BE ING’EYO dhako ma ni e pichani? Nyinge en Rebeka. To dichwo ma odhi romogoni en Isaka. Dhakoni biro bedo chi Isaka. Mano ne otimore nade?

Ibrahim wuon Isaka ne dwaro mondo wuode oyud dhako maber. Ne ok odwar mondo Isaka okend achiel kuom mon ma wuok Kanaan nikech jogo ne lamo nyiseche manono. Kuom mano, Ibrahim ne oluongo jatichne ma owachone ni: ‘Adwaro ni idhi thurwa Haran, ir joodwa, iyud ni wuoda Isaka dhako.’

Mapiyo nono jatich Ibrahim ne okawo ngamia apar mi nochako wuodhno. Kane ochopo machiegni gi kama wede Ibrahim ne odakie, ne ochung’ machiegni gi soko moro mar pi. Ne en odhiambo, seche ma mon mag dalano ne biro umbo e soko. Kuom mano, jatij Ibrahim ne okwayo Jehova kama: ‘Nyako ma nomiya an kaachiel gi ngamia pi modho, we mondo obedi ma iyiero ni jatichni Isaka.’

Bang’e matin, Rebeka ne obiro umbo pi. Ka jatij Ibrahim ne okwaye pi, ne omiye. Bang’e ne odhi ma oomo pi moromo ngamia duto ma ne riyo omako. Mano ne en tich matek nikech ngamia modho pi mang’eny ahinya.

Kane Rebeka otieko timo mano, jatij Ibrahim ne openje nying wuon mare. Ne openje bende ka thuolo nyalo yudore mondo onind e dalagi. Rebeka ne odwoko ni: ‘An nyar Bethuel, to kendo wan kod kama inyalo nindoe bende.’ Jatij Ibrahim ne ong’eyo ni Bethuel ne en wuod Nahor ma owadgi Ibrahim. Kuom mano, ne ogoyo chonge piny ma odwoko erokamano ni Jehova kuom telone nyaka ochopo ka wede Ibrahim.

Gotienono, jatij Ibrahim ne onyiso Bethuel gi Laban owadgi Rebeka gimomiyo ne obiro. Giduto ne giyie ni Rebeka ne nyalo dhi mondo okende gi Isaka. Rebeka to ne owacho ang’o kane openje? Ne oyie ni: ‘Kamano’ ne odwaro dhi. Kuom mano, kinyne ne giidho ngamia ma gichako wuodh dok Kanaan.

Ne gichopo e seche mag odhiambo. Rebeka ne oneno ng’at moro ka wuotho e puodho. Ne en Isaka. Ne omor kuom neno Rebeka. Sara min Isaka ne oyudo osetho higini adek ma ne osekalo, to mano pod ne miye kuyo. Kata kamano, Isaka koro ne ochako hero Rebeka ahinya ma obedo mamor kendo.