“Pach ng’ato ok nyal tangni sama owinje, isome e yo mamiyo ng’ato paro matut kendo isome gi teko.”

“Omiyo ng’ato neno gik ma owinjogo ka gima gitimore gadier.”

“Omit winjo ahinya, omiyo gik ma asebedo ka asomo e Muma e ngimana duto koro donjona moloyo.”

Magi gin moko kuom weche ma ji osewacho bang’ winjo somo mar bug Mathayo ma yudore e jw.org e dho Kisungu.

Joneno mag Jehova nochako loso Muma miwinjo e higa mar 1978. Bang’ kinde, Muma miwinjo ne yudore oduto kata bathe moko e dhok ma dirom 20.

Ka ne ogol Muma mar New World Translation ma 2013, ne koro dwarore ni osome kendo, kimako dwol manyien. Muma miwinjo mar 2013 opogore gi ma ne olos motelo ma ne osom gi ji adek kende. Muma mar 2013, osom gi ji mokalo 1000, nikech ng’ato ka ng’ato ma wuoyo e Muma omi dwol mopogore.

Bedo ni oti gi josomo mopogore opogore konyo jowinjo one e pachgi gik ma Muma wuoyoe. Kata obedo ni Muma miwinjo ok som e yor drama, ma tiende ni ok omedne thum kod gik mamoko ma kamago, pod en gi ndhadhu kendo owinjore maler.

Tiyo gi josomo mang’eny kamano dwaro chenro mong’ith. Mokwongo, jotim nonro ne nyaka fweny ng’ama wuoyo e kuonde misomo duto, tiend gima isomo, to kod chuny ma isomego. Kuom ranyisi, kapo ni kamoro oting’o weche ma ne owach gi jaote Yesu moro, to ok onyis nyinge, en ng’ano monego osome? Kapo ni weche mowachgo nyiso kiawa, inyalo mi ng’at ma somo kar Thoma, to kapo ni wechego nyiso rikni moro, inyalo mi ng’at ma somo kar Petro.

Jotim nonrogo ne nyaka par bende hik ng’at ma isomo wechene. Kuom ranyisi, ka ne isomo weche jaote Johana ka pod en rawera, ne oti gi dwond rawera, to ka ne isomo weche jaoteno ka en jaduong’ moti, ne oti gi ng’at ma hike ng’eny.

E wi mano, ne nyaka gimany joma ne nyalo somo e yo mong’ith. Ng’eny josomo iyiero kowuok e ofis mar Joneno mag Jehova man Amerka. Sama imanyo joma inyalo tigo e somo Mumani, ikwayo joma inyalo tigo mondo oik kendo osom paragraf moro ma yudore e gaset mar Awake! Gisomo bende kuonde moko e Muma ma nyiso ich-wang’, kuyo, mor, kod chuny monyosore. Timo kamano konyo e fwenyo joma nyalo somo maber kod kit somo ma ng’ato ka ng’ato kuomgi berie moloyo.

Bang’ ka osemi josomo ma oyier kuonde monego gisom, gidhi mondo omak dwondgi e studio man Brooklyn, Patterson, kata Wallkill. Nitie ng’at ma tayo josomo koneno ni gisomo gi dwol mowinjore kod chuny ma dwarore. Ng’at ma tayono kaachiel gi jasomo imiyo kalatas moting’o weche misomogo ma nyiso kuonde ma onego jasomo oling’ie matin, kod kuonde monego ojiw. Ng’at ma tayono bende tiyo gi weche momaki mag New World Translation machon mondo otaye.

Jo studio neno ni weche ma omakgo winjore maler. Kapo ni ng’ato ochochni kamoro sama osomo, jo studio nyalo nyise ni onwo somo, kae to giriwo kuonde ma osomo maber e sentens achielno mondo eka giyud somo ma winjore maber moloyo.

Ok ong’ere ni ibiro tiek mak Muma miwinjo mar New World Translation ma 2013 oduto karang’o. Kata kamano, ka otiek mak buk moro, ibiro kete e jw.org kama wacho ni, “Buge Manie Muma” kendo alama ma nyiso ni nitie dwol miwinjo mar bugno bende ibiro ket e bathe.