Paro ma wan-go e wi wach yik otenore kuom puonj mag Muma. Puonjgo gin kaka:

•   Ywago osiepwa kata watwa motho ok en richo. Jopuonjre Yesu noywago joggi ma notho. (Johana 11:​33-​35, 38; Tich Joote 8:2; 9:​39) Omiyo, sama ng’ato otho ok en kinde mar chulo kuor. (Eklesiastes 3:​1, 4; 7:​1-4) Kar mano, en kinde mar hoyo joma ng’atgi otho.​—Jo-Rumi 12:15.

•   Jomotho ok ong’eyo gimoro amora. Kata obedo ni wawuok e oganda mopogore opogre kendo wapon e chal mopogore opogore, ok wariw lwedo timbe ma jiwo ni joma otho pod ngima. (Eklesiastes 9:​5, 6, 10) Timbego gin kaka bet e arita, dok madho chai, timo misango ne jomotho, wuoyo gi jomosetho ka ikwayogi ni gitimni gimoro kod tero mon. Ok wariw lwedo timbego nikech wadwaro luwo kaka Ndiko chikowa ni: “Auru e kindgi, . . . kendo weuru mulo gima ok ler.”​—2 Jo-Korintho 6:​17.

•   Nitie geno mar chier. Muma puonjo ni chier biro betie kendo nitie kinde ma tho ok nobedie kendo. (Tich Joote 24:15; Fweny 21:4) Mana kaka Jokristo mokwongo, wan bende geno mar chier, konyowa mondo kik wayuag kata kuyo mokalo tong’.​—1 Jo-Thesalonika 4:​13.

•   Muma wacho ni kik wabed joma kalo tong’. (Ngeche 11:2) Wang’eyo ni yik ok en gima onego watigo e “nyisruok” ni wan joma omewo ma chalo nade. (1 Johana 2:​16) Ok wabed gi yik molichore makawo pesa mang’eny, ma nigi sanduke ma nengogi tek gi lewni ma bechgi tek mondo wamor ji.

•   Ok wachun ji mondo oluw puonj mag Muma mwaluwo e wi yik. Waluwo puonjni: “Omiyo, ng’ato ka ng’ato kuomwa nochiw ne Nyasaye dwoko ma mare owuon e bura.” (Jo-Rumi 14:12) Kata kamano, ka thuolo oneno to watemo mondo waler yie marwa “gi chuny mamuol kod luor matut.”​—1 Petro 3:​15.

 Kama igole twak mar yik: Jood ng’at mothono ema biro yiero kama gidwaro mondo ogole twak mar yik. Ginyalo yiero ni ogole e Kingdom Hall, e dala, kata e dho bur.

 Chenro mar yik: Igolo twak ma hoyo joma ng’atgi otho. E twagno, ilero gima Muma puonjo e wi tho to kod geno mar chier. (Johana 11:25; Jo-Rumi 5:​12; 2 Petro 3:​13) Jagol twak nyalo wuoyo kuom gik mabeyo ma ne jal mothono ne timo ka pod ongima kendo nyiso kaka jowinjo nyalo luwo ranyisi maber ma ne jal mothono noketo.​—2 Samuel 1:​17-​27.

 Inyalo wer achiel kuom wendewa mag Pinyruoth. (Jo-Kolosai 3:​16) Programbni itieko kod lamo.​—Jo-Filipi 4:​6, 7.

 Chudo: Ok wachun Jokristo wetewa mondo ogol pes yik kendo ok wachok pesa moro amora mar yik e chokruogewa.​—Mathayo 10:8.

 Joma biro e liel: Oyiene joma ok gin Joneno mag Jehova mondo gibi e Kingdom Hall giwinj twak mar yik. Ji duto oyienegi winjo twak mar yik mana kaka oyiene ji duto biro e chokruogewa.

 Janeno ka Janeno ema timo yiero kaluwore gi gik ma osepuonjore e Muma. (1 Timotheo 1:​19) Kata kamano, ok watim nyasi moro amora ma ok luwre gi puonj mag Muma.​—2 Jo-Korintho 6:​14-​17.