Ji mang’eny paroga ni Jo-Amerka masie odak mana e risaf kende. Kata kamano, pasent 70 mag Jo-Amerka masie odak e taonde ma kuno. Chieng’ tarik 5 nyaka 7 e dwe mar Jun, 2015, notim nyasi moro mong’ere kaka “Gateway to Nations,” e taon mar New York ma e taon maduong’ mogik e piny Amerka. Nyasino ilosoga ne Jo-Amerka masie. Ka ne Joneno mag Jehova moko ma ni New York ofwenyo ni ne idhi tim nyasino, ne gitimo chenro mapiyo mondo gin be gidhi e nyasino. Nikech ang’o?

Joneno mag Jehova loko buge ma lero Muma e dhok mopogore opogore moriwo nyaka dhok mang’eny ma Jo-Amerka masie wacho, kaka Blackfoot, Dakota, Hopi, Mohawk, Navajo, Odawa, kod Plains Cree. Kuom mano, e nyasino, Joneno mag Jehova noketo mesni kod troli moting’o buge moko mogo e dhokgo, moriwo nyaka trakt ma wiye wacho ni You Can Trust the Creator!

Websaitwa bende oting’oga vidio kod weche momaki miwinjo e dhokgo. Joneno mag Jehova ma ne ni e nyasino notugo vidio kod gik momak miwinjogo ne welo ma ne orawo neno bugegi. Welogo nofwenyo ni gik mamoko ma ne ni e nyasino ninyiso mana e dho Kisungu kod Spanish, to Joneno mag Jehova kende e ma ne nyiso gigegi e dhok modhuro ma Jo-Amerka masie wacho.

Ji mang’eny ma nobiro e nyasino ne mor ahinya gi kinda ma Joneno mag Jehova timo e loko buge e dhok mogwaro ma Jo-Amerka masie wacho. Ne gimor bende gi kaka Jonenogo puonjo ji Muma e taonde kod e risaf. Achiel kuom joma nochano nyasino nokwayo mondo opuonje Muma ka noselerne gik ma Joneno timo. Nowacho kama: “Arito limbeu gi siso mondo ubi upuonja Muma!”

Dichwo moro gi chiege nodhi kama Joneno nochanoe buge. Nikech giduto ne gin momni, to Joneno ma ne giyudo kanyo ne okia dho momni, goyo mbaka kodgi ne ok yot. Gima ber en ni mana gie sechego, Janeno mong’eyo dho momni nochopo kanyo. Ne gigoyo mbaka kuom dakika ma romo 30, kendo nokonyogi ng’eyo kama ne idhi timie chokruok maduong’ mar ndalo adek e gweng’gi e dhok mitiyoe gi ranyisi.

Kuom ndalo adekgo, Joneno ma kwan-gi okalo 50 nochiwore lero ne ji Muma e nyasino, kendo welo ma ne orawo irgi nokawo buge ma kwan-gi okalo 150.