Miriambo: Joneno mag Jehova ok oyie ni lakteche nyalo thiedhogi, omiyo, ok gi manyga thieth sama gituo kendo ok gitiga gi yedhe.

 Adiera: Wamanyoga thieth maber kar mwanyalo ne wan wawegi kaachiel gi joutewa. Sama watuo wamanyoga lakteche ma nyalo thiedhowa kata yang’owa ma ok gitiyo gi remo. Wamor ahinya gi lony mosetim e yore mag thieth. En adier ni thieth ma ok tiye gi remo osekonyo joma thoth mopogore gi Joneno mag Jehova. E pinje mang’eny, jotuo nyalo yiero thieth ma ok tiye gi remo, kendo mano osekonyogi geng’o tuoche ma yudorega ka oti gi remo, kata chandruoge mamoko.

Miriambo: Joneno mag Jehova puonjo ni yie nyalo miyo ng’ato ochang e yor hono.

 Adiera: Ok wayie ni ichangowa e yor hono.

Miriambo: Thieth ma ok tiye gi remo kawoga pesa mang’eny.

 Adiera: Thieth ma ok tiyega gi remo ok kawga pesa mang’eny. a

Miriambo: Joneno mag Jehova mang’eny moriwo nyaka nyithindo thoga higa ka higa nikech ok gidwar mondo omedgi remo.

 Adiera: Wachno en miriambo. Lakteche ma yeng’o nyalo timo yeng’o ma korgi tek ka ok gitiyo gi remo, e tuoche kaka mag adundo, mag choke, kata mag fuonni mamoko mag del. b Thothne jotuo moriwo nyaka nyithindo moyudo thieth ma ok oti gi remo, changoga piyo moloyo joma othiedh ka itiyo gi remo. c Onge ng’ama nyalo wacho gadier ni jatuo biro tho ka ok oyie mondo omede remo, kata ni obiro chango ka oyie mondo omede remo.

 Ma en wach motudore gi yiewa, to ok otudore gi wach thieth. E Ndiko mag Dho-Hibrania kod mag Dho-Grik ichikowa moriere ni wawere chuth gi remo. (Chakruok 9:4; Tim Jo-Lawi 17:10; Rapar mar Chik 12:23; Tich Joote 15:28, 29) Bende, e wang’ Nyasaye remo ochung’ ne ngima. (Tim Jo-Lawi 17:14) Omiyo, ok wayiega mondo omedwa remo nikech wawinjo Nyasaye, kendo wamiye luor kaka Jachiw ngima.

 Kinde moko lakteche ne neno ni jotuo ma ne tamore ni kik medgi remo,ne gin jotuo ma pachgi ok long’o kendo ne chal mana ka gima gitemo dere, to machiegnini thoth lakteche oseloko paro ma ne gin-gono. Kuom ranyisi, e higa mar 2004, nogo sula moro e wi weche thieth ma nowacho niya: “Thoth yore mosebed ka ithiedhogo Joneno mag Jehova ibiro tigo ka ithiedho jotuo mamoko e higni mabiro.” d E higa mar 2010 bug thieth moro ma iluongo ni Heart, Lung and Circulation nowacho ni “yang’o jotuo ma ok omedgi remo” en kit thieth ma onego othiedhgo ji duto to ok Joneno mag Jehova kende.

 Lakteche mang’eny e piny ngima sani timo yeng’o ma korgi tek ka gitiyo gi yore ma miyo remb jotuo ok chuer mang’eny, kendo gitimo kamano ma ok gimedogi remo. Yore mag thieth kaka mago, sani itiyogo kata e pinje modhier, kendo jotuo mang’eny ma ok gin Joneno mag Jehova kwayoga mondo othiedhgi ka itiyo gi yorego.