E ANE pichegi. Moro ka moro nyiso masira ma Jehova ne okelo e wi piny Misri. E picha mokwongo, inyalo neno ka Harun goyo Aora Nail gi ludhe. Kane otimo kamano, pi aorano ne olokore remo. Rech ne otho ma aora ne ochako ng’we marach.

Bang’ mano, Jehova ne omiyo ogwende owuok e Aora Nail. Ne gintie kamoro amora—e kendo, e gik dwalo mogo, e otendni ji—kuonde duto. Kane ogwendegi otho, Jo-Misri ne ochokogi ma gigangore gigangore, kendo piny ne ng’we marach kodgi.

Bang’e, Harun ne ogoyo piny gi ludhe, ma lowo ne olokore sambe. Sambe chalo gi lwang’ni to gin gikayo ji. Sambegi ema ne gin masira mar adek e piny Misri.

Masiche ma ne odong’ ne gin masiche ma ne hinyo Jo-Misri kende to ok Jo-Israel. Masira mar ang’wen ne gin lwang’ni madongo ma ne opong’o ute Jo-Misri duto. Mar abich ne en mahinyo le. Ng’eny dhok, rombe gi diek mag Jo-Misri ne otho.

Bang’ mano, Musa gi Harun ne okawo buru moko ma giwito burugo e kor yamo. Timo kamano ne okelo ni ji koda le adhonde maricho. Mani ne en masira mar auchiel.

Bang’ mano, Musa ne orieyo lwete kochomo polo ma Jehova ne ooro pe. Mani ne en pe marach ahinya ma podi ne ok otimore e piny Misri.

Masira mar aboro ne en mar det bonyo. Det bonyo ne podi ok obedoe mang’eny machalo gi mano. Ne gichamo gimoro amora ma pe ne ok oketho.

Masira mar ochiko ne en mar mudho mandiwa. Kuom ndalo adek piny ne opong’ gi mudho mandiwa, to Jo-Israel ne nigi ler kuonde ma ne gidakie.

Mogik, Nyasaye ne onyiso joge ni mondo giwir remb nyadiel kata mar nyarombo e wi dhoutegi. Bang’e, malaika mar Nyasaye ne okalo e piny Misri. Kane malaika oneno remo, ne ok oneg ng’ato e odno. To ei ute duto ma ne dhoutegi onge remo e wigi, malaika mar Nyasaye ne onego nyithindo makayo duto mag dhano koda le. Mani ne en masira mar apar.

Bang’ masira ma ne ogikni, Farao ne owachoni Jo-Israel mondo oa. Oganda mar Nyasaye ne oseikore mar dhi, omiyo ne gichako wuok Misri mana gotienono.