Nsañu jamatuña nachiyuulu jinakuletesha antu mukaayi kejima kubula kutiyañana. Kwesekeja nakusandujola kwawa Pew Research Center kwadiñaku mu 2022, “Akulumpi amavulu amumatuña 19 amumapati ashiyashana ahosheli nawu atiyañanaña wanyi namapati amakwawu mumatuña mwashakamañawu.”

 Komana mukwiteja nenu kumwashakamaña antu anakutiyañana wanyi muloña wamapolitiki? Chumanyi chinakuletesha? Chumanyi chinateli kumanisha iku kukala? Talenu chahosha Bayibolu.

 Bayibolu yashimwineñahu dehi nawu mumafuku etu, dikwila nawu “mafuku akukuminina,” antu amavulu akekala nayilwilu yikaleteshaña kubula kutiyañana.

•   “Mumafuku akukuminina mwakekala mpinji jakala. Muloña antu akekala akakudikeña awenawu, . . . abulaña kukeña kutiyañana nawakwawu.”—2 Timotewu 3:1-3.

 Hela chakwila antu amavulu azataña nañovu kukwasha nfulumendi jawu kulonda jizateña chiwahi, ilaña anakukañanya. Antu amupati yacheñi chayikalilaña kwiteja yitoñojoka yawantu adi mupati yikwawu hakwila azatili hamu kulonda amanishi kukala. Yuma yinakufumamu ayishimwineñahu dehi muBayibolu kunyima.

•   “Muntu [nakuyuula] mukwawu muntu kulonda amukatishi.”—Mukwakutañisha 8:9.

 Hela chochu, Bayibolu yatulejaña chuma chakamanisha iku kukala kwejima—nfulumendi yakayuulañawu kudi muntu wakafumishahu yihuñu yejima yinakumonawu antu makonu.

 Bayibolu yashimuna nyuli wamuwahi wutwatela kukuhwelela Yesu Kristu. Yesu wukweti ñovu, wuswa, nimuchima wakukeña kunuñañesha antu nikuleta kuwunda

•   “Mumafuku indi, waloña wakashakama chiwahi, nawa kuwunda kwakawanina kwejima.”—Isamu 72:7.

•   “Anyanta ejima akamufukamina.”—Isamu 72:11.

 Yesu hinyuuli wamuwahi muloña wakamenaña antu nawa nakukeña kuyikwasha, sweje-e dinu anakukabishawu.

•   “Muloña yena wakapulwisha kazweñi wunakulomba wukwashu, cheñi nimuntu wakehelamu niwejima wunabuli wakumukwasha, Nawa wakaamwina mawumi awatuzweñi. Wakayipulwisha kumakabisha nikumadombu.”—Isamu 72:12-14.

 Ilukilenuhu nsañu yayivulu haWanta waNzambi, nfulumendi yamwiwulu yayuulañawu kudi Yesu. Talenu yuma yayiwahi yinateli kufumamu neyi munakuhakwilaku ichi chiyuulu.

•   Talenu vidiyo yaWanta waNzambi hiChumanyi?

•   Tañenu chibaaba chinakuhosha nawu “Wanta waNzambi—Hinfulumendi Yakadi Majika Kanwa.”