Kumatachikilu ayaaka yamuma 1930 aYinsahu jaYehova adiña kanda ashimwineñahu dehi muIndonesia, muMalaysia, nimwituña dinakutenawu chayinu mpinji nawu Papua New Guinea. Hanu dinu nsañu yayiwahi yadi kushika ñahi munawa matuña? Hakwila nawu atwali iyi nsañu munawa matuña kasanji kamuAustralia (kiyanakutenawu chayinu mpinji nawu kasanji kamuAustralasia) kalandili watu waleheli mamita 16 (dikwila nawu 52 ft). Iwu watu awuteneneña nawu watu waLightbearer muloña awuzatishileña kudi apayiniya, * kutwala nachu chejeji chakuspiritu kumaluña akwakulehi.—Matewu 5:14-16

Mu February 1935, Izanvu dawamayala 7 dendeli nawatu kufuma kuSydney nakuya kukabeta kakuchimunswa, nkumininaku afumini kumukulishu wakumusela waAustralia nakuya kumbaka yekala hachitutu muNew Guinea. Hiyayileñawu akwatileña ninshi nawa emeni hayitutu yayivulu nakulanda yakuda, manji nikuloñesha watu. Ha April 10, 1935, afumini muCooktown, muQueensland. Azatishili engine yawatu hakuhita hamaluña atama ahakaluñalwiji. Ilaña engine yatachikili kuleta mpumba nawa ayijimini. komana akufuntamu tahindi akutwalekahu kuya kuNew Guinea? Manakwetu Eric Ewins, walombweleña idi izanvu wahosheli nindi: “twakeñeleña kufunta wanyi.” Dichi watu wuyateneneñawu nawu watu waLightbearer washikili hohu chiwahi mumbaka yekala hachitutu haApril 28, 1935.

Hampinji yadiña nakuloñeshayi mukwakuloñesha watu, idi izanvu kufumishaku manakwetu Frank Dewar, dashimwinini hanichi chitutu. Manakwetu Frank iyateneniwu kudi iyala wumu nawu “payiniya wadikita,” wahosheli nindi ‘Nasendeli chiteli chanyikanda nakuyitwalila apayiniya nawa nendeli hadaha hadi makilomita 32 [hela mamayilu 20] chili kubadikahu.’ Hakufunta wazatishili njila yacheñi, muniyi njila mwadiña kaloña kadiña najiñandu. Ilaña wahitili nawa washikili hohu chiwahi mumbaka. Idi izanvu chidazatili nañovu mumudimu wakushimwina mwafumini yuma yayiwahi. Antu amakwawu atambwili nyikanda yahoshaña hansañu yamuBayibolu, mukuhita kwampinji ekalili aYinsahu jaYehova.

Chamanishiliwu kuloñesha engine yawantu waLightbearer, iwu watu wafumini hanichi chitutu nakuya kuchitutu chaJava kumusela waIndies kwahoshañawu idimi daDutch (kunakutenawu nawu Indonesia). Hanyima yakwimana hamaluña amboka-mboka nakulanda yuma yakeñekeleña idi izanvu demeni muBatavia (iluña diyanakutenawu chayinu mpinji nawu Jakarta) haJuly 15, 1935.

Chiyashikiliwu, Manakwetu Charles Harris wafumini muwatu waLightbearer nakutachika kushakama muJava, nawa watwalekelihu kushimwina nsañu yayiwahi neyena munidi iluña. * Wahosheli nindi “munana mafuku, mudimu wetu wakushimwina washindameneni nankashi hakuhana nyikanda yashindamena haBayibolu nawa nkumininaku kuya mujimbaka jikwawu. Nasendeli nyikanda mwidimi daArabic, Chinese, Dutch, English, nimwidimi damuIndonesia. Antu etejeli chikupu nyikanda yetu, dichi nahanini nyikanda yakushika ku 17,000 muchaaka chimu.”

