Ha October 21, 1940, nfulumendi yamuNew Zealand yabidikili nawu aYinsahu jaYehova hizanvu dawantu adikaña nawa anateli kuleta wubanji mwituña. Hela chakwila aYinsahu jaYehovah amweneña kukala muloña waniyi mbila, hiyazeyeliku. Chakutalilaku, atwalekelihu kupompa hela chakwila adi kuyilukuka nikuyikasa kudi akwawuswa.

Andy Clarke, Iyala wabulili kwikala Chinsahu wasumbwili aMary adiña aChinsahu, wamweni iwu muhela chadiñayi wahamuka kuhitila mukutwalekahu kupompa hela chakwila ayitiyishileña woma. Wakameneni nindi ñodindi anateli kumukwata nikumukasa kudi akwawuswa neyi amuwana nakupompa. Hela chakwila wapompeleña wanyi, Andy watachikili kuya nañodindi Mary nawa wamulejeli nindi: “Chachiwahi, neyi akukasa, atela kunkasa ninami!” Kufuma haniyi mpinji Andy watwalekelihu kupompa hamu nañodindi. Mukuhita kwampinji, wapapatisheweli nakwikala Chinsahu chaYehova. Muhela Mary chatwalekeliyi kwikala washinshika hayikabishileñawu mumpinji yaNjita Yakaayi Yamuchiyedi chakwashili aYinsahu amavulu muNew Zealand.

Ifuku dimu atupokola amwimikili manakwetu wakula dehi wadiña nayaaka 78, John Murray, hampinji yadiña nakushimwinayi nsañu yamuBayibolu kwitala nikwitala. Chota chamwinkeli muloña wakuzata mudimu wakundama kwizanvu dawakwakudikaña. A Yinsahu amavulu ayileteli kuchota; amakwawu ayifwetesheli, nawa amakwawu ayikasili hadi tukweji tusatu hayina mpinji.

A Yinsahu akanini kwiñila wushidika muloña wayinleji yawu yadizishawu naBayibolu. (Isaya 2:4) Chafuminimu, mumpinji yanjita ayikabishili chikupu chelili ayitambiki kuya nakwiñila wushidika. Chatela eñili wushidika, aYinsahu 80 ayikasili muchilombu chakukasila mumpinji yejima yikwadiña njita. Nihaniyi mpinji, yayikabishileñawu nankashi nawa yikwaswejeleña kututa kunidi iluña mumpnji yamashika, awa amanakwetu atwalekelihu kudifukula kudi Yehova naMuzañalu.

A Yinsahu adiña muchilombu chakukasila anyakeli kutanjika progiramu yakupompa nikushimwina. Azatileña neyi chipompelu, apompeleña mpinji yejima nikushimwina kudi antu amakwawu akasililiwu munichi chilombu. A Yinsahu ayitejeli kwikalaña nakupompa kwanyanya muyilombu yikwawu iku anayinki muntu wakuyitala. Antu amakwawu muyayikasililiwu adizilili chalala chamuBayibolu nikupapatisha mwomwenimu muchilombu.

Bruce, mwana weyala wakansi hadi anyana kawaMary nawa Andy, itwatena hakusambila wamweni kumukasa muchilombu nindi kwadiña hikukoleka kwakudiza yuma yayivulu yakuspiritu. Wanukili nakuhosha nindi; “Kudami, chadiña neyikwiji kuya kushikola muloña nadiña nakuhanjeka nawamanakwetu elukili yuma yayivulu munichi chilombu nawa nadizili kudi awa amanakwetu hampinji yinadiña nawu muchilombu.”

Mu 1994 nfulumendi yafukwilihu kumbaku antu amakwawu adiña muyilombu yakukasila. Hela chochu akulumpi jawamashidika akanini muloña elukili chikupu nawu aYinsahu akuleka wanyi kulejaku antu amakwawu yuma yakuhwelelawu neyi ayumbaku. Lipoti yahosheli nawu “Kutwalekahu kuyikasa kukukeheshaku iyena diyakwetiwu awa antu, ilaña hikukuyiletesha awa antu kuhimpaku.”

Muloña wambila yanfululumendi yakulekesha mudimu wazatañawu aYinsahu, Antu amakwawu atiyileña aYinsahu woma. Mukuhita kwampinji, amavulu enjili nakwiluka nawu aYinsahu jaYehova hiyanateli kuleta wubanji kudi antuku. Enjili nakwiluka nawu aYinsahu hiyafwanaku nawa hiyakwaKristu awunda. Chafuminimu aYinsahu muNew Zealand avuliliku kufuma ha 320 mu 1939 nakushika ha 536 mu 1945!

Mpinji jikwawu, akwawuswa adiña nanyichima yayiwahi amweneña kulekesha nyidimu yakundama kukudifukula kwaYinsahu jaYehova nawu chaheña. Nsompeshi wumu, hanyima yakutiya kunsañu yamwinkeleleñahu muloña manakwetu iyawaniniwu nakushimwina, wamanishili muloña. Wahosheli nindi: “Kwesekeja nachineluka nichinadiza munshimbi chatelela wanyi kutena muntu wunakuha maBayibolu nawu mbanji.”

Chelili njita yimani nyidimu yawaYinsahu ayitejeli cheñi, aYinsahu ashili chikupu muchima kukukwasha antuñi nawu kwiluka Wanta waNzambi. Mu 1945 kasanji kamutayi katemesheli mukanda kuyipompelu yejima yamuNew Zealand iwu mukanda wahosheli nawu: “Ikalenu asoñama, amabwambu nawa akweti wushona kudi antu ejima. Tondolwelenuña ntadi nimadombu. Anukenuña nenu antu itwawanaña mumudimu wakushimwina alemesha chikupu yuma yakuhwelelawu nawa akeñaña kuzatisha iyi yuma muchihandilu chawu. . . . Antu amavulu hiyanyikoku jamwanta itwatela kukukwasha kumwiluka Yehova niWanta windi.”

Makonu, aYinsahu jaYehova muNew Zealand anatwalekihu kushimwina nsañu yamuBayibolu kudi antu amunidi ituña niafumaña kumatuña acheñi. Ifuku dimu, mumaora antesha hohu, aYinsahu 4 ashimwinini muTurang kudi antu 67 afumini mumatuña 17!

Mwalala, antu amuNew Zealand ayiluka aYinsahu jaYehova nawu hiyantu awunda, akwaKristu alemesha chikupu yuma yakuhwelelawu nichalala chamuBayibolu. Chaaka nichaaka antu amavulu apapatishewaña nakwikala aYinsahu jaYehova munidi ituña. Mu 2019, aYinsahu akubadika ha 14,000 amukalakeleleña Yehova namuzañalu munidi ituña dakukabeta kakuchidilu.