Wakwanoga Joneno mag Jehova kaluwore gi kwan mar joma lando wach maber mar Pinyruodh Nyasaye dwe ka dwe. (Mathayo 24:14) Mano oriwo joma osebatis kaachiel gi joma osepwodh mondo oland wach pinyruoth kata bed ni pok obatisgi.

 Ooyo. Onge tudruok moro amora e kind golo pesa gi bedo achiel kuom Joneno mag Jehova, kata yudo migawo moro makende e riwruok mar Joneno mag Jehova. (Tich Joote 8:18-20) E wi mano, chiwo ma Joneno gologa ok ong’ere ni ng’ano ma nogologi. Janeno ka Janeno chiwoga thuolone, tekone, kod gik mamoko mondo okony e tijwa mar piny ngima kaluwore gi yuto kata chal mare kod kaka ong’ado e chunye.​—2 Jo-Korintho 9:7.

 Dwe ka dwe, Joneno gologa ripot e kanyakla ma gintie ma nyiso ni ne gilendo. Ok chun ng’ato mondo ogol ripot.

 Ripode ma jo kanyakla golo ichano maber, kae to ikwanogi duto, bang’ mano iorogi e bad ofis man machiegni kodgi. Bad ofis bende goyo kwano mar ripode duto moa e pinje manie bwogi kae to giorogi e ofis maduong’.

 E giko higa mar tijwa, a igoyoga kwan ma malo mar Joneno e piny ka piny. Kwan-gi duto iriwo, to mano konyo e ng’eyo ni Joneno adi ma nitie e piny mangima. Weche momedore e wi piny ka piny, moriwo nyaka weche mosene e tij lendo, iketoga e bwo wich mawacho Mashahidi wa Yehova Ulimwenguni Pote. Ripode kaka mago jiwowa, mana kaka ripode ma ne igolo e kinde Jokristo mokwongo ne jiwogi.​—Tich Joote 2:41; 4:4; 15:3.

 Kata bed ni ok kwan-gi kaka Joneno mag Jehova, warwakogi e chokruogewa. Ng’enygi bende chopoga e romo mitimo higa ka higa mar Rapar mar tho Yesu, omiyo inyalo ng’e kwan mar jogi kopimgi gi kwan mar Joneno. E higa mar 2023, kwan mar joma nobiro e rapar nochopo 20,461,767.

 Jomamoko ma ok dhiga e chokruogewa yudo ber kokalo kuom chenro mar puonjruok Muma. E higa mar 2023, ne watayo puonjruok Muma ma dirom 7,281,212 dwe ka dwe, moko kuomgi notim e seche machal.

 Josirkal penjoga ji ni gilemo kanye, to mano e kaka gikwano joma nie kanisa moro. Kuom ranyisi, joma ne kwano ji e piny Amerka (U.S. Census Bureau) “ne dwaro ng’eyo ni ng’ato ka ng’ato ohero din mane.” Mopogore gi mano, Joneno mag Jehova kwenoga kaluwore gi joma lendoga dwe ka dwe kendo golo ripot mar tij lendo, to ok kaluwore gi joma wacho awacha ni gilemo gi Joneno mag Jehova.