Akwawuswa amunidi iluña amwilukili Charles muloña weyena dadiñayi nadu mumudimu wakushimwina. Kapokola wumu wamwihwili Chinsahu wumu washimwinineña muJava, kuvula kwawaYinsahu ashimwinineña kumusela waJava, kwadiñileñayi manakwetu Charles. Manakwetu wamwakwili nindi: “Kudi Chinsahu wumu hohu.” Iwu kapokola wahosheli nezu dahewulu nindi: “Wunakutoñojoka neyi nukwiteja?.” “Mudi nawantu amavulu anakushimwina kuna, muloña namoni nyikanda yayivulu yinakuhanañawu.”

Chiyafuminiwu muIndonesia watu waLightbearer wayili kuSingapore, nawa ashikili haAugust 7. Hamaluña ejima hiyemeneñawu amanakwetu avumishileña jimpanji jakukwata dehi kuzatisha yihoshelu yamuwatu yavumaña nañovu. Iyi njila yazatishiliwu kushimwinamu nsañu yayiwahi yakwokweli antu amavulu. Nawa muchipapilu chansañu chaSingapore Free Press asonekelumu nawu “antu atiyili izu datiyakana nankashi dafuminineña kumenji hachisatu nawufuku,”abombelelihu nawu: “dadiñi izu dajimpanji jadimena javumineña muwatu ‘waLightbearer,’ iwu watu watiyakesheleña maprogiramu awaWatch Tower kufuma hiwafumini kuAustralia nakwinza muSingapore.” Iyi lipoti yahosheli cheñi nawu neyi mpepela yidi chiwahi awa maprogiramu anateli kutiyakana hamaluña amalehi mamayilu 2 hela 3 [hela makilomita 3 nakushika ku 4].”

Hadiña watu waLightbearer muSingapore, manakwetu Frank Dewar watachikili kuzata mudimu wawuha wumwinkeliwu. Wanukili mpinji yanyamukiliyi nindi: “Twatachikili kuzata wupayiniya muSingapore iku tunakushakama muwatu. Chashikili mpinji yakwila nawu watu waLightbearer wunyamuki, manakwetu Eric Ewins wanhayamishili chikupu. Chelili yahoshi nindi: ‘Frank, watondeli siam (yinakutenawu chayinu mpinji nawu Thailand) kwikala iluña deyi dakushimwinamu. Hanu dihu hitukukushila. Ichi dinu yaña!’ Nakañenyi nichakuhosha: ‘Ilaña, chankalili kwiluka kwadiña siam kufuma kunu!’” Manakwetu Eric wamulejeli manakwetu Frank nindi nateli kukandama masuwa yafumaña kuKuala Lumpur, kuyanakutenawu chayinu mpinji nawu Malaysia. Frank welili mwamulejeliwu wakandamini masuwa yafumineña kuKuala Lumpur nakushika muThailand hanyima yatukweji twatuvulu. *

Chiwanyamukili nakuya kuchikumu chakumujika waMalaysia, Watu waLightbearer wemeni haJohore Bahru, muMuar, muMalacca, muKlang, muPort Swettenham (hela neyi chayinu mpinji nawu muPort Klang), nimuPenang. Hamaluña ejima hiyemeneñawu idi izanvu davumishileña mpanji jamuBayibolu jakukwata dehi kuzatisha yihoshelu yañovu yadiña muwatu. Jean Deschamp Chinsahu wazatilileña muIndonesia hayina mpinji, wahosheli nindi: “Antu ashileña nankashi maana kuwatu kubadika chiyadi kushawu maana kuflying saucer neyi niyena yawilili haniyi mpinji.” Hanyima yakuvumisha jimpanji idi izanvu dayileña kuchikumu chakaluñalwiji nakuhana nyikanda kudi antu.

Idi izanvu chidafumini nawatu muPenang, dahitili muMalacca nakuya kuMedan, muSumatra (chayinu mpinji idi iluña dekala muIndonesia). Manakwetu Eric Ewins wanukaña nindi “twatiyili kuwaha nawa twadiluñishili kushakama munkambi yaMedani, muloña antu amavulu, atambwilileña nsañu yayiwahi.” Amanakwetu ahanini nyikanda yakushika ku 3,000 mudina iluña.

