Ha 24, February, 2022 ituña daRussia datemesheli amashidika kuya nakulukuka ituña daUkraine, chumichi chinaleteshi mawumi awantu amavulu kwikala muwubanji nankashi hampinji yinakutemukawu njita. a

 Nataliia, wamumusumba waKharkiv, muUkraine wahosheli nindi: “Twatiyileña mabomu ninyitendanzumbu chiyavumineña. Twatiyili woma nankashi chakwila nukutwesha nikulumbulula wanyi. Chitwatiyili nawu kudi masuwa yinakutwala antu kumaluña acheñi, twatoñojokeli netu tufumiku. Wejima wetu twasendeli hohu tuyuma twantesha mutuyola twakupakata. Twasendeli hohu yipapilu yalema, yitumbu, menji nituyakuda twapela. Twashiyili yuma yejima nawa twayili kwakukandamina masuwa iku mabomu enda aholoka.”

 Nadija, wamumusumba waKharkiv, muUkraine wahosheli nindi: “Twakashimukili hohu njita yinatachiki. Natiyileña chaholokeleña mabomu mumaluña amakwawu amumusumba nawa jinjanina jakuminineña dakuzala. Natoñojokeli nami nifumimu, nawa nasendili hohu tuyuma twakeñekeleña. Nafumini kwitala na 8:00 nawa nakandamini masuwa yayileña kuLviv kufumahu nakandamini basi yayileña kuPoland.”

Yuma yitukuhosha muchinu chibaaba

•  Yumanyi dinu yinaleteshi amatunduka ekali muniku kukala?

•  Hinyi wunateli kuyamwina awa amatunduka?

•  Komana muBayibolu mudi nsañu yinateli kukwasha amatunduka?

 Yumanyi dinu yinaleteshi amatunduka ekali muniku kukala?

 Iku kukala kunakumona amatunduka muUkraine kunatachiki muloña amashidika amuRussia analukuki ituña daUkraine. Ilaña, kudi yuma yayeni yashimuna Bayibolu yinakuletesha amatunduka amoneña kukala kwamuchidiwu:

•   Nfulumendi jawantu mukaayi kejima jinakañanyi kwinka antu jawu yuma yinakukeñawu. Akulumpi janfulumendi anakuzatisha wuswa wawu kulonda akabishileñamu antu.—Mukwakutañisha 4:1; 8:9.

•   Satana Diyabolu, “nyuuli wakaayi,” nakuluwañesha antu kulonda eleña yuma yatama dihafuma Bayibolu hiyikuhosha nawu: “Kaayi kejima kadi mumakasa awatama.”—Yowanu 14:30; 1 Yowanu 5:19.

•   Kubombela hakukala kunamweshi antu kalula hadi yaaka yayivulu, ichi tunakushakama mumpinji yashimuna Bayibolu nawu: “Mumafuku akukuminina mwakekala mpinji jakala.” (2 Timotewu 3:1) Nawa yuma yinaleteshi awa mafuku kwikala akala, himuloña wakwila tunakumona majita, wubanji, kukeha kwayakuda, niyipupu, yuma yejimiyi yakojejaña antu kutemuka.—Luka 21:10, 11.

 Hinyi wunateli kuyamwina awa amatunduka?

 Bayibolu yatulejaña nawu Nleñi yetu Yehova, b hiNzambi wayikeña nawa wayitiyilaña wushona amatunduka niantu ejima anashiyi matalawu. (Kuhituluka 10:18) Washiika nindi wakamanisha kukala kwejima kunakuletesha antu kwikala amatunduka kuzatisha nfulumendi yindi yamwiwulu yatenañawu nawu, Wanta waNzambi, yikafumishahu jinfulumendi jawantu jejima. (Danyeli 2:44; Matewu 6:10) Yehova wakamufumishahu Satana Diyabolu kuzatisha Wanta windi. (ARoma 16:20) Iwu Wanta wakayuula iseki dejima nawa wakafumishahu chaambu chekala hakachi kamatuña. Antu akayuulañawu kudi iwu Wanta akekala anyana evumu dimu. Hikwakekalahu cheñi antu akashiyaña matala awuku muloña Bayibolu yahosha nawu: “Muntu-himuntu wakashakama mwishina damuvinyu windi nimwishina dachikuyu chindi, nawa kwosi wakayitiyishaña womaku, muloña kanwa kaYehova wamazaza dikanahoshi.”—Mika 4:4.

 Wanta waNzambi hohu diwakamanisha kukala kwejima kunakukojeja antu kwikala amatunduka. Yehova wakamanisha kukala kwejima kunakukojeja antu kwikala amatunduka kuzatisha wanta windi. Talenu yakutalilahu:

•   Njita. “[Yehova] Nakumanisha majita heseki dejima.” (Ms 46:9) Neyi munakukeña kwiluka chakamanishayi Nzambi iku kukala, tañenu chibaaba chinakuhosha nawu “Kuwunda Hamaseki—Kwakenza Ñahi?”

•   Makabisha nimadombu. “ [Yehova] Wakayipulwisha kumakabisha nikumadombu.” (Ms 72:14) Neyi munakukeña kwiluka chatela kuhimpawu antu yilwilu yatama yidi mudi wena, tañenu iyi yibaaba yinakuhosha nawu “Chitunateli Kuleka Kuhelañana.”

•   Wuzweñi. “[Yehova] wakapulwisha kazweñi wunakulomba wukwashu.” (Ms 72:12) Neyi munakukeña kwiluka chakamanishayi Nzambi kukala kunakuleta wuzweñi, tañenu chibaaba chaChizungu chinakuhosha nawu “Is a Fair Economic System Possible?” (“Komana Antu Anateli Kwikala naChihandilu Chakadi Wuzweñi?”)

•   Kukeha kwayakuda. “Hamaseki hakekala mbutu jajivulu chikupu.” (Ms 72:16) Neyi munakukeña kwiluka chakamanishayi Nzambi kukala kwayakuda, tañenu chibaaba chaChizungu chinakuhosha nawu “A World Without Hunger?” (“Ituña Dakadi Nzala”)

 Komana muBayibolu mudi nsañu yinateli kukwasha amatunduka?

 Eña. Kubombela hansañu yakuchiñeja yinakuyilejawu amatunduka, Bayibolu yinateli kuyikwasha nakukala kunakumonawu chayinu mpinji.

 Chishina chamuBayibolu: “Bayi mwakama chuma hela chimuku, ilaña muyuma yejima, mukulomba nimukulomba kwakulembelela nimukusakilila, mulejenuña Nzambi yuma yejima yimunakukeña; nawa kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu.”—AFwilipi 4:6, 7.

 Muchinatalishi: Mulombenu Yehova kulonda yayinki kuwunda kwamuyitoñojoka mukukala kwejima kumudimu. Talenu chibaaba chaChizungu chinakuhosha nawu “Philippians 4:6, 7—‘Do Not Be Anxious About Anything.’” (“AFwilipi 4:6, 7—‘Bayi mwakama chuma hela chimuku.’”)