MUSA ne owuotho mabor, nyaka got Horeb mondo omi oyud lum ne rombene. Kane en kuro, ne oneno bungu moro ma liel mach, to ok wang’!

Musa ne ochako parore ka wacho niya: ‘Ma hono. We asud machiegni mondo ane maler.’ Kane otimo kamano, dwol ne owuok e bunguno ka wacho kama: ‘Kik imed sudo machiegni. Lony wuoche e tiendi nikech kama ichung’ieno en kama ler.’ Nyasaye ema ne wuoyo kokalo kuom malaika, omiyo Musa ne oumo wang’e.

Kendo Nyasaye ne owachone niya: ‘Aseneno kaka joga sandore e piny Misri. Kuom mano, analor mondo aresgi, kendo in ema ibiro telonegi ka giwuok Misri.’ Jehova ne dhi tero joge e piny majaber miluongo ni Kanaan.

Kata kamano, Musa ne odwoke ni: ‘Anto an ng’a. Ere kaka anyalo timo kamano? To ka dipo ni adhi, Jo-Israel biro penja ni: “En ng’ano ma oori?” Anawachnigi nang’o?’

Nyasaye to ne odwoke ni, ‘Kama e kaka iniwach ni nyithind Israel. “Jehova Nyasach kwereu, Nyasach Ibrahim, Nyasach Isaka, gi Nyasach Jakobo oseora iru.”’ Kendo Jehova ne omedo wacho kama: “Ma e nyinga nyaka chieng’.”

Musa ne odwoko ni: ‘Nade ka gitamore winjo dwonda ka awachonegi ni in ema iora.’

Nyasaye ne openje niya: ‘Mano en ang’o miting’o e lwetino?’

Musa ne odwoke ni: ‘En luth.’

Nyasaye ne onyise ni ‘Bole piny.’ Kane Musa otimo kamano, ludhno ne obedo thuol. Kendo Nyasaye ne otimo ne Musa hono machielo. Ne owachone kama: ‘So lweti e lawi.’ Kane Musa ogolo lwete oko, lwete ne rachar machalo gi pe! Lwete ne chalo ka lwedo mar ng’at man kod tuwo marach mar dhoho. Bang’e Jehova ne omiyo Musa teko mar timo hono mar adek. Koro ne owachone niya: ‘Ka itimo honnigi, Jo-Israel biro bedo gi yie ni an ema aori.’

Bang’ mano, Musa ne odhi pacho ma owachoni Jethro niya: ‘Yie, mondo adog Misri ir jowetena mondo ane ka pod gingima.’ Kuom mano, Jethro ne ogoyo ni Musa oriti, kendo Musa ne ochako wuodhe mar dok Misri.