Ogendni modak kuonde mosokore e piny Kanada wacho dhok mopogore opogore mokalo 60. Kendo wachore ni nitie dhok moro achiel ma Jo-Kanada ma kwan-gi nyalo romo 213,000 wacho.

Mondo Joneno mag Jehova oyal wach maber ne jogi, moko kuomgi osepuonjore achiel kuom dhokgo. E giko higa mar 2015, noyudo ka Joneno ma dirom 250 nosedhi e klas moro ma nipuonje achiel kuom dhokgo.

E wi mano, Joneno mag Jehova oseloko buge ma lero Muma moriwo nyaka vidio machuok e dhok aboro ma jo Kanada masie wacho kaka: Algonquin, Blackfoot, Plains Cree, West Swampy Cree, Inuktitut, Mohawk, Odawa, kod Ojibwa. *

Joma osepuonjore dhokgo wacho ni ok en gima yot. Nyaminwa miluongo ni Carma wacho kama: “Ka nachako konyo owete gi nyimine ma loko dho Blackfoot, ne chalo mana ka gima an e mudho. Ne ok ang’eyo dhokno maber. Ok nanyal somo dhokno kata mana tudo weche sama ng’ato wuoyo.”

Terence ma bende konyo e tij loko dho West Swampy Cree wacho niya: “Gitiyo gi weche maboyo boyo kendo ma luongo tek”. Daniel ma tiyo kuom thuolone duto e chula mar Manitoulin mayudore e provins mar Ontario wacho kama: “Gige tich kaka diksonari kod buge molok e dhokno nok. To yo maber mar ng’eyo dho Odawa en wuoyo gi joma hikgi oniang’ ma a e gweng’no mondo gipuonji.”

Be kinda duto ma itimo dhi nono? Miyo moro ma wacho dho Ojibwa nowacho ni kinda ma Joneno mag Jehova keto e loko buge e dho Ojibwa miyo gibedo mopogore gi dinde mamoko. Bende owacho ni bedo ni Joneno dhi e ute ji kendo somo negi Muma, miyo ji bedo thuolo winjogi kendo chiwo paro.

Bert, ma nopon e pinyno kendo achiel kuom jolok dhok mantie Alberta wacho kama: “Aseneno joma wacho dho Blackfoot mang’eny kotingo buk ma lero Muma mondik e dhoggi ka wacho ni, ‘Ma e dhowa. Bugni olosna.’ Anenoga ka pi wang’gi chuer sama gineno vidio molos e dhoggi.”

Miyo moro ma wacho dho Cree ne mor ahinya neno vidio mar Ang’o Momiyo Onego Ipuonjri Muma? e dhoggi. Nowacho ni ne chalone mana ka gima min-gi e ma wuoyo kode.

Moko kuom Joneno osetimo kinda ahinya mondo gi dhi yalo wach maber mar Muma e piny Kanada. Terence gi Orlean chiege, paro wach moro. Giwacho kama: “Ne wan e wuoth gi mtoka mane kawo chiegni seche 12 e nderni motimo pe ka wadhi yalo e gweng’ moro mosokore ma niluongo ni Little Grand Rapids. Ne wayudo nyak ahinya!”

Moko be oseweyo ngima maber kendo mokuwe ma ne gidakie ma gidhi e gwenge miwachoe dho Jo-Kanada. Bang’ ka Daniel gi jaode LeeAnn nosedhi lendo kuom dweche adek e gweng’ mar Manitoulin, ne ging’ado mar dar chuth mondo gidhi gidag kuno. Daniel wacho niya: “Wamor ahinya bedo gi thuolo momedore mar geno kuom Jehova kendo gombo ma wan-go mar dhi nyime tiyone bende osemedore.”

Ang’o momiyo Joneno mag Jehova timo kinda ahinya mondo giyal wach maber ne Jo-Kanada? Rose jaod Bert wacho niya: “Bedo ni an Ja Kanada masie kendo bedo ni aseneno kaka puonj mag Muma beyo, jiwa mondo yal ne jomamoko.”

Orlean wacho kama: “Daher ni joma wacho dho Cree onee ber mar bedo joma Nyasaye chiko. En gueth makende konyo jomamoko osud machiegni gi Jehova mondo ginan e chandruoge ma giyudo sani.”

Marc en achiel kuom joma loko dho Blackfoot. Otemo ahinya mondo oyal ne Jo-Kanada. Nikech ang’o? Owacho kama: “Nikech aherogi gadier.”