E ANE nyathi matinni kayuak kendo omoko e lwet dhakono. Ma en Musa. Be ing’eyo ni dhako maberno en ng’a? En nyar Farao ma ruodh Misri.

Min Musa ne opando nyathine ma nyaka obedo jadweche adek, nikech ne ok odwar ni mondo Jo-Misri onege. Kata kamano, ne ong’eyo ni ji ne nyalo fwenyo Musa, omiyo ma e gima ne otimo mondo orese.

Ne okawo adita, kendo ne omwone maber mondo pi kik donj e iye. Bang’e ne oketo Musa e iye, kendo ne oketo aditano e lum maboyo e tiend Aora Nail. Ne onyis nyamin Musa ma Miriam ni mondo ochung’ machiegini gi kanyo eka mondo one gima ne dhi timore.

Bang’ kinde machuok, nyar Farao ne obiro mondo olwokre e Aora Nail. Apoya nono, ne oneno adita e kor lum maboyo. Ne owacho ni achiel kuom jotichne ma nyiri: ‘Dhi mondo ikelna ane adita maneno cha.’ Nyar ruoth kane oelo aditano, ne oneno nyathi maber miwuoro! Musa ne yuak, omiyo nyar ruoth ne winjone malit. Ne ok odwar ni mondo onege.

Bang’e, Miriam ne odhi kanyo. Inyalo nene e picha. Miriam ne openjo nyar Farao kama: ‘Adhi mondo aluongni dhako ma nyar Israel mondo opidhni nyathino?’

Ne odwoke ni: ‘Kiyie, to tim kamano.’

Kuom mano, Miriam ne oringo matek mondo onyis min mare. Kane min Musa obiro ir nyar ruoth, nyar ruoth ne owachone niya: ‘Kaw ane nyathini mondo ipidhnago kendo abiro chuli.’

Kuom mano, min Musa ne opidho nyathine owuon. Bang’e, Musa kane duong’ moromo, min mare ne otere ir nyar Farao, kendo nyar Farao ne okawe ma obedo kaka nyathine owuon. Mano e kaka Musa ne odongo e od Farao.