Kaka Joneno mag Jehova, watemo ahinya makore gi puonj ma Yesu nowacho ni Jokristo onego oluw kendo puonjgo e ma jootene bende noluwo. Sulani lero moko kuom puonj ma wayiego.

1.   Nyasaye. Walamo Nyasaye madier, Manyalo Duto, ma en Jachuech, ma nyinge iluongo ni Jehova. (Zaburi 83:18; Fweny 4:​11) En e Nyasach Ibrahim, Musa kod Yesu.​—Wuok 3:6; 32:11; Johana 20:17.

2.   Muma. Wayie ni Muma en wach Nyasaye kendo ne ondike ne dhano duto. (Johana 17:17; 2 Timotheo 3:​16) Wayie gi puonj duto ma yudore e buge 66 mag Muma ma oriwo “Muma Machon” kod “Muma Manyien.” Profesa miluongo ni Jason D. BeDuhn nolero wachno e yo ma kare kondiko e wi Joneno mag Jehova kama: “Puonj duto ma Joneno mag Jehova oyiego gigolo e Muma achiel kachiel ma ok gitem chuno kata soyo gimoro amora ma Muma ok wachi.” a

    Kata obedo ni wayie kuom Muma kaka en oduto, wang’eyo ni nitie weche moko ma ok onego okaw achiel kachiel. Wang’eyo ni weche moko ei Muma ondik e yor ranyisi kendo ok onego wakawgi kaka gin.​—Fweny 1:1.

3.   Yesu. Waluwo puonj mag Yesu Kristo kod ranyisine. E wi mano, wayie ni en e Jawar kendo wamiye luor kaka Wuod Nyasaye. (Mathayo 20:28; Tich Joote 5:​31) Omiyo, wan Jokristo. (Tich Joote 11:26) Kata kamano, Muma osepuonjowa ni Yesu ok e Nyasaye Manyalo Duto kendo onge gimoro amora e Ndiko ma siro puonj mar Didek.​—Johana 14:28.

4.   Pinyruodh Nyasaye. Ma en sirkal ma nitie e polo, to ok en chal moro manie chuny Jokristo. Sirkandni biro kawo kar sirkande mag dhano, kendo chopo dwach Nyasaye ne piny. (Daniel 2:​44; Mathayo 6:​9, 10) Sirkand Nyasaye biro kawo okang’ machiegni, nikech weche mokor e Muma nyiso ni wadak e “ndalo mag giko.”​—2 Timotheo 3:​1-5; Mathayo 24:​3-​14.

    Yesu e Ruodh Pinyruodh Nyasaye manie Polo. Nochako locho e higa mar 1914.​—Fweny 11:15.

5.   Warruok. Inyalo war dhano kuom richo gi tho mana kokalo kuom misango ma Yesu nochiwo. (Mathayo 20:28; Tich Joote 4:​12) Mondo misango mar Yesu okony ng’ato, nyaka oket yie kuom Yesu, olokre, kendo obatise. (Mathayo 28:19, 20; Johana 3:​16; Tich Joote 3:​19, 20) Tim ng’ato nyiso ni yiene ngima. (Jakobo 2:​24, 26) Kata kamano, ok wanyal wacho ni timbewa mabeyo kende e ma miyo wayudo warruok, kar mano, wayudo warruok nikech “ng’wono mogundho mar Nyasaye.”​—Jo-Galatia 2:​16, 21.

6.   Polo. Jehova Nyasaye, Yesu Kristo, kod malaike odak e polo. b (Zaburi 103:19-​21; Tich Joote 7:​55) Nitie joma ibiro chier mondo odhi oloch gi Yesu e Pinyruodhe e polo, ma kwan-gi en 144,000.​—Daniel 7:​27; 2 Timotheo 2:​12; Fweny 5:​9, 10; 14:​1, 3.

7.   Piny. Nyasaye nochueyo piny mondo dhano odagie nyaka chieng’. (Zaburi 104:5; 115:16; Eklesiastes 1:4) Nyasaye biro guedho joma omakore kode komiyogi ngima ma kare kendo ma nyaka chieng’ e paradiso e piny.​—Zaburi 37:11, 34.

8.   Richo kod chandruok. Magi nochakore ka malaika moro nong’anyo ne Nyasaye. (Johana 8:​44) Malaikano, ma bang’ ng’anyone ne oluong ni “Satan” kendo “Jachien,” norwako dichwo gi dhako mokwongo e ng’anyo ne Nyasaye kendo mano nokelo ne nyikwagi rach. (Chakruok 3:​1-6; Jo-Rumi 5:​12) Mondo Nyasaye onyis ni Satan en ja miriambo, ne oweyo richo kod chandruok mondo obedie kuom kinde, kata kamano, obiro tiekogi machiegnini.

