E higa mar 2014, Bura Matayo Joneno mag Jehova ne ochako chenro manyien e wach lendo kuonde matek chopoe e pinje mag Europe gi North America. (Tich Joote 1:8) Kane eka ochak chenrono, kuonde ma ne oyier mondo odhi olendie ne gin gwenge kaka Alaska man Amerka, Lapland man Finland, Nunavut gi alwora mag Northwest man Kanada.

Joneno mag Jehova nosebedo kalimo gwengegi kuom higni pieche. Kata kamano, Jonenogo ne limoga kuondego mana kuom kinde machuok kendo gimaduong’ ma ne gitimo ne en mana miyo ji buge malero Muma.

E chenro manyienni, ofise mag Joneno mochung’ne lendo e alwora matek chopoego, kwayoga Joneno matiyo ne Nyasaye kuom thuologi duto ka gin jopainia, mondo odhi olend kuom dweche adek kadhi nyime e alwora moko moyier. Kapo ni nitie joma ogwaro e alworano madwaro puonjore Muma, Jonenogo nyalo lendo kuno kuom dweche mokalo adek, kendo ginyalo chako timo chokruoge mag ji duto e alworago.

Adiera en ni lendo kuondego nigi pek mage makende. Kuom ranyisi, ne oor jopainia ariyo e taon mar Barrow man Alaska, achiel kuomgi noa California ma milambo to machielo nowuok Georgia, ma gin kuonde ma hinyoga bedo maliet e piny Amerka. Kinde ma ne gin kuno, taon mar Barrow nobedo mang’ich ahinya, koyo ne ger mochopo minus 38 degrees Celsius! Kata kamano, bang’ dweche manok, ne giselimo chiegni pasent 95 mag mier duto manie alworano, ma gichako puonjruok mar Muma gi ji ang’wen ma achiel kuomgi ne iluongo ni John. John kaachiel gi osiepne ma nyako puonjore bug Ang’o ma Muma Puonjo Kuom Adier? kendo ojanyiso osiepene kaachiel gi jotich wetene gik mopuonjore. E wi mano osomoga ndiko modiechieng e bug Nono Ndiko Pile kotiyo gi JW Library app e simbe.

Nitiere gweng’ miluongo ni Rankin Inlet e alwora mar Nunavut e piny Kanada, kendo onge nderni madhi kuno. Jopainia ariyo nodhi gi ndege e gweng’ matinno ma gichako puonjore gi ji mogwaro Muma. Bang’ ka dichwo moro oseneno vidio mar Ang’o ma Timorega e Kingdom Hall? Nopenjo Jonenogo ni gibiro gero Kingdom Hall e alworano karang’o. Kae to ne omedo niya, “Kapo ni ubiro gero Kingdom Hall ka pod adak ka, abiroga biro e chokruogeu.”

Savukoski, Finland opong’ gi mwanda ma tungene ogar, mwandago oloyo nyadipar kwan dhano modak kuno. Jopainia ariyo man kuno wacho niya: “Koyo ng’ich ahinya koni kendo baraf opong’o piny.” To ema pod, giwacho ni kinde ma ne gidhiyeno nowinjore ndi. Nikech ang’o? Gimedo wacho ni, “Waselendo chiegni ne ji te e alworani, nimar wuoth yot nikech jogi siko golo baraf e nderni duto. To nikech piny ng’ich ahinya ji mang’eny ok wuog e ot, omiyo yudogi e ot yot.”

Kinda ma waketo mar puonjo ji Muma kuonde maboyogo osemoro ji mang’eny. Bang’ kane jopainia olimo miyo moro ma ne en mayor mar taon moro e Alaska, miyono ne ondiko weche mabeyo e intanet kama otudorega gi ji moketo picha mar trakt ma wiye wacho ni Pinyruodh Nyasaye en Ang’o? Kanyo.

E taon mar Haines, e piny Alaska, jopainia ariyo timoga chokruoge e laibrari moro, kendo kinde moko ji madirom aboro osechokore kodgi. Gaset moro ma kuno ne olando ni nitie chwo ariyo mowuok Texas gi North Carolina mobiro e taondno mondo gipuonj ji Muma achiel kachiel. Lendono notieko niya: “Dhiuru e websait mar jw.org mondo uyud weche momedore.”