NE ANE Musa ringo kawuok Misri. Be ineno jogo mariembe? Be ing’eyo gimomiyo gidwaro nege? We mondo wane ka be wanyalo ng’eyo.

Musa ne odongo e od Farao ruodh Misri. Ne obedo ng’at ma ne nigi rieko ahinya kendo mong’ere. Musa ne ong’eyo ni ne ok en Ja-Misri, kendo ne ong’eyo ni jonyuolne ne gin Jo-Israel ma wasumbini.

Chieng’ moro, kane en ja higini 40, Musa ne oneno ni mondo odhi olim anyuolane mondo one kaka gichalo. Ne onwang’o ni ne itiyo kodgi e yo maok ber. Ne oneno Ja-Misri moro ka goyo Ja-Israel ma misumba. Musa ne ong’iyo koni gi koni, to kane onwang’o ni onge ng’at ma ne ng’iye, ne ogoyo Ja-Misrino ma ng’ano otho. Bang’e Musa ne opando ringre ng’ano e kwoyo.

Odiechieng’ ma ne oluwo mano, Musa ne owuok odhi limo anyuolane kendo. Ne oparo ni ne onyalo konyogi mondo kik gibed wasumbini kendo. Kata kamano, ne oneno Jo-Israel ariyo ka dhawo. Kuom mano, Musa ne owacho ni jal ma ne rach e kindgi ni: ‘Ang’o momiyo igoyo owadu?’

Ng’atno ne odwoke niya: ‘En ng’ano ma oketi ruoth kendo jang’ad bura e kindwa? Idwaro nega kaka ne inego Ja-Misri chande?’

Koro luoro ne omako Musa. Ne onwang’o ni kare ji ne oseng’eyo gima ne otimo ni Ja-Misri chande. Kata Farao bende ne osewinjo wachni, omiyo ne ooro ji mondo oneg Musa. Mani e momiyo Musa ne nyaka ringi mondo oa Misri.

Kane Musa oa Misri, ne odhi mabor e piny miluongo ni Midian. Kuro, ne oromo gi jood Jethro kendo ne onyuomo achiel kuom nyige miluongo ni Zipora. Musa ne obedo jakwath, kendo ne okwayo rombe mag Jethro. Ne odak e piny Midian kuom higini 40. Koro ne en jahigini 80. Chieng’ moro, kane Musa kwayo rombe Jethro, gimoro miwuoro ne otimorene, kendo mani ne oloko ngimane. El ane kalatas maluwo mae, mondo wane gimiwuoro ma ne otimoreno.