Mavidiyo ahakupompa kweluña atwishikaña hanyichima nawa atukwashaña kutiyishisha ntañishilu yamunsona. Kupompa kweluña kwamu 2020 kunakwila nawu ‘Zañalalenuña Mpinji Yejima’! kwadiña namavidiyo 114 kushilahu nimampanji 43 ahanawu kudi amanakwetu Amwizanvu Dalombolaña, hamu niankwashi jawu. Mwatoñojokahu dehi hakutoha kwamudimu nimali azatishañawu hakwila edishi awa mavidiyo?

 Amanakwetu niahela kwakwihi na 900 mukaayi kejima adihanini kuzataku mudimu wakwidisha iyi progiramu. Neyi kubomba maora iyazatiliwu iwu mudimu wakuzata hadi yaaka yiyedi nakubadikahu ashikili kwakwihi na 100,000. Munawa maora mudi nimaora 70,000 iyazatililumu mudimu wejima wakwidisha chimwenu chamuBayibolu chamamineti 76 chinakwila nawu Nehemiya: “Muzañalu waYehova Diyi Ñovu Yenu.”

 Neyi chimuneluki kwakeñekeleña mali amavulu hakwila nawu akameni amanakwetu niahela adihanini kuzata iwu mudimu, kushilahu nikuloñesha yozelu yakuzatisha nimaluña mwakuzatila iwu mudimu wejima kushika tuhu nichiwamanini

 Kometi yadizishaña yeZanvu Dalombolaña yinakukeña mumavidiyo etu amwekesheñamu yisemwa nimaluña amboka-mboka. Manakwetu Jared Gossman wazatilaña kudipatimenti yakwataña mazu nikukopa nyevulu yamumavidiyo wahosheli nindi: “kwila mwenimu chachiwahi muloña chinakutukwasha kwiluka chihandilu chawamanakwetu niahela mukaayi kejima. Hakwila tumanishi kuzatiwu mudimu mazanvu 24 awamanakwetu kufuma mumatuña 11 amboka-mboka mukaayi azatilili hamu. Kwakeñekeleña mali amavulu hakwila nawu amanakwetu mukaayi kejima azatili hamu.

 Hakwila twidishi mavidiyo amavulu kwakeñekeleña yozelu yashikila nawa yatelela. Chakutalilahu yuma yakeñekeleña hakwidisha chimwenu chinakwila nawu Nehemiya: “Muzañalu waYehova Diyi Ñovu Yenu” ayishili mwitala dakukwatila mazu nikwidishila mavidiyo da Mt. Ebo dekala kwakwihi naPatterson, muNew York, U.S.A. Hakwila nawu tuzatishi chiwahi mali hampinji yoyimu nikwidisha chimwenu chikumwekesha nsañu yakunyaaka kwesekeja nachiyadiña, amanakwetu azatishili tuyuma twesakana nawa twadifwana kulonda atuñi chuma chakufwikija nachu mbañu yaYerusalema. Mbañu nimbañu yaleheli mamita 6 (hela netu 20 ft) nawa yadiña yakutuña nanyitondu nawa ayilambwijili nayuma yamwekeneña neyi malola. Azatishileña jimbañu jojimu heluña hejima hakeñekeleña kumwekesha jimbañu kulonda kukeheshaku namba yajimbañu jakeñekeleña. Hela chochu mali akushika kwakwihi na $100,000 (U.S.) akeñekeleña hakwila nawu edishi ichi chimwenu hohu. *

 Chituneluki iyi nsañu kutalisha hachiyedishiliwu progiramu yakupompa kweluña kwachinu chaaka chinatukwashi kusakilila. Tuneluki chikupu netu mudimu wazatiliwu amanakwetu hakwidisha iyi progiramu wukuletesha antu mukaayi kejima kumushimeka Yehova. Tunakuyisakilila hayawaana yakudikeñela yimwahanaña kuzatisha jw.org ninjila jikwawu jakuhaninamu.