E dwe mar Agost 2014, Joneno mag Jehova e piny ngima nochiwo trakt moro mondo ojiw ji odonj e websait mar jw.org. Jo madonjo e websaitno nomedore ma gichopo ji milion 65 kama, to mano ne en medruok mar paset mokalo 20 e dweno. E piny ngima, ji madirom 10,000 osekwayo puonjruok Muma maonge chudo kokalo kuom websaitno. Ma en medruok mar paset 67 kopim gi dwe mar Julai! Kampenno nokonyo ji mang’eny ahinya kuonde duto ma giyudore.

Janeno moro e piny Canada nomoso dhako moro miluongo ni Madeline ka en e lift monyise trakt ma ne otimogo kampen. Trakno ne penjo niya, Ere Kama Wanyalo Yudoe Dwoko mag Penjo ma Chandowa e Ngima? Madeline nonyise ni otieno mokalo nolemo ka en e varanda mar ode kokwayo Nyasaye mondo okonye yudo dwoko mag penjo kaka mago. Nosebedo ka odhi e kanise mang’eny mondo okwa puonjruok Muma to onge kata kanisa achiel ma noyie puonje. Bang’e nochako puonjre gi Joneno mag Jehova.

E piny Philippines, janeno miluongo ni Rowena nowuoyo gi ng’at moro ma Ja-China ma nochung’ e dho hotel moro. Nomiye trakt, kae to olerone ni Joneno mag Jehova puonjoga ji Muma maonge chudo moro amora.

Ng’atno nowacho ni pok nonenoga Muma nyaka nene. Mbakagino nojiwe mondo odhi e chokruok moro maduong’ mar Joneno mag Jehova. Bang’e nowacho ni doher ng’eyo weche momedore e wi Muma omiyo nowacho ni odhi download Muma e websaitwa.

Janeno moro mamomo miluongo ni Guillermo manie piny Spain, noromo gi Jorge, jaklasgi machon ma ne momo be. Jorge nonyise ni min-gi nyocha otho omiyo, ne en gi penjo mang’eny mane chando chunye mamiyo obedo gi kiawa. Guillermo nomiye trakt ma ne itimogo kampen mi olerone kaka onyalo yudo dwoko mag penjogego e jw.org e dho ranyisi. Guillermo nogwelo Jorge bende e chokruoge mitimo e Kingdom Hall. Jorge nobiro, to chakre kindeno, pok olewoga ne chokruoge kata obedo ni odak kilomita 60 mabor gi kama kingdom hall nitie.

Joneno moko ariyo ma gin joot nodhi Greenland ka gitiyo gi pesagi giwegi. Kuom seche auchiel, ne gitiyo gi yie moro matin mondo gidhi e gweng’ moro ma nigi ji 280. Ka gin kuno, ne gilendo, gipogo ne ji trakt kendo ne ginyiso ji vidio mag jw.org e dho Greenland. Ne gichako puonjruok Muma gi ng’at moro gi jaode. Sani, gipuonjore kodgi diriyo e juma ka gitiyo gi simu.

Tijni ne ok tim mana e yo masawa kende. Joneno man Nicaragua noloso chenro mar pogo traktni ne joma wacho dho Mayangna e bunge ma ni Caribbean. Bang’ ringo kuom seche 20 ma ok gichung’ ka gitiyo gi mtoka moro moti e yo mopong’ gi bugni, ne giwuotho gi tiendgi kuom seche 11 mondo gichop kuonde ma ji odakie. Kuno, ne gichiwo trakt mang’eny kendo ne ginyiso ji vidio manie dho Mayangna. Wachni nokawo joma ne odak kanyo gi wuoro ahinya mi ne gimor sidang.

Estela nomiyo ng’at moro trakt ka ne ng’atno kadho e taon moro manie bunge mag Amazon ma ni Brazil. Ng’atno noyie kawo traktno ma okete e ofuko. Kata kamano, ne ok orwako wachno ahinya. Sama nodok dala, yie ma ne en-go nogomo ma odong’ e chuny pi ka ong’e gima dotim. Sama norito ng’at ma ne biro konye, ne osomo trakt ma nomiyeno. Kotiyo gi simbe mar lwedo, nodonjo e websait mar jw.org, mosomo weche mang’eny kanyo bende nogolo vidio moko e websaitno. Bang’ ndalo matin noromo gi jaod Estela mi onyise ni ogone Estela erokamano kuom miye traktno. Nowacho kama; “Weche ma ne asomo e traktno kapod akwamo e aora karito yie ma ne biro resa ne okonya ahinya. Nyithinda ohero vidio mag Kaleb kendo abiro dhi nyime donjo e websait mar jw.org.”