HIGINI mang’eny ne okalo. Yawuot Noa ne nigi nyithindo mang’eny. To nyithindgi ne odongo ma onyuolo nyithindo mamoko. Bang’ kinde matin ji ne obedo mang’eny e piny.

Achiel kuom jogi ne en nyakwar Noa miluongo ni Nimrod. Ne en ng’at marach ma ne jadwar manego le koda dhano. Nimrod bende ne oketore ruoth e wi jomoko. Nyasaye ne ok ohero Nimrod.

Ji duto e ndalono ne wacho dhok achiel. Nimrod ne dwaro choko ji duto kanyachiel mondo obed jatendgi. Koro, be ing’eyo gima ne otimo? Ne onyiso ji mondo oger dala ma nigi gorofa maduong’. Ne ane e pichani ka giloso matofali.

Jehova Nyasaye ne ok mor kod gima ne gigero. Nyasaye ne dwaro ni mondo ji okere odagi e piny ngima. Kata kamano, ji ne owacho: ‘Biuru, wageruru pacho kod gorofa ma wiye chopo nyaka e polo, kendo mondo walos nyingwa!’ Ji ne dwaro miyore luor giwegi kar miyo Nyasaye duong’.

Kuom mano, Nyasaye ne ok oyie ni ji mondo oger gorofano. Bende ing’eyo kaka ne otimo? Apoya nono, ne ochocho dhok ma ji ne wacho, ma ji ochako wacho dhok mopogore opogore kar wacho dhok achiel. Jogedogo koro ne ok winjore e dhok. Mano e momiyo dalagino ne oluong ni Babel, kata Babulon, matiende ni “Chochni.”

Ji koro ne ochako kere ka giwuok e Babel. Jogo ma ne wacho dhok machal ne owuok odhi chako dak kuonde mopogore opogore e piny.