Joneno mag Jehova ok tim nyasi mag paro odiechieng nyuol nikech wang’eyo ni nyasigo ok mor Nyasaye. Kata obedo ni Muma ok kwerwa achiel kachiel ni kik watim nyasigo, ochiwo puonj ma konyowa nono gik ma timorega e nyasigo kendo ng’eyo paro ma Nyasaye nigo kuomgi. Wanon ane weche moko ang’wen kod puonj mag Muma motudore kodgi.

1.   Dinde mag miriambo e ma ne ochako nyasi mag paro odiechieng nyuol. Kaluwore gi Funk & Wagnalls Standard Dictionary of Folklore, Mythology, and Legend, nyasi kaka mago nochakore nikech ji ne paro ni e odiechieng’ minyuole ng’ato, nitie jochiende ma nyalo hinyo ng’atno, “to ka en gi osiepe ma dwarone hawi maber, mano nyalo geng’o jochiendego mondo kik gihinye.” Buk miluongo ni The Lore of Birthdays wacho ni kinde machon, ne indikoga tarik ma onyuolie ng’ato mondo obi okony e ng’eyo gik ma biro timorene e kinde ma biro kaluwore gi nonro mitimo kitiyo gi sulwe.” Bugno medo wacho ni ‘misuma mimokoga e odiechiengno nigi teko moko ma miyo ng’ato bedo gi hawi maber e ngimane.’

    Kata kamano, Muma kwero timbe juok, koro wach, kod “gik ma kamago.” (Rapar mar Chik 18:14; Jo-Galatia 5:19-21) Achiel kuom gimomiyo Nyasaye noketho taon mar Babilon machon, en nikech joma ne odak kuno ne tiyo gi sulwe e koro wach, to mano en achiel kuom timbe juok. (Isaya 47:11-15) Joneno mag Jehova ok non-ga weche duto e wi kaka nyasi moro nochakore; kata kamano, sama Muma ochiwo puonj moro e wi nyasi kaka mago, wakawoga wachno mapek.

2.   Jokristo mokwongo ne ok timga nyasi mar paro odiechieng nyuol. The World Book Encyclopedia wacho ni “ne gineno nyasigo kaka gik ma nochakore gi joma lamo nyiseche manono.” Muma wacho ni joote kaachiel gi jomamoko ma ne Yesu opuonjo achiel kachiel, noketo ranyisi ma Jokristo duto onego oluw.​—2 Jo-Thesalonika 3:6.

3.   Nyasi achiel kende ma dwarore ni Jokristo duto otim en mar paro tho Yesu, to ok nyuolne. (Luka 22:17-20) Mano ok kawwa gi wuoro nikech Muma wacho ni, “chieng’ ma ng’ato othoe ber moloyo chieng’ ma onyuolee.” (Eklesiastes 7:1) Chop chieng’ ma ne Yesu tieko wuodhe e piny ka, noyudo oseloso nying maber gi Nyasaye, to mano nomiyo chieng’ ma nothoe noloyo gi ber chieng’ ma nonyuolee.​—Jo-Hibrania 1:4.

4.   Muma ok wuo kuom jatich Nyasaye moro amora ma ne otimo nyasi ma iparogo odiechieng’ ma nonyuolee. Mano ok nyis ni wich nowil gi wachno, nikech Muma wuoyo kuom ji ariyo ma ne ok lam Jehova ma ne otimo nyasi miparogo odiechieng nyuol margi. Kata kamano, gik maricho notimore e nyasi ariyogo.​—Chakruok 40:20-22; Mariko 6:21-29.

 Mana kaka jonyuol mabeyo duto, Joneno mag Jehova bende e ohero nyithindgi, gimiyogiga mich mopogore opogore, kendo gibedoga gi budho mag mor kinde ka kinde. Gitemo luwo ranyisi mar Nyasaye, ma chiwonega nyithinde mich e okang’ malach. (Mathayo 7:11) Nyithind Joneno ok winjga ni otuon-gi gimoro mana kaka weche ma luwogi nyiso:

•   “Mich ma ng’ato opoyago berna moloyo mich ma ng’ato onyisa ni idhi miya.”​—Tammy, jahigni 12.

•   “Kata obedo ni ok nyiewnaga mich e odiechieng’ ma nonyuolae, jonyuolna pod miyaga mich kinde mamoko. Mano moraga nikech en mich ma gipoyago.”​—Gregory, jahigni 11.

•   “Iparo ni pati mar dakika apar, gi kek moko matin, kae to iweroni wer moro, be en pati adier? Bi odwa mondo ine pati ma pati!”​—Eric, jahigni 6.