9.   Tho. Joma otho bedo ma onge. (Zaburi 146:4; Eklesiastes 9:​5, 10) Onge mach ma isandogie.

    Nyasaye biro chiero dhano tara gi tara. (Tich Joote 24:15) Kata kamano, joma biro dagi puonjore yore Jehova bang’ chier, ibiro keth chuth ma ok chak chiergi kendo.​—Fweny 20:14, 15.

10.   Ngima mar joot. Wamakore gi chenro mar kend ma Jehova noketo a chakruok ni kend obed riwruok e kind dichwo achiel gi dhako achiel, ka terruok kende e ma nyalo miyo ng’ato ratiro mar ketho kend chuth. (Mathayo 19:​4-9) Wan gadier chuth ni rieko ma yudore e Muma konyo joot mondo odag maber.​—Jo-Efeso 5:22–​6:1.

11.   Kit lamowa. Ok wati gi msalaba kata gimoro amora molos e lamowa. (Rapar mar Chik 4:​15-​19; 1 Johana 5:​21) Lamowa oriwo gik ma luwogi:

    •   Wuoyo gi Nyasaye e lamo.​—Jo-Filipi 4:6.

    •   Somo kendo puonjore Muma.​—Zaburi 1:​1-3.

    •   Paro matut kuom gik ma wapuonjore e Muma.​—Zaburi 77:12.

    •   Wachokore kanyachiel mondo walem, mondo wapuonjore Muma, wawer, waler yiewa, kendo mondo wajiw Joneno wetewa kaachiel gi jomamoko.​—Jo-Kolosai 3:​16; Jo-Hibrania 10:23-​25.

    •   Lando ‘wach maber mar Pinyruoth.’​—Mathayo 24:14.

    •   Konyo joma ni e chandruok.​—Jakobo 2:​14-​17.

    •   Gero Kingdom Halls kod ute mamoko ma watiyogo e siro tij puonjo Muma e piny mangima, kendo loso utego ka gikethore.​—Zaburi 127:1.

    •   Konyo ka masira oneno.​—Tich Joote 11:27-​30.

12.   Riwruokwa. Wan gi kanyakla mang’eny e piny mangima ma moro ka moro itayo gi bura mar jodongo. Kata kamano, jodongogo ok gin kaka jotend din, kar mano, gin mana kaka Joneno mamoko kendo ok chulgi. (Mathayo 10:8; 23:8) Ok wagol achiel kuom apar kendo onge sadaka ma isolo e chokruogewa. (2 Jo-Korintho 9:7) Tijewa duto isiro gi chiwo ma ji golo ka ok ochun-gi.

     Bura Matayo, ma en grup matin mar Jokristo motegno, ma tiyo e ofis maduong’ mar Joneno mag Jehova e ma tayo Joneno mag Jehova e piny mangima.​—Mathayo 24:45.

13.   Winjruok maber manie kindwa. Waluwo puonj machal e piny mangima. (1 Jo-Korintho 1:​10) Bende, watimo matek ahinya mondo kik wabuon ji ka luwore gi ogandagi, dhok ma giwacho, pien dendgi, kata kaka gidak. (Tich Joote 10:34, 35; Jakobo 2:4) Kata obedo ni waluwo yie achiel, pod ng’ato ka ng’ato nigi thuolo mar timo yierone owuon. Janeno ka Janeno timo yiero mare ka luwore gi kaka Muma otiege pogo ber gi rach.​—Jo-Rumi 14:​1-4; Jo-Hibrania 5:​14.

14.   Timbewa. Watemo ahinya mondo wanyis hera e timbewa duto. (Johana 13:34, 35) Watamore timbe ma ok mor Nyasaye, ma oriwo medo remo. (Tich Joote 15:28, 29; Jo-Galatia 5:​19-​21) Wan joma ohero kuwe kendo ok wariw lwedo weche mag lweny. (Mathayo 5:9; Isaiah 2:4) Wamiyo sirkal luor kendo waluwo chike ma giketo, tek mana ni chikego ok keth chike Nyasaye.​—Mathayo 22:21; Tich Joote 5:​29.

15.   Winjruokwa gi joma ok Joneno. Yesu nochiko kama: “Nyaka iher wadu kaka iherori iwuon.” Bende, nowacho ni Jokristo “ok gin mag piny.” (Mathayo 22:39; Johana 17:16) Omiyo, watemo timo “gik mabeyo ne ji duto,” kata kamano, ok wariw lwedo weche siasa kendo ok wariwre gi dinde mamoko. (Jo-Galatia 6:​10; 2 Jo-Korintho 6:​14) Kata kamano, wachiwo luor ne yiero ma jomamoko timo e weche ma kamago.​—Jo-Rumi 14:12.

 Ka po ni in gi penjo momedore e wi yie mar Joneno mag Jehova, inyalo yudo weche momedore e websaitwa, inyalo tudori gi achiel kuom ofisewa, inyalo dhi e chokruogewa e Kingdom Hall man machiegni kodi, kata inyalo wuoyo gi Joneno mag Jehova modak e alworau.