E ANE gima timore! Ng’at ma rieyo ludhe e wi Nam Makwarno en Musa. Jogo ma ne otony mantie kode e dho nam, gin Jo-Israel. Kata kamano, Farao gi jo lweny mage duto tho e nam. We mondo wane kaka mani ne otimore.

Kaluwore kod kaka wase puonjore, Farao ne onyiso Jo-Israel mondo oa Misri mana bang’ masira mar apar ma Nyasaye ne okelo e wi Jo-Misri. Jo-Israel ma chwo madirom 600,000 kaachiel gi mon koda nyithindo ne owuok Misri. Oganda maduong’ mar ji mamoko ma ne koro osebedo gi yie kuom Jehova, bende ne odhi kod Jo-Israel. Giduto ne gikawo rombe gi diek koda dhok ma ne maggi ma gidhi godo.

Ka ne podi ok giwuok, Jo-Israel ne okwayo Jo-Misri lewni kod gik moko ma ne olos gi dhahabu kod fedha. Jo-Misri koro ne oluor ahinya nikech masira mogik ma ne oyudogi. Kuom mano, ne gimiyo Jo-Israel gik moko duto ma ne gikwayo.

Bang’ ndalo manok, Jo-Israel ne ochopo e Nam Makwar. Kanyo ema ne giyueye. E kindeni, Farao kod joge ne ochako winjo marach ni ne giweyo Jo-Israel mondo odhi. Ne giwacho ni ‘Waweyo wasumbiniwa odhi!’

Kuom mano, Farao ne oloko pache kendo. Ne ochano piyo piyo gach faras ma mare mar lweny koda jo lweny mage. Bang’e ne ochako lawo Jo-Israel ka en kod geche faras 600 makende, koda geche faras duto mag Misri.

Kane Jo-Israel oneno Farao gi joge mag lweny ka lawogi, luoro ne omakogi ahinya. Ne onge yo ma ne gi nyalo tonygo. Nam Makwar ne odino nyimgi, to Jo-Misri ne lawo bang’gi. Kata kamano, Jehova ne oketo bor polo kaka sisi e kindgi kod Jo-Misri. Jo-Misri ne ok nyal hinyo Jo-Israel nikech ne ok ginyal nenogi.

Eka Jehova ne onyiso Musa ni mondo orie ludhe e wi Nam Makwar. Kane otimo kamano, Jehova ne okelo yamo ma kudho matek kowuok yo ugwe. Pi nam ne opogore e diere.

Bang’e, Jo-Israel ne ochako ng’ado namno ka giwuotho kama otwo. Kalo namno nyaka loka machielo, ne okawo seche, eka mondo ji tara gi tara koda le duto ma ne gin-go ochop loka cha e yo ma kare. Bang’ mano eka Jo-Misri ne ochako oneno Jo-Israel kendo. Wasumbini maggi ne dhi lal! Kuom mano, ne girikni donjo e nam ka gi lawogi.

Kane gitimo mano, Nyasaye ne omiyo tiende gechegi owuok. Jo-Misri ne obedo gi luoro ahinya, kendo ne gichako yuak niya: ‘Jehova ema kedonigi kodwa. Waringuru waa kae!’ Kata kamano, ne giparo molewo.

E sechego Jehova ne onyiso Musa mondo orie ludhe e wi Nam Makwar, mana kaka ne ineno e picha. To ka Musa ne otimo mano, pi ne oduogo ma oimo Jo-Misri kod gechegi. Jo lweny duto ne olawo Jo-Israel nyaka ei nam. To ne onge kata Ja-Misri achiel ma ne otony gi ngimane!

Nyaka bed ni oganda Nyasaye duto ne mor nikech resruok ma ne giyudo! Chwo ne owero wer mar dwoko erokamano ni Jehova ka giwacho: ‘Jehova oseyudo loch maduong’. Osewito farese kod joma idhogi e nam.’ Nyamin Musa ma Miriam ne okawo bul matin mare, kendo mon duto ne owuok ka luwo bang’e gi bunde-gi matindo. Kendo ne gichako miel gi ilo, ka giwero wer machalo gi ma chwo ne wero ka wacho: ‘Jehova oseyudo loch maduong’. Osewito farese kod joma idhogi e nam.’