyima yami.”—Yowanu 1:25-27.

Eña, Yowanu neluki nindi nakuloñesha njila kulonda akwashi ashimwineñahu dehi nawu diyi Mesiya, wakekala Mwanta. Kutalisha hadi yena, Yowanu nahoshi nindi: “Owu wunakwinza hanyima yami wukweti wuswa chikupu kubadika ami nawa ami nashikilimu wanyi kusubula nkwabilu jindi.” (Matewu 3:11) Kafwampi, Yowanu nahoshi cheñi nindi: “Owu wunakwinza hanyima yami wambadika ami, muloña yena wadiñaku dehi henohu ami kanda.”—Yowanu 1:15.

Dichi, nsañu yinakushimwinayi Yowanu nindi: “Balumukenu munyichima, muloña Wanta wamwiwulu wunaswini dehi kwakwihi,” yatelela. (Matewu 3:2) Yinakuyanukisha antu nawu mudimu waMwanta wunakutemeshayi Yehova, Yesu Kristu, wunakwinza.