HaFebruary 24, 2022, mpinji yakumantetemena, Russia watachikili kudiloñesha kulonda yamunyamukili Ukraine, hela chakwila anyuuli akaayi anakuzata nañovu kukañesha iyi njita. Yumanyi yikumwekana mukaayi muloña wakudishinjeka kwanawa matuña? Nsoneki waUnited Nations, António Guterres, wahosheli mafuku antesha anahitihu nindi: “Chakadi nikujina antu akukabakana, yuma yayivulu yikukisika mumatuña amuEurope nawa kuwunda kudi mukaayi kukuluwankana.”

•   Yesu Kristu wahosheleñahu dehi nindi “muza wakanyamuka nakuzuña namuza wukwawu, wanta niwena wakanyamuka nakuzuña nawanta wukwawu.” (Matewu 24:7) Tañenu chibaaba chinakwila nawu “What Is the Sign of ‘the Last Days,’ or ‘End Times’?” kulonda mumoni Bayibolu chiyamwekeshaña nawu njita yidiku makonu yashikijaña wuprofwetu waYesu.

•   Mukanda waChimwekeshu wamwekesha mukakwendela ‘haKawalu kachinana’ wemenañaku njita nawa ‘nafumishi kuwunda hamaseki.’ (Chimwekeshu 6:4) Tañenu chibaaba chinakwila nawu “Akwakwendela Hatuwalu Awana—Hiyanyi?” kulonda mwiluki iwu wuprofwetu chiwunakundami kunjita jidiku makonu.

•   Mukanda waDanyeli washimwineñahu dehi nawu “mwanta wakukabeta kakuchidiilu wakadishinjeka [na]mwanta wakukabeta kakuchimunswa.” (Danyeli 11:25-45) Talenu vidiyo yaKushikijewa kwaWuprofwetu, wamuDanyeli Kapetulu 11, kulonda mwiluki nenu Russia nimatuña adinuñayi nawu diwu anakwimenaku mwanta wakukabeta kakuchimunswa. a

•   Mukanda waChimwekeshi wahosha cheñi “hanjita “yefuku deneni daNzambi Wañovu Jejima.” (Chimwekeshu 16:14, 16) Ilaña bayi neyi iyi hinjita yamatuña neyi chitunakumona makonuku. Tañenu chibaaba chinakwila nawu “Bushe Inkondo ya Armagedone Cinshi?” kulonda mwiluki nsañu yayivulu haniyi njita.

•   Bayibolu yahoshaña nawu Nzambi ‘wakamanisha majita heseki dejima.’ (Isamu 46:9) Tañenu chibaaba chinakwila nawu “Isubilo lya Kuti Ifintu Fikawama ku Ntanshi lya Cine” kulonda mwiluki nsañu yayivulu hayikaninu yaNzambi.

•   Yesu walejeli akakumulondela indi kulomba nawu, Wanta waNzambi winzi. (Matewu 6:9, 10) Iwu Wanta hiNfulumendi yamwiwulu yakashikija nkeñelu yaNzambi hanu heseki, nawa nkeñelu yaNzambi mwabombela kuleta kuwunda mukaayi. Hakwila mwiluki iwu Wanta chiwunateli kuyikwasha, talenu vidiyo yaWanta waNzambi hiChumanyi?

 MuUkraine mudi aYinsahu jaYehova akubadika ha 129,000. Kufwana aYinsahu amumatuña amakwawu, niwena amwimbujolaña Yesu kubula kudiñija mumapolitki nikukaana kuzuña njita. (Yowanu 18:36) AYinsahu jaYehova mwahitaka kaayi kejima ashimwinaña “nsañu yayiwahi yaWanta” yinateli kumanisha kukala kunakumonawu antu, kushilahu ninjita. (Matewu 24:14) Mwani mwakasunuka kututemeshela kulonda mwiluki nsañu yayivulu yamuBayibolu yahosha hakuchiñeja.