Yo maduong’ ma wayudogo pesa masiro tijwa en kokalo kuom chiwo ma onge achune migolo gi Joneno mag Jehova. a Sanduge mag golo chiwo nitie kuonde ma wachokoree, kendo yore mamoko ma ng’ato nyalo tiyogo e golo chiwo yudore e kama ondik ni Chiwo mantie e websaitwa. Sama ng’ato ni kanyo, onyalo yiero ka odwaro golo chiwo misirogo tij piny mangima, kata chiwo misirogo tije mitimo e pinygi, kata golo chiwo misirogo tijego te.

 Joneno mag Jehova ok golga achiel kuom apar kendo onge kwan mar pesa ma oketne ng’ato mondo ogol kowuok e yuto mare. (2 Jo-Korintho 9:7) Ok wachokga sadaka, kata kawo pesa kuom ng’ato eka odonj e chokruogewa. Bende ok wachulga pesa mag batiso, yiko, arus, kata mag gik mamoko motudore gi lamo. Ok wasolga pesa ka watiyo gi yore mopogore opogore kaka uso ne ji chiemo kuondewa mag lamo, bedo gi duka ma wausoe gik moko, bedo gi krused, timo harambee, kata tiyo gi yore ma chalo gi mago e yudo pesa. Bende ok wakwaga ji mondo ogolnwa chiwo. E wi mano, ok walandga nyinge kod chiwo ma ng’ato ogolo. (Mathayo 6:2-4) Websait magwa kod bugewa onge gi lendo mag ohala kata lendo mamoko ma nyalo rwakonwa pesa.

 Dwe ka dwe, kanyakla duto mag Joneno mag Jehova chiwoga ripot e wi kaka gitiyo gi pesa kendo wechego isomoga e lela ne ji duto mobiro e chokruok. Rekod mar pesa mar kanyakla ka kanyakla inonoga kinde ka kinde mondo one ni oti gi pesa e yo mowinjore.​—2 Jo-Korintho 8:20, 21.

•   Sanduge mag chiwo: Inyalo golo chiwo mari mar pesa kata chek e sanduge mag golo chiwo manie Ute Romo, Ute mag Chokruok mag Alwora, kata kuonde mamoko mitimoe chokruoge.

•   Chiwo migolo e intanet: E pinje mang’eny inyalo tiyo gi kama wacho ni “Gol Chiwo ne Joneno mag Jehova” manie wesbsaitwa mondo igol chiwo kitiyo gi credit cards, debit cards, bank transfers, kata yore mamoko mag oro pesa. b Joneno moko yieroga mondo ‘giket gimoro tenge’ ma ing’adogi dwe ka dwe ka gitiyo gi achiel kuom yore molernwago.​—1 Jo-Korintho 16:2.

•   Chiwo mochan: Nitie chiwo moko ma dwaro ni ichan chon kata imany paro kuom joma ong’eyo chike. Timo chenro ma kamano nyalo konyi e weche motudore gi osuru mantie e pinyu. Ji mang’eny ma timo kamano oseyudo ber ka onyisgi weche momedore e wi chiwo mochan ma inyalo chak tigo ka pod gingima kata ma inyalo chak tigo ka gisetho. Wakwayi ni itudri gi bad ofis mar Joneno mag Jehova manie pinyu mondo iyud weche momedore ka diher golo chiwo ma otudore gi yore ma luwogi:

  •   akaunt mag bengi

  •   insuarens kod pes ritaya

  •   ute gi puothe

  •   stok kod bond

  •   wil kod trusts

 Mondo iyud weche momedore e wi yore ma inyalo gologo chiwo e alworau, som kama wacho ni “Gol Chiwo ne Joneno mag Jehova.”