A Yinsahu jaYehova anakutambwila yakuda yakuspiritu yayivulu kuzatisha yozelu kubadika chichadiña kunyima. Ilaña mumatuña amavulu mwekala amanakwetu akañanyaña kulanda mambandozi akuzatisha haIntanenti. Amakwawu ashakamaña mumaluña mwavula kuya Intanenti, muyabulaña kuzatika chiwahi hela mwabula Intanenti.

 Hela chochu, amanakwetu niahela amavulu ichi anakuloñolola nyikanda chakadi Intanenti. Anakutwesha ñahi?

 JW Box hikachikasha kanyanya kanaloñesheliwu yipompelu yabula Intanenti. Kakweti wayifayi yalandiliwu kukampanyi yakwituña, nisoftware yawahishawu chiwahi kudi Dipatimenti yamaKompyunta yahaBeteli nawa kadi nyikanda nimavidiyo adi ha jw.org. Kabokisi kamu akilandileña na $75 U.S.

 Hetala daWanta amanakwetu niahela asokankeshaña yozelu yawu ku JW Box nakuloñolola nyikanda nimavidiyo. Niantu akweti yozelu yinashimbuli hela yawuseya wantesha anateli kusokankesha. Hanu neyi hachipompelu hosi Intaneti, JW Box yinateli kwikala ñahi nanyikanda yayiha yinatudikiwu? Kasanji kamutayi katemeshaña mafulashi alandileñawu yimu na $4 U.S. mwashañawu yuma yayiha yatudikañawu ha jw.org yinateli kusokankeshawu ku JW Box.

 Indi JW Box yinakwashi ñahi amanakwetu? Nathan Adruandra tata yawantu washakamaña kuDemocratic Republic of Congo, walumbulwili nindi: “Nesekeli hadi mpinji yayilehi nami niloñololi yimwenu, chidi neyi ‘Eyi Yehova, . . . Yeyi Inakuhwelela’ nawa ‘nichaAnukenu ñoda Loti.’ Ilaña nakañenyeña nawa chaneñesheleña. Ilaña chayinu mpinji inakuloñolola awa mavidiyo kuzatisha foni yami nawa chinakutukwasha etu anvwali kudizisha anyanetu chiwahi.”

 Manakwetu wakwashaña yipompelu yamuNigeria kusha JW Box wahosheli nindi: “Amanakwetu anakumona iyi JW Box nawu hichawaana chinayinkiyi Yehova. Ichi adi namuzañalu hakumona nawu anateli kuloñolola chiwahi nyikanda nimavidiyo kufuma muChikasha chetu chaYozelu.”

 Amanakwetu amavulu muAfrica, muOceania, nimuSouth America, anayitumini ma JW Box kubadika ha 1,700 nawa anakufwila nikuyitemesha muyipompelu yikwawu yayivulu. Mali alandañawu iyi yozelu afumaña kudihi? Kuyawaana yahanañawu yamudimu wamukaayi kejima yahaninañawu ha jw.org. Kusakililaku mwani hayawaana yenu yimwahanaña.