Talenu yuma yinakumwekana yinakwilawu akulumpi jamachechi alemeshawu kutalisha hanjita yidi muUkraine:

•   “Mukulumpi wachechi yaOrthodox yamuRussia, Patriarch Kirill, nahoshihu wanyi mazu anakumwekesha nawu ituña daRussia dinaluwañeshi hanjita yinabutiliwu muUkraine. . . . Chechi yindi yinatwalekihu nakutandisha nsañu yakutwambila ituña daUkraine, nawa iyi nsañu diyinakuzatishayi [kajiña mpata] Putin kudihakwila nindi kwosi chuma chinaluwañeshiyi hakuleta njita.”—Dichahosheliyi mukakutala yuma chiyinakwenda wamuEU, March 7, 2022.

•   “Patriarch Kirill . . . nakuhakwilaku nankashi mashidika awaRussia analukuki ituña daUkraine, nawa nakuhosha nindi anakuzuña iyi njita kulonda akañeshi yilwilu yatama kwiñila mwituña dawu.”—Chikuzulemba chaAP News, March 8, 2022.

•   “Mukulumpi wachechi yaOrthodox wamuUkrain, Metropolitan Epiphanius I washakamaña muKyiv, wayikiswila antu jindi Hachimu nindi ayi ‘nakuyitombwesha amashidika awaRussia anayilukuki’ . . . Wahosha cheñi nindi kujaha amashidika awaRussia bayi neyi hinshidiku.”—Jerusalem Post, March 16, 2022.

•   “Etu akaMutayi Wunakwimenaku maChechi niMazanvu awakaKujila [hela netu Ukrainian Council of Churches and Religious Organizations (UCCRO)] tudi kukabadi kawaMashidika amuUkraine niakwetu ejima anakutukwasha, tunakiswili netu akiñi Ukraine kudi chilumbu, nawa tunakuyilombelaku.”—UCCRO a, February 24, 2022.

 Mukuhoshahu nenudi? Komana machechi ahoshaña nawu twalondelaña ntañishilu yaYesu Kristu atela kuleja antu jawu nawu ayi kunjita? Indi Bayibolu yahoshahu nawudi?

Nsañu yinakumwekesha chadiñijiliwu machechi munjita

 Kufuma tuhu kunyima, machechi etejaña antu jawu kuya kunjita, ahoshaña nawu kuya kunjita kwatama wanyi, mpinji yikwawu asañumunaña antu kuya kunjita, iku hamesu awantu anakutwamba nawu anakuleta kuwunda. Hadi yaaka yayivulu, aYinsahu jaYehova anakwashi antu kwiluka nawu awa machechi anakudimba antu. Talenu yakutalilahu yantesha yidi munyikanda yetu.

•   Chibaaba chaEnglishi chinakuhosha nawu “The Crusades—A ‘Tragic Illusion’” chahoshaña nawu chechi yaKatolika yajahishili antu amavulu nankashi kunjita yazuñilileñawu mwijina daNzambi niKristu.

•   Chibaaba chaEnglishi chidi namutu nawu “The Catholic Church in Africa” [Chechi yawaKatolika muAfrica] chashimunaña chakañenyiwu machechi kumanisha majita hakachi kanyichidi nimadimi.

•   Yibaaba yaEnglishi yidi nanyitu nawu “Is Religion to Blame?,” “niReligion’s Role in Man’s Wars,” kushilahu tuhu “niReligion Takes Sides” yashimuna chechi yakatolika, Orthodox, niakulumpi jamachechi amakwawu chadiñijiliwu munjita jadiñaku kunyima.

Komana antu aditenaña nawu hiyakaKristu atela kuya kunjita?

 Yesu washimwini nindi: “Watela kukeña mukwenu neyi chiwadikeña eyi aweni.” (Matewu 22:39) “Twalekenuhu kukeña ayilumbu jenu.”—Matewu 5:44-47.

 Yesu wahosheli nindi: “Wanta wami wambadi yakanu kaayi wanyi. Neyi Wanta wami wadiña wambadi yakanu kaayi, mutenowu ambuñami adi kuzuña kulonda abuli kwiteja kuntwala kudi aYudeya.” (Yowanu 18:36) “Ejima azatishaña mpoku yakabali akafwa kumpoku yakabali.”—Matewu 26:47-52.

 Dihulenu nenu: Neyi akaKristu ayitejeli wanyi kuzuña kulonda amukiñi Yesu, kudihu chuma chidi chejima chatela kunonelawu yitwa aKristu makonu? Tañenu chibaaba chaEnglishi chinakuhosha nawu “Is War Compatible With Christianity?” kulonda mumoni akaKristu akusambila chamwimbujoleleñawu Yesu nichazatishileñawu yuma yadizishileñayi.

Chumanyi chakayilawu machechi asañumunaña antu kwikala nampwila yakuzuña njita?

 Bayibolu yatudizishaña nawu Nzambi wahela machechi aditenaña nawu hiyakaKristu iku hiyanakwila yuma yadizishileñayiku.—Matewu 7:21-23; Titusa 1:16.

•   Mukanda waChimwekeshu watulejaña nawu Nzambi wayimonaña awa machechi nindi adi namuloña wakujahisha ‘antu ejima ajahañawu heseki.’ (Chimwekeshu 18:21, 24) Neyi munakukeña kwiluka muloña waweni, tañenu chibaaba chaEnglishi chidi namutu nawu “What Is Babylon the Great? [Babiloni Muneni hiChumanyi?]”

•   Mazu ahosheliyi Yesu amwekeshaña nawu machechi ejima abula kulondela nshimbi jaNzambi akayikisañana muloña wanyidimu yawu yatama, neyi chelañawu antu namutondu wunakusoña nyikabu yatoka ‘awutemaña nakuwunatila mukesi.’ (Matewu 7:15-20) Neyi munakukeña kwiluka chakayikisañanawu awa machechi abulaña kulondela nshimbi jaNzambi, tañenu chibaaba chaEnglishi chinakuhosha nawu “The End of False Religion Is Near!”

Kusakilila eni nyevulu, kufuma kuchimunswa kuya kuchidiilu: Mwevulu wakwatiliwu kudi aSefa Karacan/Anadolu Agency/Getty Images; Maxym Marusenko/NurPhoto via Getty Images