BE ING’EYO ji ariyo ma Jokobo wuoyogo kae? Bang’ wuotho kuom ndalo mang’eny, Jakobo ne oyudogi e soko moro. Ne gikwayo rombegi. Jakobo ne openjogi niya: ‘Ua kanye?’

Ne gidwoke ni, ‘Haran.’

‘Bende ung’eyo Laban?’ Jakobo ne openjogi.

Ne gidwoke niya: ‘Ee, Wang’eye. Nyare ma Rahel icha biro gi rombene.’ Bende inyalo neno Rahel kanyo kabiro?

Kane Jakobo oneno Rahel gi rombe mag ner mare ma Laban, ne odhi ma ogolo kidi ma ne umo dho soko mondo rombe oyud kaka modho. Jakobo ne onyodho Rahel ma ging’ere. Rahel ne mor ahinya, kendo ne oringo ma odok dala nyiso Laban wuon mare.

Laban ne mor ahinya e rwako Jakobo mondo odag kode. Kendo kane Jakobo okwayo mondo onyuom Rahel, Laban ne mor. Kata kamano, ne okwayo Jakobo ni mondo oti e puothe kuom higini abiriyo eka mondo oyud Rahel. Jakobo ne otimo kamano nikech ne ohero Rahel ahinya. Kata kamano, kane ochopo chieng’ ma ne onego gikendre, be ing’eyo gima ne otimore?

Kar chiwo Rahel, Laban ne ochiwo Lea nyare maduong’ mondo obed chi Jakobo. Jakobo kane oyie tiyo ni Laban higini abiriyo moko kendo, Laban ne omiye Rahel bende mondo obed chiege. E kindego, Nyasaye ne oweyo ji mondo obed gi mon makalo achiel. Kata kamano, ndalogi, mana kaka Muma nyiso, dichwo onego obed gi dhako achiel kende.