OSEF dwaro ng’eyo ka be owetene 10 podi gin joma onge ng’wono. Kuom mano, onyisogi ni: ‘Un joma timo limbe maling’ling’. Ubiro mondo une kama pinywa nyapgo.’

Gidwoke ni: ‘Ooyo, ok wan kamano. Wan joma kare. Wan owete. Ne wan owete 12. Kata kamano, achiel kuomwa osetho, to wuowi machogo odong’ dala kod wuonwa.’

Josef wuondore ni ok oyie gi wachgino. Orwako owadgi miluongo ni Simeon e jela, to oweyo mokogo mondo okaw chiemo kendo odog dala. Kata kamano onyisogi ni: ‘Chieng’ ma uduogo, nyaka ukel owadu ma chogo.’

Ka gidok Kanaan, owetego nyiso Jakobo wuon-gi gik moko duto ma ne otimore. Jakobo kuyo ahinya. Oyuak ka owacho ni, ‘Josef onge, to Simeon bende onge. Ok abi yienu kawo wuoda ma Benjamin.’ Kata kamano, ka chiembgi chako rumo, mano chuno Jakobo gonyo Benjamin mondo odhi kodgi Misri kelo chiemo.

Koro Josef neno owetene ka biro. Omor ahinya neno Benjamin owadgi matin. Kuom adier, ok ging’eyo ni jateloni en mana Josef. Kuom mano, Josef koro timo gimoro mondo otem-go owetene apar.

Ochiko jotichne mondo opong’ ogundegi gi chiemo. Kendo ochiko mondo oso okombene mar fedha e ogund Benjamin ma ok onyisogi. Ka gise a, kendo oyudo gisedhi mabor matin, Josef oro jotichne mondo oluw bang’gi. Ka gijukogi, jotichgo wacho ni: ‘Ang’o momiyo ukwalo okomb fedha mar jatendwa?’

Owetego wacho ni ‘Ooyo, ok wakwalo okombeno. Ng’at ma oyud gi okombeno e kindwa to mondo onegi.’

Kuom mano, jotichgo koro manyo okombeno ei ogundego duto, to giyude e ogund Benjamin, mana kaka ineno kanyo. Jotichgo wachoni: ‘Joma odong’ nyalo dhi, Benjamin to nyaka bi kodwa.’ En ang’o ma owetene apargo koro biro timo?

Giduto ne gidok gi Benjamin nyaka e od Josef. Josef nyiso owetene ni: ‘Uduto unyalo dok dalau, to Benjamin nyaka dong’ kani kaka misumbana.’

Juda koro wuoyo kawacho ni: ‘Ka dipo ni adok dala maonge wuowini, to wuora biro tho nikech ohere ahinya. Omiyo asayi, yie mondo itweya an kaka misumbani, to iweye odog dala.’

Josef neno ni owetene oselokore. Koro gin joma nigi ng’wono kendo. We wane gima Josef koro timo.