E piny Mexico gi Central America, nitie joloko 290 modak e pinje auchiel, kendo giloko buge e dhok mokalo 60. Ang’o momiyo itiyo tijno? En nikech ka ji oyudo buge malero Muma e dhok ma giwinjo tiendgi mapiyo, mano nyalo mulo chunygi​—1 Jo-Korintho 14:9.

Mondo olok dhokgo e ranginy ma malo, osegol joloko moko ma ne tiyo e bad ofis mar Mexico mi otergi kuonde ma iwache dhokgo. Ere kaka mano osekonyo? Jolokogo romo gi joma wacho dhok ma gilokono, omiyo mano konyogi loko buge e dhok mayot somo kendo mawinjore mapiyo.

Joloko neno nade lokruogno? Federico, ma loko dhok mar Guerrero Nahuatl wacho niya: “Kuom higni apar ma ne an Mexico, ne aromo mana gi joot achiel mawacho dhok mawacho. To koro e taon man machiegni gi kama ofis mar loko dhok nitie, nitie ji mang’eny mawacho dhok mawacho!”

Karin, maloko dhok mar Low German e ofis man Chihuahua e piny Mexico wacho niya: “Dak gi Jo-Mennonite osekonya ng’eyo dhokno e yo maber moloyo. Wadak kendo watiyo e gweng moro matin. Ka ang’icho e dirisa, aneno joma yudo ber kuom tij loko matimore kae.”

Neyfi, modak e ofis loko dhok man Mérida, Mexico, wacho niya: “Sama watayo puonjruok Muma e dho Maya, wafwenyo weche ma ok winjre maber ne Jo Maya. Omiyo wamanyo yore ma wanyalo lokogie e yo ma winjore maber moloyo.”

Gin ber mage ma josomo yudo sama gisomo buge molokgi? We wane ane ranyisi moro achiel: Kuom higni 40, Elena, mawacho dho Tlapanec, ne dhi e chokruoge duto mag Joneno mag Jehova. To nikech nitimo chokruoge e dho Spanish ne ok owinjga kata gima ne ipuonjo. Owacho kama, “Ne ang’eyo ni onego abed e chokruoge.” Kata kamano bang’ puonjruok Muma kotiyo gi brosua mogo e dho Tlapanec, nobedo hero Jehova Nyasaye. Nochiwore mobatise e higa mar 2013. Elena wacho niya, “Agoyo ne Jehova erokamano kuom konya winjo tiend Muma.”