BE INENO joma Dina dhi limo? Odhi limo nyiri moko ma odak Kanaan. Be Jakobo wuon mare biro mor gi wachno? Mondo omi wayud dwoko mar penjono, tem ane paro gima Ibrahim kod Isaka ne paro kuom mond Kanaan.

Bende Ibrahim ne dwaro ni Isaka wuode onyuom nyako ma oa Kanaan? Ooyo, ne ok odwar. Bende Isaka gi Rebeka ne dwaro ni Jakobo, wuodgi, onyuom nyako ma nya Kanaan? Ooyo, ne ok gidwar. Be ing’eyo gimomiyo?

En nikech Jo-Kanaan ne lamo nyiseche manono. Ne ok gin joma beyo riwruokgo e kend, kendo ne ok gin joma beyo bedogo kaka osiepe machiegni. Kuom mano, wanyalo bedo gi adier ni Jakobo ne ok dhi bedo mamor, ni nyare ne timo osiep gi nyi Kanaan.

To kuom adier, Dina ne odonjo e chandruok. Be inyalo neno e picha dichwo ma Ja-Kanaan ma ng’iyo Dina? Nyinge en Shekem. Chieng’ moro, kane Dina obiro limbe, Shekem ne okawo Dina ma onindo kode gi thuon. Mano ne en wach ma ok kare, nikech joma okendore kende ema onego onind kanyachiel. Gima rachno ma Shekem ne otimo ni Dina, ne omiyo chandruok mang’eny obiro.

Owete Dina kane owinjo gima ne otimore, igi ne owang’ ahinya. Ariyo kuomgi, Simeon gi Lawi, ne igi owang’ ahinya ma ne gikawo ligangla ma gimonjo jo piny Kanaan apoya. Gin kod owetegi ne ginego Shekem kod chwo mamoko duto. Jakobo ne iye owang’ nikech yawuote ne otimo gima rachno.

Chandruokgi duto ne ochakore nade? Ne en mana nikech Dina ne omako osiep gi joma ok luw chike Nyasaye. Ok wadwar mako osiep gi joma chalo kamano, donge?