Joneno mag Jehova ong’ere ahinya kuom tijgi mar loko weche e dhok mopogore opogore. Chop Novemba 2014, ne waseloko Muma e dhok mokalo 125 kod buge ma lero Muma e dhok mokalo 742. Tijni oriwo loko vidio bende. Chakre Januari 2015, vidio mar Ang’o ma Timorega e Kingdom Hall? Ne olok e dhok 398, kendo vidio mar Ang’o Momiyo Onego Ipuonjri Muma? bende ne olok e dhok 569. Ang’o momiyo ne olokgi to ere kaka notim mano?

E dwe mar Mach 2014, Bura Matayo mar Joneno mag Jehova nonyiso bad ofise manie piny ma ngima mondo olos weche momak mag vidio e dhok mang’eny kaka nyalore mondo okony e puonjo Muma.

Loko vidio dwaro okenge mogwaro. Mokwongo, owete ma tiyo e ofise milokoe dhok loko weche mag vidio manie otas. Kae to, iyiero owete mopogore opogore ma wacho dhokno mondo owach weche ma joma nie vidiono wacho. Bang’e, owete ma tiyo e ofis milokoe dhokno mako weche moselokgo, giloso kuonde ma dwarore olos moriwo nyaka weche mineno e vidiono. Mogik, weche momaki, weche mineno, kaachiel gi vidio wuon iriwo mondo oket e websait.

Ofise moko ne nigi kuonde mimakoe dwol (studio) kaachiel gi owete motieg ne timo tijno. To nade dhok ma iwacho kendo iloko kuonde mosokore? Gin gitimo tijni nade?

Nitie owete molony e tijni ma nigi masinde minyalo ting’ ma dhiga kuonde kaka mago. Owadwa motieg nyalo tiyo tijni e ofis moro, e Od Romo kata e ot moro kotiyo gi maikrofon kod kompyuta mag laptop kaachiel gi masin mar mako dwol. Joma wacho dhokno nyalo konyo e somo weche, moko nyalo tayo tijno (coach) moko bende nyalo nono ka be osom weche mimakogo e yo makare (checkers). Bang’ kosetiek tijno duto kendo opwodhi, owadwa motiegni fundo kendo odhi e alwora machiel.

Nikech chenroni, oselos vidio mang’ey momedore ma kwan-gi okalo kwan ma ne itimo chon nyadidek.

Vidiogi osemoro ji mangeny sidang’. To mano en nikech gin e vidio ma thoth ji hango winjo e dhog-gi giwegi.

Pitjantjatjara en achiel kuom dhok ma ne olokie vidiogi, kendo iwache gi ji mokalo 2,500 e piny Australia. Dhokni nolok kama ilungo ni Alice Springs ma yudore yo masawa. Owadwa miluongo ni Callan Thomas ma ne okonyo e tij mako weche miwinjogo wacho niya: “Jogo ne mor matamre ginono. “Joma odak e alworano nohero vidiogo ahinya kendo ne gipenjo kama ginyalo yudoe moko. Ok yot yudo buge mondik e dhokni. Sama giwinjo weche momak e dhoggi​—to moloyo ka ginenogi​—gihum ahinya.”

Joneno ariyo e piny Kameroon ne odhi e wuoth ka gitiyo gi yie e aora moro. Ne gichopo e gweng’ moro ma joma nyodunde odakie (Pygmys). Jonenogo nowuoyo gi chif mabende ne puonjo e achiel kuom skunde me gweng’no. Bang’ fwenyo ni chifno ne wacho dho Bassa, owetego notiyo gi simo mar lwedo e nyise vidio mar Ang’o Momiyo Onego Ipuonjri Muma? e dhokno. Chifno ne mor ahinya kendo nokwayo owetego buge moko.

E gweng’ moro e piny Indonesia, jatend din moro ne kwedo Joneno mag Jehova, kendo nowang’o buge duto ma Joneno nosechiwo e alworano. Jomoko e gweng’no bende ne obwogogi ka giwacho ni gibiro wang’o Od Romo. Bang’e, polise moko ang’wen ne odhi e od nyaminwa moro ma Janeno ma ginone ahinya kaachiel gi joode. Ne gigombo ahinya ng’eyo gik ma timorega e Od Romo, omiyo nyaminwano notang’onegi vidio mar Ang’o ma Timorega e Kingdom Hall? e dho Indonesia.

Bang’ neno vidiono, achiel kuom polisego nowacho niya: “Aparoni ji ema pok ong’eyou maber.” Polis machielo nopenjo ni: “Be anyalo yudo vidioni mondo anyisie jomamoko? Vidioni nyiso maler kaka un joma beyo.” Polise manie gweng’no koro nigi paro makare e wi Joneno kendo gimiyogi rit.

Ka po ni pok ineno vidiogi, donge inyalo nenogi e dhok miwinjo maber?