Iwu watu Lightbearer chiwatwalekelihu kuya dakabeta kakuchidiilu, amanakwetu adiña muniwu watu ashimwinini hanyihoñi yamaneni yekala kumusela waSumatra. Mu November 1936 Iwu watu wafuntili kuSingapore, kwamushiliwu manakwetu Eric Ewins. Hahitili hohu nyilungu yantesha iwu manakwetu wasumbwili muhela Irene Struys, Chinsahu washakamineña muSingapore. Wejima wawu aEric naIrene atwalekelihu kuzata mudimu wawupayiniya muSumatra. Dichi watu waLightbearer wakeñekeleña mukwakuwendesha.

Mukwakwendesha watu wamuha wadiña Norman Senior, iyadizishiliwu chakwendesha watu. Washikili muJanuary 1937 kufuma kuSydney. Idi izanvu dafumini nawatu kuSingapore nakuya kuBorneo nikuCelebes (iluña diyanakutenawu nawu Sulawesi), kuyashimwininiwu mumaluña amavulu nawa endeli makilomita 480 (hela netu mamayilu 300) heseki dawuma.

Watu waLightbearer chiwashikili kumuhoñi waSamarinda, muBorneo, mukulumpi wakunidi iluña wakanishili amanakwetu kushimwina kudi antu ashakamaña haniwu muhoñi. Hela chochu, manakwetu Norman chamulumbulwililiyi chekala mudimu wetu wakushimwina iwu mukulumpi wayitejeli nawa watambwiliku ninyikanda yetu.

Ifuku dimu mukulumpi wamunsakililu wamutambikili manakwetu Norman kuya nakuhana mpanji muchechi yindi. Chatela yahani mpanji, manakwetu Norman wavumishili mafonigirafi 5 ajimpanji jamuBayibolu jakukwata dehi, Nawa iwu mukulumpi wansakililu watiyili kuwaha. Chakwila wansendeliku ninyikanda yimu nakwinkaku amabwambu jindi. Iwu mukulumpi wansakililu diyi hohu hadi akulumpi jansakililu ejima wakeñeli nsañu yayiwahi. Akulumpi jansakililu akeñeli wanyi mudimu wazatileña aYinsahu jaYehova. Nawa atiyili kutama hakumona izanvu dawamanakwetu endeleña nawatu chiyashimwinineñawu neyena chakwila atachikili kufukeja kudi akwawuswa kulonda alekeshi watu waLightbearer kuya kunyihoñi yikwawu.

Mu December 1937 chelili akwawuswa alekeshi mudimu wetu muloña wakafukeja kawakulumpi jansakililu, amanakwetu afuntili kuAustralia nawatu waLightbearer. Idi izanvu demeneni hamuhoñi waSydney kulonda awanikiku kukupompa kweneni kwawaYinsahu jaYehova muApril 1938. Hadiña hahita dehi yaaka yisatu kufuma hiyafumininiwu hanidi iluña nawatu waLightbearer. Watu awulandishili kumatachikilu ama1940, chelili mudimu wawaYinsahu awulekeshi muAustralia. Manakwetu Ewins wahosheli nindi; “chakadi nikujina watu waLightbearer wazatili mudimu wuyawulandililiwu” wateneni cheñi yaaka yazatiliyi mudimu wakushimwina kuzatisha iwu watu nindi “yadiña yaaka yamuzañalu muwumi wami.”

Izanvu dendeleña nawatu waLightbearer dakuwili mbutu yansañu yawanta mumaluña mwekala antu amavulu. Hela chakwila ayikañesheleña, mudimu wazatiliwu waletesheli antu amakwawu kwikala ayinsahu. (Luka 8:11, 15) Nawa, chayinu mpinji mumaluña mwashimwiniñeñawu awa apayiniya, mudi akwakushimwina awanta akubadika ha 40,000. Owu muzañalu wutukweti hakumona yuma yayiwahi yinafumi mumudimu wazatiliwu awa amanakwetu nakuhamuka nihakuzatisha watu hakushimwina nsañu yayiwahi!