Antu kwakwihi na 5 biliyoni akutala yisela yaOlympics mumatuña 206 muchinu chaaka cha 2024. Thomas Bach mukulumpi wayisela yaOlympic mukaayi wahosheli nindi. “Wejima wetu tukweti mudimu wakuleta kuwunda mukaayi kejima dichi tudiluñishenu iyi yisela yaOlympic mukuwunda, neyi chatela kwilawu antu mukunuñañana.”

 Komana yisela yaOlympics yinateli kuleta iku kuwunda? Komana kudihu kuchiñeja kwakwikala mukuwunda nikunuñañana kwakweni?

 Yisela yaOlympics yidiku chinu chaaka yinaleteshi antu amavulu kutachika kuhosha hayuma yayivulu. Yisela yaleteshaña antu amunsañu jamatuña nachiyuulu kuletesha antu kudambula. Iyi nsañu munadibombeli yuma yatela kwilayi muntu yomweni, chaambu chekowa, kwambuka kwajinsakililu, nikubula kuyimona antu munjila yoyimu.

 Yisela yamukaayi yidi neyi yaOlympics yaleteshaña antu kuzañalala. Hela chochu, yisela yamuchidiwu yamwekeshaña yuma yatoñojokañawu antu niyuma yelañawu, yayileteshaña kudambula nawakwawu nawa yayileteshaña atoñojokeña nawu dichatela kwilawu chatela aleti kuwunda nikunuñañana kwahaya nyaaka.

 Bayibolu yashimwineñahu dehi yilwilu yikuletesha kubuli kwikala kunuñañana makonu. (2 Timotewu 3:1-5) Hakwila mudizi yuma yayivulu haniwu wuprofwetu wamuBayibolu, tañenu chibaaba chinakwila nawu “Did the Bible Predict the Way People Think and Act Today?”

 MuBayibolu dimwasonekawu kuchiñeja kwakwikala nakuwunda nikunuñañana mukaayi kejima. Yashika nawu antu ejima hamaseki akekala mukunuñañana munfulumendi yamwiwulu yatenañawu nawu “wanta waNzambi.”—Luka 4:43; Matewu 6:10.

 Mwanta wachina chiyuulu, Yesu Kristu, wakaleta kuwunda mukaayi kejima. Bayibolu yahoshahu nawudi:

•   “Aloña akashakama chiwahi, nawa kuwunda kwakawanina kwejima.”—Isamu 72:7.

•   “Wakapulwisha kazweñi wunakulomba wukwashu . . . Wakayipulwisha kumakabisha nikumadombu.”—Isamu 72:12, 14.

 Kushika nimakonu, yuma yatañishileñayi Yesu yinanuñañeshi mamiliyoni awantu mumatuña 239. Hamu neyi akaKristu, aYinsahu jaYehova mukaayi kejima anadizi kwikala nakuwunda. Hakwila mwiluki chineliwu mwenimu, tañenu Kaposhi Kakutalila kanakuhosha nawu “Chitunateli Kuleka Kuhelañana.”