Kakavulu hanyuzi anakuhosha nankashi hadi antu anakuhosha akwawu chatama, madombu nikudilukuka muloña wakwambuka kwamakowa nimajita.

•   “Chayinu mpinji hasocial media hadi nhoshelu yatama nankashi muloña wanjita yidi mwituña daIsrael naGaza nimuloña wawantu anakuleta madombu nikuhelañana.”—ahosheli aNew York Times, November 15, 2023.

•   “Kufuma tuhu ha 7 October, kaayi kejima kanadimweni kuhelañana chikunaswejeliku, nhoshelu yatama ninyiloña yayivulu.”—ahosheli aDennis Francis, kajiña mpata waUnited Nations General Assembly, November 3, 2023.

 Nhoshelu yatama, madombu, ninjita hiyuma yatachikili dehi kufuma kunyima. Kafwampi, Bayibolu yayitena antu akunyima “[enyikileña] mazu awu atama neyi nyivu” akeñeleña njita nimadombu. (Masamu. 64:3; 120:7; 140:1) Hela chochu Bayibolu yashimuna nawu kuhelañana kunakumwekana makonu kudi nankeñelu.

 Bayibolu yashimuna yuma yiyedi yinakuletesha kuhelañana kusweja makonu.

1.  1. Yashimwineñahu dehi mpinji yikela “kukeña kwawantu amavulu kwakakeha.” (Matewu 24:12) Chatela adikeñi, antu amavulu anakumwekesha yilwilu yaleteshaña kudihela wumu namukwawu.—2 Timotewu 3:1-5.

2.  2. Kuhelañana kwasweja kunakumwekana chayinu mpinji himuloña wakutwamba nikutama kwaleteliyi Satana Diyabolu. Bayibolu yahosha nawu “kaayi kejima kadi mumakasa awatama.”—1 Yowanu 5:19; Chimwekeshu 12:9, 12.

 Hela chochu, Bayibolu yahosha nawu katataka Nzambi yafumishihu yuma yatama yejima yaletaña kuhelañana. Chuma chinasweji kuwaha, wakakwasha antu ejima anahiti muyihuñu muloña wakuhelañana. Bayibolu yatukana nawu:

•   Nzambi “wakakombola madilu ejima kumesu awu, nikufwa hikwakekalaku cheñiku, hikwakekala cheñi kudishona, kudila hela kuyeñaku. Yuma yakunyima yinahiti dehi.”—Chimwekeshu 21:4.