Nonyuola e taon mar Calgary ma ni Alberta, e piny Canada. Ka ne pod an rawera, jonyuolna nowere chuth kae to an gi mamawa ne wawuok ma wadhi dak gi kwarwa kod dawa. Dawa gi kwarwa noherowa ahinya kendo ne an nyathi mamor. Pod anyalo paro kaka ne wadak gi kuwe kindego.

 Ka najahigni abiriyo, ngima nochako ridorena ahinya ka ne mamawa ong’ado mondo ochak okende gi wuonwa kendo. Jonyuolna nodar ma wadhi dak St. Louis ma ni Missourie e piny Amerka. Mapiyo nono, nafwenyo ni wuonwa ne ger. Kuom ranyisi, chieng’ ma nahango dhi e skundwa manyien, ka naduogo dala, nofwenyo ni nyithindo moko nogoya e skul to ne ok agora kodgi. Wuonwa ne iye owang’ matek kendo nogoya moloyo kata kaka nyithi skul wetenago nogoya! Naneno ni kare mano e gima wuonwa ne dwaro ni atim, kendo nachako gora gi nyithindo e skul ka ajahigni abiriyo.

 Wuonwa ne iye jawang’ marach ahinya kendo mano ne miyo gi siko gigwandore gi mamawa matek e ot. Nachako tiyo gi yedhe ma mero ji kendo madho kong’o mana ka ajahigni 11 kende. Namedo bedo ng’ama ger ahinya kendo nasiko agoraga gi ji kama ne wadakie. Ka natieko skul, nabedo ng’ama ohero lweny kinde duto.

 Ka nachopo jahigni 18, nachako tiegora gi jolweny mag Marine Corps man Amerka. Kanyo natiegorae kaka nanyalo neko, kendo mano nomiyo amedo bedo ng’ama ger moloyo. Bang’ higni abich, naweyo tij lwenyno kendo nachako somo psychology kageno ni abiro yudo tich gi jo Federal Bureau of Investigation. Nachako somba mar yunivasiti e piny Amerka kae to nadhi nyime kod somo ka nadok Canada.

 Ka ne an e yunivasiti kuno, chunya nojok gi ji ahinya kod gik ma ne gitimo. Ji nohero mana gik ma konyogi giwegi, onge gima ne ber e piny kendo ne nenore ka gima onge ng’ama ne nyalo tieko chandruoge mag dhano. Geno ma ne an-go ni dhano nyalo loko piny obed maber nolal nono.

 Nikech koro naonge geno e ngimana, nachako madho kong’o, tiyo gi yedhe ma mero ji, manyo pesa, kendo nadonjo e timbe mag terruok. Nahero mana dhi e nyasi mopogore opogore, kendo nawilo mon mana ka nanga. Nikech tiegruok ma nayudo ka an e lweny nomiyo abedo gi chir mar yawo lweny sa asaya, nasiko agoraga mana gi ji. Naneno ni anyalo ng’ado paro kuom gima rach kata gima ber ma ng’ato otimo ne nyawadgi. Kendo ka naneno ni ng’ato otimo ne nyawadgi marach, natiekoraga gi ng’atno. Kiwacho awacha adier, nabedo misumba maduong’ mar timbe gero.

 Chieng’ moro, ne an gi osiepna moro ma ne wamethogo ma wamer e oda kama ne waikoe njaga ma ne wadwa kowo gi meli mondo odhi ous e yor magendo. Osiepnano nopenja niya, “Be iyie kuom Nyasaye?” An to nadwoke kama: “Ka di po ni Nyasaye e ma miyo dhano chandore e piny kama, to ok adwar wach moro amora motudore kode!” Odiechieng’ ma noluwo ka ne an e tich manyien ma nayudo, achiel kuom jotich wetena ma ne en Janeno mar Jehova nopenja kama: “Be iparo ni Nyasaye e ma miyo dhano chandore e piny?” Nawuoro penjono ahinya nikech odiechieng’ mokalo noyudo mano e penjo ma ne chanda, kendo mano nomiyo agombo ng’eyo weche momedore. Chakre chieng’no, kuom dweche auchiel ma noluwo ne wajabedoga gi mbaka mar Muma, kendo Janenono nokonya yudo dwoko mag penjo moko matek ma nosebedo ka chanda.

 Osiepna ma nyako ma nadakgo e kindeno ne ok dwar ni mondo anyise weche ma ne apuonjorago. Chieng’ Jumapil moro, nanyise ni agwelo Joneno moko mondo gibi e odwa gipuonjwa Muma. Odiechieng’ ma noluwo ka ne awuok tich, nayudo ka oting’o gik moko duto e ot moweya. Nawuok oko kendo naywak malit. Bende, nalamo Nyasaye ka akwaye mondo okonya. Mano e odiechieng’ mokwongo ma natiyoe gi nying Nyasaye ma en Jehova e lamo.​—Zaburi 83:18.

