E chak Desemba 2012, Joneno mag Jehova e piny Thailand notimo kampen makende mondo gikony nyithindo otim maber e skul. Joneno ma dirom piero ariyo nolimo skunde e taon mar Bangkok. Ne giwuoyo gi moro ka moro kuom jotelo mag skundego kendo ne gimiyo jopuonj gi nyithindo e skundego gaset mar Amkeni! ma Oktoba 2012 ma wiye wacho ni Jinsi Unavyoweza Kufanikiwa Shuleni.”

Kampen ma ne gitimo Bangokno ne odhi maber, mi Jonenogo ne otime e piny Thailand duto. E higa achiel gi nus ma noluwe, ne gilimo skunde 830 kendo jopuonj kaachiel gi nyithindo ne mor ahinya gi gasedno, ma nochuno ni ogo gasedno kendo e kinde adek mopogore opogore nikech kwan momedore mar joma ne dware. Kane kampenno pok ochakore, Joneno ma Thailand nokwayo kopi 30,000 mag gaset mar Amkeni! ma Oktoba 2012. Kata kamano, wach miwuoyoe e gasedno osemoro ji ahinya, kendo chop sani osepog ji kopi mokalo 650,000!

Mapiyo piyo jotend skul kaachiel gi jopuonj noneno ayanga kaka gasedno ne dhi konyo nyithindo. Japuonj achiel nowacho niya, “Gasedno dhi konyo nyithiwa obed gi winjruok maber gi jonyuolgi kendo mondo ging’e gik mowinjore gitine matek e ngimagi.” Skunde moko noketo weche moko mayudore e gasedno e silabas margi. To skunde moko ne tiyo gi gasedno e timo tiegruok mar somo e klas. E skul moro, jopuonj nonyiso nyithindo mondo ondik ripot e wi wach moro mowuok e gasedno, kendo nyithindo ma ne ripodegi beyo moloyo ne omi mich.

Japuonjre moro ma nyako ne mor gi sula moro ma yudore e gasedno ma wiye ne wacho ni Kushinda Tatizo la Kunenepa Kupita Kiasi Miongoni mwa Vijana”. Nolero ni bedo machwe mokalo tong’ en gima chando ji mang’eny, osiepene to ne oluor wuoyo e wi wachno. Nowacho niya, “Erokamanouru kuom miyowa puonj mayot winjo kendo mayot tiyogo e wi wachni.”

Jonyuol bende ne mor gi gasedno. Miyo moro ma ne Joneno olimo e ode kae to gimiye gasedno nowacho niya, “Gasedno oting’o weche mabeyo ma dhi konyo nyara omed timo maber e skul.”

Mr. Pichai Petratyotin, jal ma wuoyo e lo Joneno mag Jehova e piny Thailand, nowacho niya: “Amkeni! oting’o rieko madier mayudore e Muma, ma en rieko mosekonyo tienge mang’eny mag ji, kendo pod okonyo ji gadier e kindewagi. Joneno mag Jehova ong’eyo ni somo mar skul en gima konyo ahinya, omiyo waikore chiwo gasedni ne ng’ato ang’ata ma nyalo dwaro ma ok wakwayo chudo moro amora.”