Neyi chitunamoni kukala kunakumwekana muUkraine, akulumpi jamachechi awakaKristu diwu anakusañumuna nankashi antu kulonda adiñijeña mujanjita. Talenu akulumpi jamachechi chinakusañumuna antu anakuzuña njita:

•   “Tunayihameki nikuyisakilila amashidika etu ejima anakuzata mudimu weneni wakukiña ituña daUkraine kudi chilumbu . . . Dichi etu ejima, tunakuyilombelaku, nawa tukwikalaña nanenu mpinji yejima.”—Metropolitan Epiphanius I wakuKyiv, iyi nsañu ayishimwini muThe Jerusalem Post, haMarch 16, 2022.

•   “Mukulumpi waChechi yaOrthodox yamuRussia wapompeli hamu nawamashidika akuRussia haMulungu, nawa wayilejeli nindi atela kukiña ituña dawu ‘muloña akaRussia hohu diwu anateli kudikiña’ chineli [nfulumendi] yaMoscow yinatwalekihu kuzatisha amashidika muUkraine.”—Reuters, April 3, 2022.

 Komana kaKristu atela kudiñija munsañu janjita? Indi Bayibolu yahoshahu nawudi?

 Bayibolu yahosha nawu antu amulondelaña chikupu Yesu Kristu hiyadiñijaña munsañu janjitaku.

•   “Funtishaku mpoku yeyi yakabali muchindalu chayu, muloña antu ejima azatishaña mpoku yakabali akafwa kumpoku yakabali.”—Matewu 26:52.

   Komana muntu wetejaña njita hela wayaña nakuzuña njita nakwovwahila chikupu mazu aYesu?

•   “Inakuyinka lushimbi lwaluha nami, keñañanenu; neyi chinayikeña, ninenu keñañanenu wumu namukwawu. Neyi mukeñañana, dihu hakuyilukilawu kudi antu ejima nawu mudi atumbanji twami.”—Yowanu 13:34, 35.

   Komana muntu wasañumunaña antu kuya kunjita wukweti kukeña kwashimwiniyi Yesu nindi dikwakayilukilawu atumbanji twindi hela akwakumulondela?

 Neyi munakukeña kwilukilahu nsañu jikwawu, tañenu chibaaba chamuEngilishi chinakuhosha nawu, “Is War Compatible With Christianity?” [Komana akaKristu Atela Kwiteja Njita?]

 Komana chikutwesheka akaKristu kubula kudiñija munsañu jamanjita makonu? Eña. Bayibolu yashimwineñahu dehi nawu makonu, mpinji yatenañawu nawu “mafuku akukuminina,” kwakekala antu akunyuza yejima akabula “kudiza . . . njita,” kwesekeja nachahosheliyi Yesu.—Isaya 2:2, 4, tumazu twaheshina.

•   Tañenu yibaaba yamuKaposhi Kakutalila kaEngilishi yinakuhosha nawu “How Does God View War?” [Indi Nzambi Wamonaña Ñahi Njita] neyi munakukeña kwilukilahu nsañu jikwawu.

 Katataka Yehova, a “Nzambi wakuwunda,” yazatishi nfulumendi yidi yamwiwulu kulonda yamwini nachu antu jindi “kumakabisha nikumadombu.”—AFwilipi 4:9; Masamu 72:14.

•   Hakwila mwiluki Wanta waNzambi chiwakamanisha iku kukala, talenu vidiyo yinakuhosha nawu, Wanta waNzambi hiChumanyi?