 Bang’ ndalo ariyo, nachako puonjora Muma gi Joneno ma nolimago, ma ne gin dichwo moro gi jaode. Bang’ ka ne gisewuok, nadhi nyime somo bug Unaweza Kuishi Milele Katika Paradiso Duniani, otienono ma atieke duto. a Weche ma nasomo e wi Jehova Nyasaye kod Yesu Kristo Wuode nomulo chunya ahinya. Naneno ni Jehova en jang’wono kendo owinjo malit sama wachandore. (Isaya 63:9) Kendo gima nomedo mulo chunya ahinya en ka nafwenyo ni Nyasaye nohera mochiwo Wuode nikech an. (1 Johana 4:10) Mano nokonya ng’eyo ni kare Nyasaye osebet ka hore “nikech ok odwar ni oketh ng’ato ang’ata, to odwaro ni ji duto ochop kama gilokoe chunygi gia e richo.” (2 Petro 3:9) Naneno kare Nyasaye ywaya ire.​—Johana 6:44.

 Nachako dhi e chokruoge mag kanyakla mana e jumano. Yie wiya ne boyo, narwako stadi, kendo ka ji nonena, ne ginyalo bwok. Kata kamano, Joneno mag Jehova to norwaka gi mor mana ka watgi moro ma noselalnegi kuom higni mang’eny. Ne girwaka mana kaka Jokristo madier. Nawinjo mana ka gima adok dak gi kwarwa gi dawa, en mana ni hera ma ne ginyisa ne en hera matut.

 Mapiyo, gik ma napuonjora e Muma nochako loko kit ngimana. Nalielo yie wiya, naweyo timbe mag terruok duto kendo naweyo madho kong’o kaachiel kod yedhe ma mero ji. (1 Jo-Korintho 6:9, 10; 11:14) Nadwaro moro Jehova. Omiyo, ka napuonjora ni nitie gimoro amora ma natimo ma Jehova ok dwa, ne ok arendraga kuom wachno. Kar mano, wachno ne chwoga chunya ahinya ma awach ni: ‘Ok achak atim gima ma kamano kendo.’ Kendo ne ok adigniga e timo lokruok ma ne dwarore e pacha kod timbena. Mapiyo nono, nachako neno ber nikech natimo kaka Jehova dwaro. Tarik 29 Julai, 1989​—dweche auchiel bang’ ka ne asechako puonjora Muma​—nobatisa ma abedo Janeno mar Jehova.

 Muma osekonya bedo gi kido mabeyo. Chon ka ne ng’ato ochwanya, natiekoraga kode kanyo gi kanyo. Kata kamano, sani to atimo matek mondo adag gi “kuwe gi ji duto.” (Jo-Rumi 12:18) Adwoko ne Jehova erokamano ahinya nikech osekonya timo lokruok kokalo kuom Wachne kod rohone maler.​—Jo-Galatia 5:22, 23; Jo-Hibrania 4:12.

 Tinde ok an misumba yedhe ma mero ji, timbe gero, kaachiel gi timbe mag terruok. Kar mano, atimo duto ma anyalo mondo amor Jehova Nyasaye kendo tiyone gi chunya duto. Mano oriwo konyo jomamoko mondo gin bende ging’eye. Mapiyo bang’ ka nosetisa, nadar madhi e piny machielo mondo adhi aland Wach Nyasaye e alwora ma ne jolendo dwarore moloyo. Kuom higni mang’eny, asemor neno kaka puonj mag Muma konyo ji mang’eny mondo gilok ngimagi mana kaka an bende puonjgo osekonya. Gima nomora bende moloyo en ni minwa nobedo Janeno mar Jehova. To achiel kuom gik ma noywaye momiyo obedo Janeno ne en neno lokruok ma natimo e ngimana.

 E higa mar 1999, ka ne an El Salvador, nadhi e Skul mar Joland-Injili mar Pinyruoth. Skundno nomiya tiegruok kaka anyalo tayo ji e tij lendo kendo kaka nanyalo chopo migawo mar puonjo kendo bedo jakwath e kanyakla. Bang’e e higano nakendo Eugenia. An gi Eugenia watiyo gi thuolowa duto ka wayalo Wach Nyasaye e piny Guatemala.

 Tinde ok ajok gi ngima, kar mano, amor gadier. Tiyo gi puonj mag Muma e ngimana osemiyo awera gi timbe mag terruok kod mag gero kendo tinde adak e ngima mopong’ gi hera kod kuwe.