Nyako moro miluongo ni Yanmei ma en Janeno mar Jehova modak e piny Asia, nochiwore konyo miyo moro ma muofu miluongo ni Mingjie kalo ndara. a Mingjie nowacho ni Yanmie kama bang’ ka nosekonye kalo ndara: “Erokamano ahinya. Nyasaye mondo oguedhi!” Bang’ mano, Yanmei nopenjo Mingjie ka nonyalo yie mondo gichan kaka ginyalo romo mondo gipuonjre Muma kanyachiel. Mingjie nowacho bang’e ni nosebedo kolemo pile ka pile kokwayo Nyasaye mondo okonye yudo Jokristo madier. Ang’o momiyo nosebet kokwayo Nyasaye kamano?

 Mingjie nowacho ni e higa mar 2008, osiepne moro ma bende en muofu nogwele mondo gidhi gilem e kanisa moro ma tijgi maduong’ ne en konyo joma nigi ng’ol. Bang’ ka noseyalnegi, Mingjie nopenjo jadolo ma ne yalo kuma nogole weche ma nopuonjogigo. Jadolono nodwoke ni nogologi e Muma, moting’o adiera mar Wach Nyasaye. Mano nomiyo Mingjie obedo gi gombo matut mar somo Muma. Omiyo, nokawo Muma mar braille mondik e dho Chinese moting’o volumes 32 mochako somo kendo notieko some kuom dweche auchiel kende. Kaka Mingjie ne dhi nyime gi somo Muma, nofwenyo ni puonj mipuonjo e kanisagi ni Nyasaye en Nyadidek en puonj mar miriambo kendo nofwenyo ni Nyasaye nigi nyinge ma en Jehova.

 Bang’ kinde, Mingjie ne ojok gi timbe ji e kanisa ma nolemoe. Nofwenyo ni ne ok gitim ka luwore gi gik ma nosebedo kosomo e Muma. Kuom ranyisi, muofni ne imiyoga chiemo ma ne ji osechamo modong’ ka jomamoko ma wengegi neno to chamo chiemo maler. Timbe kaka mago nochwanyo Mingjie kendo nochako manyo kanisni mamoko ma nonyalo lemoe e alworagi kanyo. Mano e ma omiyo Mingjie ne kwayo Nyasaye e lamo mondo okonye yudo Jokristo madier.

 Mingjie noyie puonjore Muma nikech ng’wono ma Yanmei nonyise. Bang’ kinde, Mingjie nobiro e chokruok mar Joneno mag Jehova. Mano e ma ne hangone biro e chokruoge kaka mago. Mingjie wacho kama: “Wiya ok nyal wil gi odiechiengno. Owete gi nyimine duto nomosa gi mor. Wachno nomulo chunya ahinya. Kata obedo ni ne an muofu, pod nanyalo fwenyo ni gin gi hera madier kendo ni ok gibuon ng’ato ang’ata.”

 Mingjie nodhi nyime puonjore gi kinda kendo nochako biro e chokruoge ma ok obare. Gima ne morega ahinya e chokruogego ne gin wendewa mag Pinyruoth. Kata kamano, ne ok en gima yotne wer nikech ne onge bug wer mondik gi braille ma nonyalo somo. Omiyo, kanyakla nokonye moloso buge mar wer ma nonyalo somo. Nokawe seche 22 kende mondo ondik wende duto ma gin 151! E higa mar 2018, dwe mar April, Mingjie nobedo jalendo ma pok obatisi, kendo nolendoga seche 30 kama dwe ka dwe.

 Ka nochopo kinde ma Mingjie ne dwa kalo e penjo mag batiso, Yanmei nomakone penjo kod ndiko ma ne yudore e bug Riwruok ma Timo Dwach Jehova mondo okonye iko dwoko mag penjogo. E higa mar 2018 dwe mar Julai, nobatis Mingjie. Owacho kama: “Hera ma ne owete gi nyimine oherorego nomulo chunya ahinya e chokruogno. Namor ahinya kendo pi wang’a nochuer nikech gikone nayudo Jokristo ma lamo Nyasaye gadier.” (Johana 13:34, 35) Hera ma ne aneno e kind owete gi nyimine e chokruok maduong’ ma nobatisaeno, nomulo chunya ahinya. Sani Mingjie oseng’ado e chunye mondo en be odhi nyime nyiso hera ma kamano kendo omor tiyo ne Nyasaye kaka painia mapile.